អាមេរិក ៖ សហរដ្ឋអាមេរិកនឹងធ្វើការគាំទ្រដល់ប្រទេសនានាដែលពួកគេជឿជាក់ថា ចិនរំលោភអធិបតេយ្យភាពរបស់ពួកគេនៅក្នុងសមុទ្រចិនខាងត្បូង។ នេះបើតាមការបញ្ជាក់របស់រដ្ឋមន្ត្រីការបរទេសអាមេរិចលោក Mike Pompeo កាលពីថ្ងៃពុធដែលបានដកស្រង់ដោយសារព័ត៌មាន CNA។
លោក Pompeo បានប្រាប់អ្នកយកព័ត៌មានថា ពួកយើងនឹងប្រើប្រាស់អ្វីទាំងអស់ដែលពួកយើងមាន និងគាំទ្រដល់ប្រទេសទូទាំងពិភពលោក ដែលបានដឹងថា ចិនរំលោភដែនអធិបតេយ្យស្របច្បាប់របស់ពួកគេ ឬរំលោភដែនទឹកផងដែរ”។ លោកបន្តថា “ពួកយើងនឹងផ្តល់ជំនួយដល់ប្រទេសទាំងនោះ តាមតែពួកយើងអាចធ្វើបានមិនថាក្នុងស្ថាប័នពហុភាគី មិនថាក្នុងអាស៊ាន (ASEAN) មិនថា តាមរយៈការឆ្លើយតបផ្លូវច្បាប់ក៏ដោយ ពួកយើងនឹងប្រើប្រាស់គ្រប់មធ្យោបាយទាំងអស់ដែលពួកយើងអាច”។ លោកចង់សំដៅទៅដល់សមាគមន៍ប្រជាជាតិអាស៊ីអាគ្នេយ៍ (ASEAN)។
រដ្ឋមន្ត្រីការបរទេសអាមេរិករូបនេះបានបញ្ជាក់ថា អាមេរិកនឹងចាត់ទុកការស្វែងរកធនធានធម្មជាតិរបស់ចិន នៅក្នុងដែនទឹកមានជម្លោះថាជារឿងខុសច្បាប់។ មន្ត្រីការទូតជាន់ខ្ពស់អាមេរិកប្រចាំតំបន់អាស៊ីខាងកើត បានព្រមានពីលទ្ធភាពដាក់ទណ្ឌកម្មប្រឆាំងនឹងមន្ត្រីចិន និងក្រុមហ៊ុនដែលជាប់ពាក់ព័ន្ធ នឹងអ្វីដែលក្រុងវ៉ាស៊ីនតោនមើលឃើញថា ជាការបង្ខិតបង្ខំនៅក្នុងសមុទ្រចិនខាងត្បូង។
ជាការឆ្លើយតប កាលពីព្រឹកថ្ងៃពុធ ប្រទេសចិនបាននិយាយថា ខ្លួនមិនខ្លាចការដាក់ទណ្ឌកម្មរបស់សហរដ្ឋអាមេរិកឡើយ លើស្ថានភាពនៅសមុទ្រចិនខាងត្បូង។ ទីក្រុងប៉េកាំងក៏បានចោទប្រកាន់ទីក្រុងវ៉ាស៊ីនតោនថាបានបង្កបញ្ហានិងធ្វើឱ្យមានអស្ថិរភាពនៅក្នុងតំបន់។
ប្រទេសចិនបានទាមទារគ្រប់គ្រងដែនទឹក ៩០ភាគរយនៅក្នុងសមុទ្រចិនខាងត្បូង ប៉ុន្តែប្រ៊ុយណេ ម៉ាឡេស៊ី ភីលីពីន តៃវ៉ាន់ និងវៀតណាមក៏ទាមទារគ្រប់គ្រងចំណែកខ្លះនៅក្នុងដែនទឹកដែលសម្បូរទៅធន់ធានធម្មជាតិនោះដែរ។ទីក្រុងប៉េកាំងបានសាងសង់មូលដ្ឋានគ្រឹះជាច្រើនក្នុងតំបន់ ប៉ុន្តែចិនថា ចេតនារបស់ខ្លួនគឺសន្តិភាព៕
