ភ្នំពេញ៖ សាលាឧទ្ធរណ៍នឹងបើកសវនាការជំនុំជម្រះនៅព្រឹកថ្ងៃទី២ ខែ កញ្ញា ឆ្នាំ២០១៥ នាដើមសប្តាហ៍ក្រោយនេះ លើបណ្តឹងឧទ្ធរណ៍ទាក់ទងនឹងដីកាសម្រេចឃុំខ្លួន លោក ហុង សុខហួរ សមាជិកព្រឹទ្ធសភាមកពីគណបក្ស សម រង្ស៊ី ដែលធ្វើឡើងដោយ សាលាដំបូងរាជធានីភ្នំពេញ។
សមាជិកព្រឹទ្ធសភា ហុង សុខហួរ ត្រូវបានសមត្ថកិច្ចគរបាលក្រសួង មហាផ្ទៃចាប់ខ្លួនចេញពីផ្ទះសមាជិករដ្ឋសភាបក្សជំទាស់មួយរូប នៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងបញ្ជូនភ្លាមៗទៅ កាន់សាលាដំបូងរាជធានីភ្នំពេញទាំងនៅមានអភ័យឯកសិទ្ធិ ជាសមាជិកព្រឹទ្ធសភា កាលពីវេលាម៉ោង០៦:១៥ព្រឹក ថ្ងៃទី១៥ ខែសីហា ឆ្នាំ២០១៥ ពាក់ព័ន្ធការក្លែងឯកសារសន្ធិសញ្ញាកម្ពុជា វៀតណាមនៅឆ្នាំ១៩៧៩។
មេធាវីការពារគឺលោក ជូង ជូងី បានប្រាប់នៅថ្ងៃអាទិត្យនេះថា ការចោទ ប្រកាន់ការចាប់ខ្លួន និងការឃុំខ្លួនកូនក្តីលោកឈ្មោះ ហុង សុខហួរ លោក ថាធ្វើឡើងខុសនីតិវិធី ជាកត្តាជំរុញឲ្យលោកសម្រេចប្តឹងប្រឆាំងទៅនឹងដីកាសម្រេចរបស់សាលាដំបូងនេះ ហើយលោកសង្ឃឹមថា កូនក្តីលោកនឹងមានសេរីភាពវិញ បើចៅក្រុមសាលាឧទ្ធរណ៍កាត់ក្តីសំនុំរឿងនេះ ឈរ លើគោលការណ៍អព្យាក្រឹត្យ និងឯករាជ្យ។
ភរិយាលោក ហុង សុខហួរ គឺលោកស្រី គុណ លំអង បានអំពាវនាវឲ្យតុលាការកាត់ក្តីប្រកបដោយយុត្តិធម៌ មិនត្រូវរងសម្ពាធនយោបាយ ដើម្បីលុបបំបាត់និទណ្ធភាពនៅកម្ពុជា។
លោកស្រីបន្តថា ស្វាមីរបស់គាត់មិនបានប្រព្រឹត្តកំហុស ដូចការចោទ ប្រកាន់ឡើយ ដែលលោកស្រីយល់ថា លោក ហុង សុខហួរ គ្រាន់តែសម្តែងមតិក្នុងនាមជាសមាជិកព្រឹទ្ធសភាដើម្បីប្រយោជន៍ជាតិប៉ុណ្ណោះ។
សូមរំលឹកថា សមាជិកព្រឹទ្ធសភា ហុង សុខហួរ ត្រូវបានសាលាដំបូងរាជ ធានីភ្នំពេញ ចោទប្រកាន់ចំនួន៣បទល្មើសគឺ ការក្លែងឯកសារសាធា រណៈ ការប្រើប្រាស់ឯកសារក្លែងក្លាយ និងញុះញង់ឲ្យមានបទល្មើស។តាមបទចោទនេះលោក ហុង សុខហួរ អាចប្រឈមនឹងការជាប់ពន្ធនា គារពី៥ទៅ១០ឆ្នាំ៕ដោយ៖ខេមរា
