រុស្ស៊ី-ស៊ីរី ៖ អ្នកនាំពាក្យប្រធានាធិបតីរុស្ស៊ី Dmitry Peskov និយាយថា លោក អាសាដ មកធ្វើទស្សនកិច្ចការងារនៅក្រុងមូស្គូ ដោយបានចាប់ផ្ដើមពិភាក្សាជាមួយលោក ពូទីន កាលពីល្ងាចថ្ងៃអង្គារម្សិលមិញ។នេះជាទស្សនកិច្ចមិនបានប្រកាសជាសាធារណៈរបស់ប្រធានាធិបតីប្រទេសស៊ីរីលោក Bashar al-Assad និងលោក Vladimir Putin នៅក្រុងមូស្គូដើម្បីពិភាក្សារវាងសមភាគីដែលគ្មានការគ្រោងទុកជាមុន។
តាម BBC បានឲ្យដឹងថា កងទ័ពអាកាសរុស្ស៊ីបានចាប់ផ្ដើមវាយប្រហារ លើពួកសកម្មប្រយុទ្ធស៊ីរីតាំងពីខែមុន។ ក្រុងម៉ូស្គូបានទទួលស្គាល់ថា ខ្លួនកំពុងវាយប្រហារលើពួកសកម្មប្រយុទ្ធរដ្ឋឥស្លាម និងពួកសកម្មប្រយុទ្ធដទៃទៀត ដែលប្រឆាំងរដ្ឋាភិបាលអាសាដ។
ប្រភបន្តថា មេដឹកនាំទាំង២បានពិភាក្សាគ្នាអំពីយុទ្ធសាស្ត្រវាយប្រហារពួកភេរវកម្ម និងការបន្តវាយប្រហាររបស់ទ័ពអាកាសរុស្ស៊ី លើពួកសកម្មប្រយុទ្ធ និងវត្តមានកងទ័ពរុស្ស៊ី។
គួរបញ្ជាក់ថា ទស្សនកិច្ចរបស់លោកអាសាដ នៅក្រុងមូស្គូ គឺជាទស្សនកិច្ចលើកដំបូងចាប់តាំងពីប្រទេសស៊ីរី ធ្លាក់ចូលក្នុងសង្គ្រាមស៊ីវិល ចាប់តាំងពីឆ្នាំ២០១១មក។
អ្នកវិភាគ Jonathan Marcus នៃបណ្ដាញផ្សាយព័ត៌មាន BBC ពិនិត្យឃើញថា ទស្សនកិច្ចដ៏ភ្ញាក់ផ្អើលរបស់លោកអាសាដនៅក្រុងមូស្គូ បានបង្ហាញពីសញ្ញានៃការបន្តទំនុកចិត្តកាន់តែរឺងមាំថែមទៀតរបស់ក្រុងមូស្គូ ចំពោះប្រធានាធិបតីស៊ីរី ដែលប្រឈមមុខនឹងការផ្ដួលរំលំពីអំណាច៕ ប្រភព : BBC
ជំនួបគ្នារវាងប្រធានាធិបតីរុស្ស៊ី Vladimir Putin និងលោកប្រធានាធិបតីស៊ីរី Bashar al-Assad នៅទីក្រុងមូស្គូ (រូបថត៖ BBC)
