កម្ពុជា​នឹងធ្វើ​ពិធី​រាប់​ថយក្រោយ​១០០០​ថ្ងៃ​ឆ្ពោះទៅ​ស៊ី​ហ្គេម​ឆ្នាំ​២០២៣​នៅ​ថ្ងៃ​សុក្រ​ចុង​សប្ដាហ៍​នេះ
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 4 August, 2020 ក+ ក-

ភ្នំពេញ ៖ គណៈកម្មាធិការ​ជាតិ​រៀបចំ​ការប្រកួត​កីឡា​អាស៊ីអាគ្នេយ៍ (SEA Games) លើក​ទី​៣២ ឆ្នាំ​២០២៣ (CAMSOC) បានកំណត់​យក​ថ្ងៃទី​០៧ ខែសីហា ឆ្នាំ​២០២០ ខាងមុខនេះ ដើម្បី​ប្រារព្ធ​កម្មវិធី​ដ៏​ធំ​មួយ​ស្តីពី​ការប្រកាស​ពានរង្វាន់​ជូន​ជ័យលាភី​ស្លាក​សញ្ញា​-​និមិត្តសញ្ញា ស៊ី​ហ្គេម លើក​ទី​៣២ ឆ្នាំ​២០២៣ និង អាស៊ាន​ប៉ា​រ៉ា​ហ្គេម លើក​ទី​១២ ឆ្នាំ​២០២៣ បូករួម​ជាមួយ​ពិធី​រាប់​ថយក្រោយ ១០០០​ថ្ងៃ ឆ្ពោះទៅ​ស៊ី​ហ្គេម ឆ្នាំ​២០២៣ ដោយ​គ្រោង​នឹងធ្វើ​ឡើង​នៅ​ពហុ​កីឡដ្ឋាន​ជាតិ​មរតក​តេ​ជោ ខណ្ឌ​ជ្រោយចង្វារ រាជធានី​ភ្នំពេញ​។

​តាម​ការគ្រោងទុក​ពិធី​នេះ​នឹងត្រូវ​ធ្វើឡើង នា​វេលា​ម៉ោង ៥​ល្ងាច ថ្ងៃទី​០៧ ខែសីហា ឆ្នាំ​២០២០ ក្រោម​អធិបតីភាព​ដ៏​ខ្ពង់ខ្ពស់​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​ជា​ប្រធាន CAMSOC​។​

​គួរ​បញ្ជាក់ថា ស៊ី​ហ្គេម លើក​ទី​៣២ ដែល​កម្ពុជា​នឹងធ្វើ​ម្ចាស់ផ្ទះ​លើកដំបូង គ្រោង​នឹង​បើក​ការប្រកួត​នៅ​ថ្ងៃទី​០៥ ខែសីហា និង​បញ្ចប់​នៅ​ថ្ងៃទី​១៦ ខែសីហា ឆ្នាំ​២០២៣​។ ហើយ​បន្ទាប់ពី​ចប់​ការប្រកួត​ស៊ី​ហ្គេម​ជាង ១០​ថ្ងៃ ព្រឹត្តិការណ៍​កីឡា​ជនពិការ​ប្រចាំ​តំបន់ ដែល​ហៅថា អាស៊ាន​ប៉ា​រ៉ា​ហ្គេម លើក​ទី​១២ នឹង​ចាប់ផ្ដើម​ការប្រកួត​បន្ដ ដោយ​គ្រោង​ធ្វើ​ពីថ្ងៃ​ទី​០១ ដល់​ថ្ងៃទី​១០ ខែមិថុនា ឆ្នាំ​២០២៣៕