ខេត្តត្បូងឃ្មុំ៖លោក ប៉ុន ប៊ុនណា ប្រ ធានស្នាក់ការគយច្រកអន្តរជាតិត្រពាំងផ្លុង ត្រូវបានមន្ត្រីមួយចំនួនបង្ហើបឲ្យដឹងថា លោក មេគយរូបនេះបានប្រើប្រាស់អំណាចគយឃុបឃិតជាមួយឈ្មួញដែលនាំទំនិញចេញចូលពីប្រទេសវៀតណាមមកកម្ពុជាតាមច្រកខាងលើដោយបន្ទាបតម្លៃទំនិញធ្វើឲ្យការបង់ពន្ធចូលរដ្ឋមានកម្រិតទាប ប៉ុន្តែកំណត់ថ្លៃ យកពីឈ្មួញក្នុងកម្រិតខ្ពស់ ហើយនៅកហិតឲ្យបង់ក្រៅផ្លូវការថែម ទៀត។
ក្រុមឈ្មួញដែលរកស៊ីស្របច្បាប់បានបញ្ជាក់ថា បញ្ហានេះកើតឡើងតាំងពីលោក ប៉ុន ប៊ុនណា មកកាន់តំណែងនៅច្រកនេះម្ល៉េះ គឺពួកគេបានឃុបឃិតជាខ្សែ និងរៀបចំជាបក្ខពួកដែលជាមនុស្សជំនិតរបស់មេគយ ដើម្បីលាក់បាំងឲ្យជិតពីការប្រព្រឹត្តអំពើពុករលួយរបស់ក្រុមខ្លួន។ ជាញឹកញាប់ មន្ត្រីគយបានឃុបឃិតជាមួយឈ្មួញលួចក្លែងបន្លំប្រភេទទំនិញដើម្បីឲ្យការបង់ពន្ធមានកម្រិតតិចតួចដោយទុកភាគរយ ចែកគ្នាច្រកហោប៉ៅ ។
ប្រភពដដែលបានទម្លាយឱ្យដឹងថា រាល់ទំនិញដែលនាំចូលតាមច្រកអន្តរជាតិត្រពាំងផ្លុងទាំងអស់ អាចគេត្រូវរ៉ូវគ្នាដាក់ឲ្យបង់ពន្ធចូលរដ្ឋត្រឹមតែ ៧% ទៅ១៥% ប៉ុណ្ណោះបើប្រៀបធៀបទៅនឹងទំនិញដែលនាំចូលជាក់ស្តែង ដែលទង្វើនេះបានធ្វើឱ្យបាត់បង់ចំណូលពន្ធរដ្ឋយ៉ាងច្រើនសន្ធឹកសន្ធាប់រាប់សិបលានដុល្លារក្នុងមួយខែៗ ប៉ុន្តែមិនដឹងថាសាម៉ីក្រសួងដែលជាអ្នកគ្រប់គ្រងមន្ត្រីគយ និងចំណូលពន្ធ បានជ្រាបរឿងហេតុនេះកម្រិតណានោះទេ ឬក៏ដឹងដែរតែធ្វើមិនដឹងដើម្បីផលប្រ យោជន៍អ្វីមួយ ?
