បរទេស ៖ អង្គការសុខភាពពិភពលោក (WHO) បាននិយាយថា ជំងឺរាតត្បាតកូវីដ១៩កំពុងស្ថិតក្នុងដំណាក់កាលថ្មីនៃការផ្ទុះឡើងយ៉ាងខ្លាំងបន្ទាប់ពីរកឃើញករណីឆ្លងថ្មីជាង ១៥០,០០០នាក់ នៅថ្ងៃព្រហស្បតិ៍កន្លងទៅ ដែលជាចំនួនខ្ពស់បំផុតក្នុងមួយថ្ងៃ ចាប់តាំងពីការផ្ទុះឡើងដំបូងនាចុងឆ្នាំ២០១៩ ក្នុងទីក្រុងវូហាន ប្រទេសចិន។ នេះបើយោងតាមប្រភពពី CNA។
ប្រធានអង្គការសុខភាពពិភពលោក Tedros Adhanom Ghebreyesus បានប្រាប់សន្និសីទសារព័ត៌មានជាក់ស្តែងពីទីស្នាក់ការកណ្តាលរបស់អង្គការសុខភាពពិភពលោកនៅទីក្រុងហ្សឺណែវថា“ ពិភពលោកកំពុងស្ថិតក្នុងដំណាក់កាលថ្មីនៃគ្រោះថ្នាក់”។ វីរុសនៅតែរាលដាលយ៉ាងឆាប់រហ័ស ហើយមនុស្សភាគច្រើននៅតែងាយរងគ្រោះ។
ចំណែកនាយកអង្គការសុខភាពពិភពលោកប្រចាំតំបន់អឺរ៉ុប លោកវេជ្ជបណ្ឌិត ហាន ក្លាក់ បាននិយាយថា៖ រលកទីពីរនៃការផ្ទុះឡើងជំងឺកូវីដ-១៩ អាចកើតមាននារដូវស្លឹកឈើជ្រុះខាងមុខនេះ។ ដូច្នេះ អ្វីដែលយើងត្រូវធ្វើ គឺត្រូវធ្វើតេស្ដអ្នកសង្ស័យឆ្លងឲ្យបានឆាប់បំផុត និងដាក់ពួកគេដាច់ដោយឡែកតាមដែលអាចធ្វើទៅបាន ហើយប្រសិនបើត្រូវព្យាបាល គឺមិនត្រូវមានការមាក់ងាយ ឬរើសអើងនោះឡើយ។
សូមជម្រាបថា គិតមកដល់ពេលនេះ ជំងឺកូវីដ-១៩ បានរីករាលដាលទៅលើប្រទេស និងដែនដីសរុបចំនួន ២១៣ ជុំវិញពិភពលោក ជាមួយនឹងករណីឆ្លងសរុបចំនួន ៨,៧៥៧,៧៥០នាក់។ ក្នុងនោះស្លាប់ចំនួន ៤៦២,៥១៩នាក់ និងជាសះស្បើយចំនួន ៤,៦២៥,៤៤៩នាក់៕
