ជប៉ុន ៖ យានអវកាសរបស់អារ៉ាប់រួម បាននឹងកំពុងធ្វើដំណើរឆ្ពោះទៅភពអង្គារហើយ ក្រោយបាញ់បង្ហោះចេញពីកោះ Tanegashima ប្រទេសជប៉ុន នាព្រឹកថ្ងៃទី២០ ខែកក្កដា ឆ្នាំ២០២០។ នេះជាបេសកកម្មរុករកភពដំបូងហើយ របស់ពិភពអារ៉ាប់។ នេះបើយោងតាមសារព័ត៌មានចិន CGTN។
យានអវកាសដែលមានឈ្មោះថា «Amal ឬ HOPE» គ្រោងនឹងធ្វើដំណើររយៈពេល ៧ខែ ចម្ងាយ ៥០០លានគីឡូម៉ែត្រ ដើម្បីទៅដល់ភពអង្គារ ពោលគឺរំពឹងថានឹងទៅដល់ក្នុងអំឡុងខែកុម្ភៈ ឆ្នាំ២០២១ ដែលត្រូវជាខួប ៥០ឆ្នាំនៃការបង្កើតប្រទេស។
យាន HOPE ត្រូវបានបាញ់បង្ហោះតាមរយៈគ្រាប់រ៉ុកកែត H-IIA F42 របស់ក្រុមហ៊ុនជប៉ុន Mitsubishi។ ដើមឡើយបេសកកម្មនេះ គ្រោងបាញ់បង្ហោះតាំងពីថ្ងៃទី១៤កក្កដា ប៉ុន្តែត្រូវពន្យារពេលមកដល់ថ្ងៃនេះ ដោយសារបញ្ហាអាកាសធាតុ។
យ៉ាងណាមិញ យានអវកាសនេះ នឹងមិនចុះចតលើផ្ទៃដីភពអង្គារឡើយ ដោយគ្រាន់តែនៅលើគន្លងប៉ុណ្ណោះ ក្នុងរយៈពេលមួយឆ្នាំភពអង្គារ ឬស្មើនឹង ៦៨៧ថ្ងៃ។ បេសកកម្មរបស់វា គឺដើម្បីផ្តិតយករូបភាពអាកាសធាតុ បរិយាកាសភពអង្គារ ដើម្បីក្លាយជាមូលដ្ឋានស្រាវជ្រាវបន្ថែមក្នុងការបញ្ជូនមនុស្សទៅភពនោះ ក្នុងរយៈពេល ១០០ឆ្នាំក្រោយ។ អារ៉ាប់រួម ក៏ចង់ឱ្យគម្រោងនេះ ក្លាយជាប្រភពជំរុញយុវជនអារ៉ាប់ផងដែរ៕