ប្រភពដដែលបានឲ្យដឹងថា កន្លងមកកមានមន្ត្រីគយតូចតាចដែលមិនពេញចិត្តនឹងការដឹកនាំរបស់លោកប្រធាន ប៉ុន ប៊ុនណា នាំគ្នាទម្លាយអាថ៌កំបាំងផ្ទៃក្នុងរឿងពុករលួយធំៗដែលត្រូវលោក ប៉ុន ប៊ុនណា ស៊ីដាច់ ប្រាប់ឱ្យមជ្ឈដ្ឋានខាងក្រៅជួយពិចសរណា និងជួយរកយុត្តិធម៌ ។ការទម្លាយរឿងផ្ទៃក្នុងនេះត្រូវគេដឹងថា ផ្តើមចេញមកពីការចែកផលប្រយោជន៍មិនស្មើគ្នា ។
ព័ត៌មានពីមន្ត្រីផ្សេងទៀតបានលើកឡើងថា ទំនិញដែលជាប់អត្រាពន្ធ ៧ % សម្រាប់រថយន្តធុនតូចត្រូវបង់ ៦លានរៀល ។ រីឯរថយន្តធុនធំ ត្រូវបង់៩លានរៀល ថែមទាំង បង់សេវាក្រៅប្រព័ន្ធច្បាប់ ៣ លានរៀលផ្សេងទៀត ។ចំពោះអត្រាពន្ធ១៥% សម្រាប់រថយន្តធុនធំត្រូវបង់ ១០លានរៀល សេវាក្រៅប្រព័ន្ធច្បាប់ ៥លានរៀល ប៉ុន្តែគេសរសេរបញ្ជាក់នៅក្នុងវិក្កយបត្រដាក់ជាប្រភេទទំនិញថោកៗដើម្បីជាប់ពន្ធតិចត្រឹម៧%ឬ១៥%ប៉ុណ្ណោះ ពោល គឺជាការឃុបឃិតគៃបំបាត់ពន្ធរដ្ឋយ៉ាងគគ្លើន។
តាមប្រភពពីមន្ត្រីគយបានបញ្ជាក់ថា លោក ប៉ុន ប៊ុនណា អតីតមន្ត្រីគយក្រុមត្រួតពិនិត្យ កំពង់ផែថ្ម ក្រុងព្រះសីហនុ កន្លងមកគាត់មានជំនាញខ្ពស់ក្នុងការច្នៃរឿងបញ្ចុះពន្ធ និងក្លែង ប្រភេទទំនិញតាមតែបបូរមាត់ និងទំនើងចិត្ត ។នៅខេត្តព្រះសីហនុ លោក ប៉ុន ប៊ុនណា ក៏ធ្លាប់ត្រូវគេរិះគន់យ៉ាងចាស់ដៃដែរ ក្នុងករណីគៃបំបាត់ចំណូលពន្ធរដ្ឋធ្វើមានបានផ្ទាល់ខ្លួននិងបក្ខពួក ។ករណីខ្លះគេឃុបឃិតគ្នាប្រព្រឹត្តអំពើពុករលួយតាមរយៈការគាបសង្កត់ឱ្យម្ចាស់ទំនិញបង់ថ្លៃសេវាក្រៅប្រព័ន្ធច្បាប់តាមអំពើចិត្ត បើមិនដូច្នេះទេនឹងយកលេសថា ទំនិញខូចគុណភាព ឬមិនត្រឹមត្រូវតាមស្តង់ដារ ឬបង្កកទំនិញច្រើនថ្ងៃឲ្យខូចគុណភាពជាដើម ចាការព្រមានចំពោះឈ្មួញណាមួយដែលមិនត្រូវរ៉ូវជាមួយខ្លួន ។
មជ្ឈដ្ឋានមន្ត្រីប្រចាំការនៅច្រកត្រពាំងផ្លុង បានអំពាវនាវដល់លោក គុណ ញឹម អគ្គនាយកគយ និងរដ្ឋាករ ជាពិសេសលោក អូន ព័ន្ធមុនីរ័ត្ន និងរដ្ឋមន្ត្រីក្រសួងសេដ្ឋកិច្ច និងហិរញ្ញើវត្ថុ គួរតែដាក់ការត្រួតពិនិត្យពីភាពមិនប្រក្រតីរបស់ លោក ប៉ុន ប៊ុនណា ប្រធានស្នាក់ការគយ និងរដ្ឋាករច្រកអន្តរជាតិ ត្រពាំងផ្លុងនេះផង ដើម្បីធ្វើការកែទម្រង់ស៊ីជម្រៅលើការប្រមូលពន្ធចូលរដ្ឋឱ្យបានគ្រប់១០០% ។
លោក ប៉ុន ប៊ុនណា ប្រធានស្នាក់ការគយច្រកអន្តរជាតិត្រពាំងផ្លុងខេត្តត្បូងឃ្មុំ នៅព្រឹកថ្ងៃទី០១ ខែសីហា នេះ មិនអាចទាក់ទងសុំការអធិប្បាយឆ្លើយតបចំពោះការលើកឡើងដូចខាងលើបានទេ៕ ដោយ៖ខេមរៈ
លោក អូន ព័ន្ធមុនីរ័ត្ន (ឆ្វេង) និងលោក គុណ ញឹម អគ្គនាយកគយ និងរដ្ឋាករ
