ភ្នំពេញ៖ លោក សុខ ទូច ប្រធានក្រុមស្រាវជ្រាវព្រំដែនកម្ពុជា នៃរាជបណ្ឌិត្យសភាកម្ពុជា នាព្រឺកអាទិត្យនេះបានអះអាងថា អ្នកដែលផ្ញើសារតាម Facebook គំរាមសម្លាប់លោកទាក់ទងរឿងព្រំដែននោះ គឺជាមនុស្សនៅក្នុងប្រទេស ហើយលោកមិនប្តឹងទេ ទុកឲ្យសមត្ថកិច្ចដោះស្រាយជូនរូបលោក។
លោក សុខ ទូច បានបញ្ជាក់ថា គេបានផ្ញើសារគំរាមខ្ញុំ និងតាមសម្លាប់ខ្ញុំ, គេមានបំណងបំបិទមាត់ខ្ញុំ , ខ្ញុំមិនខ្លាចទេមនុស្សប្រភេទនេះ, ខ្ញុំធ្វើដំណើរទៅមុខសម្រាប់ជាតិ របស់យើងទាំងអស់គ្នា និងប្រវត្តិសាស្ត្រគ្មានអ្វីដែលត្រូវខ្លាច, ខ្ញុំមិនប្តឹងទេ ទុកឲ្យសមត្ថកិច្ចជាអ្នកដោះស្រាយ ប្រសិនបើខ្ញុំប្តឹងវា វាថាខ្ញុំខ្លាចវា។
លោក សុខ ទូច អះអាងថា អ្នកដែលផ្ញើឲ្យមកខ្ញុំនេះវាឧបករណ៍(ស៊ីឈ្នួល)របស់គេទេ សំខាន់អ្នកនៅពីក្រោយខ្នង, គឺអ្នកនៅក្នុងប្រទេសមិនមែនក្រៅទេ។
នៅលើ Facebook របស់លោក សុខ ទូច នាព្រឹកថ្ងៃអាទិត្យនេះ លោកបានសរេសរថា ជនរួមជាតិជាទីគោរពនិងជាទីរាប់អានខ្ញុំ និងធ្វើដំណើរទៅ មុខសម្រាប់ជាតិរបស់យើងទាំងអស់គ្នា និងប្រវត្តិសាស្ត្រគ្មានអ្វីដែលខ្ញុំត្រូវខ្លាចមនុស្សប្រភេទនេះទេ មិនបាច់មកគំរាមមកលើរូបខ្ញុំព្រោះមានប្រជាជនច្រើនណាស់ធ្វើជាសាក្សី។
ជនមិនស្គាល់មុខបានគំរាមបាញ់សម្លាប់ លោក សុខ ទូច តាមរយៈជាសារតាម Facebook មានរូបភាពកាំភ្លើង និងសរសេរអក្សរថា ទុក្ខបាញ់ក្បាល សុខ ទូច អាចបណ្ឌិតខួរឆ្កែ អាបណ្ឌិតកែប្រែប្រវត្តិសាស្ត្រ អាបណ្ឌិតលក់ខួរឲ្យយួន។
លោក សុខ ទូច បានបញ្ជាក់ថា ការគំរាមសម្លាប់នេះតាមខ្លឹមសារគឺទាក់ទងទៅនឹងបញ្ហាព្រំដែន និងបញ្ហាផែនទី ដែលលោកធ្វើសកម្មភាពកន្លងមកនេះ។លោកបន្តថា លោកមិនបានធ្វើអ្វីខុសនោះទេ លោកគ្រាន់ តែធ្វើទៅតាមប្រវត្តិសាស្ត្រតែប៉ុណ្ណោះ៕
