បាងកក ៖ ប្រទេសថៃកាលពីថ្ងៃចន្ទបានដកបម្រាមគោចរទូទាំងប្រទេស បន្ទាប់ពីដាក់រយៈពេលជាងពីរខែ ហើយបានអនុញ្ញាតឲ្យភោជនីយដ្ឋាននានាចាប់ផ្តើមលក់ស្រាឡើងវិញ នៅពេលដែលវិបត្តិវីរុសកូរ៉ូណាបានធូរស្បើយចាប់តាំងពីមិនមានករណីឆ្លងរាលដាលក្នុងតំបន់រយៈពេល ២១ ថ្ងៃ។
ប្រទេសអាស៊ីអាគ្នេយ៍ដែលមានប្រជាជនប្រហែល ៧០ លាននាក់មួយនេះគឺជាប្រទេសដំបូងគេនៅក្រៅប្រទេសចិនដែលបានរាយការណ៍អំពីករណីឆ្លងវីរុសនេះកាលពីថ្ងៃទី១៣ ខែមករា ប៉ុន្តែមានករណីឆ្លងត្រឹមតែ៣,១៣៥ករណី និងអ្នកស្លាប់៥៨នាក់ប៉ុណ្ណោះ ខណៈដែលអ្នកជំងឺចំនួន ២,៩៨៧ នាក់បានជាសះស្បើយ។
ក្រុមមន្ត្រីបានធ្វើការសរសើរដល់ប្រជាជនថៃដែលគោរពតាមការគោលការណ៍ពាក់ម៉ាស់ជាសាធារណៈចាប់តាំងពីខែមករាក៏ដូចជាការបិទព្រំដែន ការបិទអាជីវកម្មជាច្រើន និងបម្រាមគោចរសម្រាប់ការថមថយនៃវីរុសថ្មីដែលបានឆ្លងដល់ ៧.៩ លាននាក់នៅទូទាំងពិភពលោក និងបានសម្លាប់មនុស្សជាង ៤៣ ម៉ឺននាក់។
ទន្ទឹមនោះគ្រឹះស្ថានផ្សេងទៀតដែលត្រូវបានអនុញ្ញាតឲ្យបើកឡើងវិញនៅថ្ងៃចន្ទមានដូចជា សាលារៀនជាមួយនឹងចំនួនសិស្សតិចជាង ១២០ នាក់ សាលពិព័រណ៍ ការប្រគុំតន្ត្រី ផលិតកម្មភាពយន្ត សួនកុមារ សួនកម្សាន្ត និងការប្រកួតកីឡាដោយគ្មានអ្នកទស្សនា។
ចំណែកតៀមស្រា បារ៍ និងហាងខារ៉ាអូខេនឹងនៅតែបិទទ្វារដដែល ប៉ុន្តែភោជនីយដ្ឋានដែលបើកដំណើរការវិញកាលពី ២ សប្តាហ៍មុនជាមួយនឹងគម្លាតសង្គមឥឡូវនេះនឹងអាចបម្រើស្រាបាន។
អ្នកនាំពាក្យក្រុមការងារ COVID-19 បាននិយាយថា ករណីថ្មីទាំងអស់ក្នុងរយៈពេល ៣ សប្តាហ៍ចុងក្រោយនេះត្រូវបានរកឃើញថាស្ថិតក្នុងចំណោមអ្នកធ្វើចត្តាឡីស័កនៃប្រជាជនថៃដែលត្រឡប់មកពីបរទេស៕
