កំពង់ធំ៖លោក យ៉ាន់ វិសាក់ ហៅសែ ប្រធានផ្នែករដ្ឋបាលជលផលផាត់សណ្តាយ ពេលថ្មីៗនេះត្រូវគេមើលឃើញថា បាន និងកំពុងឃុបឃិតបើកដៃឲ្យឈ្មួញបង្កបទល្មើសនេសាទក្នុងរដូវហាមឃាត់យ៉ាងអនាធិបតេយ្យ។មិនដឹងថា តើលោក អេង ជាសាន្ត ប្រតិភូរាជរដ្ឋាភិបាលទទួលជាប្រធានរដ្ឋបាលជលផលបានដឹងពីអំពើពុករលួយនេះដែរ ឬយ៉ាងណា?
អ្នកឆ្លើយឆ្លងព័ត៌មានបានដកស្រង់សំដីប្រជានេសាទថា បទល្មើសដែលគេជឿថាមន្ត្រីជលផលបើកដៃឲ្យនោះរួមមាន សកម្មភាពដាក់របាំងលបណរាវប្រភេទធំៗដែលមានប្រវែងចាប់ពីជាង១០០០ម៉ែត្រ រហូតដល់ជាង៣០០០ម៉ែត្រ បាន និងកំពុងកើតមាននៅចំណុចបឹងទន្លេសាបចាប់ពីក្បាលកោះ តាបរទ្វារបឹងផ្ទះឆេះ រហូតដល់ផ្សោត ស្ថិតក្នុងភូមិសាស្ត្រឃុំផាត់សណ្ដាយពស្រុកកំពង់ស្វាយ ខេត្តកំពង់ធំ។នៅទីនោះមានរបាំងចំនួនរាប់រយរាប់ពាន់ដំណាក់គ្មានការបង្ក្រាបពីជំនាញជលផលក្រោមឧវាទលោក យ៉ាន់ វិសាក់ ហៅសែ ឡើយ ។
ប្រភពដដែលបន្តថា ក្នុងរដូវបិទនេសាទមួយរដូវៗ គេជឿថា លោកយ៉ាន់ វីសាក់ ហៅសែ អាចប្រមូលលុយបានរាប់រយលានរៀល ព្រោះគ្រាន់តែឧបករណ៍ឆ្នុកសំរាប់មួយកន្លែងត្រូវ បង់អោយលោក យ៉ាន់ វីសាក់ ប្រមាណ ២លានរៀល ក្នុងមួយរដូវបិទនេសាទ។បច្ចុប្បន្នឧបករណ៍ឆ្នុកនៅក្នុងបឹងទន្លេសាបស្ថិតក្នុងដែនសមត្ថកិច្ចគ្រប់គ្រងរបស់លោក យ៉ាន់ វិសាក់ (ហៅសែ) មានចំនួនរាប់រយកន្លែងឯណោះ ដូចជានៅតំបន់បាឡតពាមបាង ទន្លេឆ្មាជាដើម។
មន្ត្រីជំនាញកសិកម្មខេត្តកំពង់ធំបានបញ្ជាក់ថា តាមការប៉ាន់ស្មាន លោក យ៉ាន់ វិសាក់ អាចម្រមូលលុយពីបទល្មើសនេសាទបានប្រមាណជាង៤០០លានរៀលឯណោះ កាលពីរដូវបិទនេសាទឆ្នាំ២០១៤ កន្លងទៅ។ប្រភពបន្តថា កាលជំនាន់នោះ(២០១៤)លុយប្រមូលពីរបាំងព្រួលគ្រប់ កន្លែងដែលក្នុងមួយរបាំងចាប់ពីប្រមាណ៤លានរៀល ទៅ៦លានរៀល។អញ្ចឹងហើយបានជាពេលមាន ប្រជាពលរដ្ឋប្ដឹងទៅថ្នាក់លើសុំ អោយដកលោក យ៉ាន់វិសាក ពីតួនាទីនាយផ្នែករដ្ឋបាលជលផលផាត់សណ្ដាយ និងលោក ហួត ផល នាយសង្កាត់ពាមបាង ព្រមទាំងលោក ព្រំ សុខឿន នាយសង្កាត់កំពង់ស្វាយ មិនបានសោះធ្វើឲ្យប្រជាពលរដ្ឋគិតថាគឺ ដោយសារពួកគេមានលុយសំរាប់បិទមាត់ថ្នាក់លើឬចិញ្ចឹមថ្នាក់លើដូច្នេះហើយទើបថ្នាក់លើមិនដែលរវីរវល់ពីកង្វល់របស់ប្រជាពលរដ្ឋទាល់តែសោះ ។
បើយោងតាមប្រភពពីមន្ត្រីជលផលអធិការដ្ឋានខាងជើងបឹងទន្លេសាប បានអោយដឹងថា ករណីបទល្មើសនេសាទដ៍ច្រើនសន្ធឹកសន្ធាប់ខាងលើ នេះ លោកទទួលស្គាល់ថា ពិតជាមានមែន ប៉ុន្តែលោកបានរាយករណ៍សុំយោបល់ថ្នាក់លើ និងសុំកម្លាំងចូលរួមសហការដើម្បីចុះបង្ក្រាប ប៉ុន្តែមិនមានកិច្ចសហការឡើយ គឺគេគិតតែពីប្រយោជន៍ផ្ទាល់ខ្លួន និងឆ្នាំង បាយរបស់គេប៉ុណ្ណោះ ។
ប្រជាពលរដ្ឋបានអំពាវនាវសំណូមពរដល់អង្គភាពប្រឆាំងអំពើពុករលួយមេត្តា មានវិធានការអោយបានតឹងរ៉ឺង និងចាត់វិធានការតាមច្បាប់ចំពោះមន្ត្រីខិលខូចដើម្បីលុបបំបាត់អំពើពុករលួយកុំឲ្យប៉ះពាល់ដល់កិត្តិយសក្រសួង និងឈ្មោះរបស់លោករដ្ឋមន្ត្រីឡូកឡំក្នុងរឿងសូកប៉ាន់។
បើទោះបីជាថ្មីៗនេះ មានការបង្ក្រាបបទល្មើសនេសាទតិចតួចក៏ដោយ ក៏ ត្រូវប្រជានេសាទតូចតាចរិះគន់ថា នេះគ្រាន់តែជាល្បិចរបស់លោក យ៉ានវិសាក ហៅសែ នាយផ្នែករដ្ឋបាលផាតសណ្ដាយ និងលោក ផល នាយសង្កាត់ជលផល ពាមបាង បញ្ជាឲ្យកូនចៅដើេរវ៉ៃទឹកដើម្បីបង្អើលត្រី អោយចូលទ្រូរបស់ខ្លួនប៉ុណ្ណោះ៕ដោយ៖ណារ៉ា
