ភ្នំពេញ៖ បព្វជិតដើមកំណើតខ្មែរកម្ពុជា ក្រោម ២រូប ត្រូវសមត្ថកិច្ចចម្រុះខណ្ឌពោធិ៍សែនជ័យឃាត់ខ្លួនក្រោយពេលប្រតិបត្តិការឆែកឆេរក្នុងកុដិដែលបព្វជិតខ្មែរកម្ពុជាក្រោមទាំងនោះស្នាក់ធម៌ដោយរកឃើញសារធាតុញៀនម្សៅពណ៌ស និងសម្ភារៈមួយ ចំនួនទៀតដែលផ្ទុយពីវិន័យព្រះពុទ្ធសាសនាឲ្យគោរពប្រតិបត្តិ ។
សមត្ថកិច្ចខណ្ឌពោធិ៍សែនជ័យ កាលពីព្រឹកថ្ងៃទី១ ខែសីហា ឆ្នាំ២០១៥ នេះ បានចុះឆែកឆេរក្នុងកុដិលេខ៤ ក្នុងវត្តអង្គតាម៉ិញ សង្កាត់ចោមចៅ ខណ្ឌពោធិ៍សែនជ័យ ដោយរកឃើញថ្នាំញៀន១កញ្ចប់តូច និងខោទ្រនាប់មនុស្សស្រីនៅក្នុងកុដិដែលបព្វជិតទាំង២រូបនោះរក្សាទុក ។
សមត្ថកិច្ចបានបញ្ជាក់ថា បព្វជិតដែលត្រូវសមត្ថកិច្ចឃាត់ខ្លួនទាំង២រូបនេះមាន១ឈ្មោះ ដាវ ទេព្យ អាយុ ២៨ឆ្នាំ និងឈ្មោះ ជា វណ្ណដា អាយុ ៣០ឆ្នាំ។ សមត្ថកិច្ចបានដកហូតសម្ភារះរួមមាន ថ្នាំញៀនម្ស៉ៅគ្រាប់ពណ៌ស ១កញ្ចប់តូច កាំបិតផ្គាក់១ ដាវ១ ដំបង១ បៀ១ហ៊ូ ឌីស២បន្ទះ ស្រោមអនាម័យ១ ទូរស័ព្ទដៃ ៣គ្រឿង ក្រដាសកន្ទុយលេខ២សន្លឹក ខោទ្រនាប់មនុស្សប្រុស២ និងខោទ្រនាប់មនុស្សស្រីចំនួន៣ ។
មន្ត្រីធម្មការខណ្ឌបានឲ្យដឹងថាបព្វជិតទាំង២រូបនោះ ព្រមទាំងវត្ថុតាង ត្រូវបានបញ្ជូនទៅសាលាអនុគុណខណ្ឌ ដើម្បីមានវិធានការ តាមច្បាប់ព្រះពុទ្ធសាសនា រួចបញ្ជូនខ្លួនទៅកាន់នគបាលខណ្ឌ កសាងសំណុំរឿង ដើម្បីបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធី ។
គួរជម្រាបថា ប្រតិបត្តិការនេះ ធ្វើឡើងបន្ទាប់ពីមានសេចក្តីរាយការណ៍ពីបងប្អូនប្រជាពលរដ្ឋដែលពួកគាត់បានកត់សម្គាល់ឃើញពីសកម្មភាពមិនប្រក្រតីបព្វជិតមួយចំនួនតូច ក្នុងវត្តអង្គតាម៉ិញនេះ។
ទោះជាយ៉ាងនេះក្តី ក៏មជ្ឈដ្ឋានមួយចំនួនបានផ្សារភ្ជាប់រឿងនេះទៅនឹងសង្ឃមួយអង្គព្រះនាម សឺង ហាយ ជាសង្ឃដែលគេឧស្សាហ៍ឃើញជាញឹកញាប់ក្នុងហ្វូងបាតុកម្ម និងថ្មីៗនេះបានចូលរួមទៅពិនិត្យព្រំដែនខេត្តស្វាយរៀងជាប់ប្រទេដសវៀតណាមផងដែរ៕ដោយ៖រដ្ឋា
