ភ្នំពេញ៖ គណបក្សប្រឆាំងនៅថ្ងៃល្ងាចថ្ងៃពុធទី៥ សីហានេះ បានជួបប្រជុំថ្នាក់ដឹកនាំជាន់ខ្ពស់របស់គណបក្សដើម្បីពិភាក្សាស្វែងរកយុទ្ធវិធីទប់ទល់នឹងស្ថានការណ៍នយោបាយដែលឡើងកម្តៅនាពេលចុងក្រោយនេះនិងបន្ទាប់ពីមានការចាប់ខ្លួនសកម្មជនគណបក្សសង្គ្រោះជាតិជាបន្តបន្ទាប់រយះពេល២-៣ថ្ងៃនេះ គឺចំនួន២រូបកំពុងនៅក្នុងតុលា ការ ហើយបីនាក់ផ្សេងទៀតកំពុងត្រូវបានចាប់ខ្លួន។
អ្នកយកព័ត៌មាននយោបាយបានរាយការណ៍ថា គណៈអចិន្ត្រៃយ៍គណ បក្សសង្គ្រោះជាតិប្រមាណជាង១០រូប បានជួបប្រជុំគ្នាជាបន្ទាន់មួយនៅល្ងាចថ្ងៃទី៥ សីហានេះនៅទីស្នាក់ការកណ្តាលគណបក្ស ដើម្បីពិភាក្សា និងវាយតម្លៃអំពីស្ថានការណ៍នយោបាយឡើងកម្តៅចុងក្រោយនេះ។
អ្នកនាំពាក្យគណបក្សសង្គ្រោះជាតិ លោក អូ ចន្ទ័ឫទ្ធិ បានឱ្យដឹងថា របៀបវារៈទូលាយធំមួយគឺស្ថានភាពនយោបាយក្តៅជាមួយនឹងគណ បក្ស កាន់អំណាចរបស់លោកនាយករដ្ឋមន្ត្រី ហ៊ុន សែន។
ប្រភពរាយការណ៍បន្តថា កិច្ចប្រជុំគណៈអចិន្ត្រៃយ៍បន្ទាន់ក្រោមអធិបតី ភាពលោកកឹម សុខា ប្រធានស្តីទីគណបក្សដែលជាអ្នកដឹកនាំប្រជុំនេះ ត្រូវគេដឹងថាបានធ្វើឡើងបន្ទាប់ពីតុលាការក្រុងភ្នំពេញកំពុងនាំខ្លួនសកម្មជនគណបក្សសង្គ្រោះជាតិចំនួនពីររូបផ្សេងទៀតមកពីខណ្ឌទួល គោក និងខណ្ឌឬស្សីកែវ ក្នុងរាជធានីភ្នំពេញ។ ទី១ ឈ្មោះ យន់ លឹមហួរ និងទី២ ឈ្មោះរឿន ចិត្រា។ តុលាការបានចាប់សកម្មជនទាំងពីររូបនេះកាលពីល្ងាចថ្ងៃទី៤សីហា ខណៈដែលតុលាការកំពុងតាមចាប់សកម្មជនគណបក្សសង្គ្រោះជាតិចំនួន៣រូប ផ្សេងទៀត។
តាមដីការចាប់ខ្លួនរបស់តុលាការ សកម្មជនគណបក្សប្រឆាំងទាំង៥រូប នេះជាប់ពាក់ព័ន្ធនឹងការចូលរួមបាតុកម្មខុសច្បាប់កាលពីឆ្នាំ២០១៤ ដើម្បីរំដោះទីលានប្រជាធិបតេយ្យ ៕ដោយ៖បូរ៉ាស៊ី
