ភ្នំពេញ: តំណាងរាស្ត្រគណបក្សសង្គ្រោះជាតិពីររូប នៅព្រឹកថ្ងៃចន្ទទី ២៦ តុលានេះ បានរងរបួសក្បាល និងរថយន្តត្រូវបានវាយកម្ទេចដោយមនុស្សមួយក្រុមក្នុងហេតុការណ៍ផ្ទុះហិង្សាពីសំណាក់ក្រុមបាតុករដែលតវ៉ានៅមុខរដ្ឋសភា ទាមទារឲ្យដកតំណែងលោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១ នៃ រដ្ឋសភា។
អ្នករាយការណ៍ព័ត៌មាន បានឲ្យដឹងថា ប្រជាពលរដ្ឋរាជធានីភ្នំពេញរាប់ពាន់នាក់ បានធ្វើបាតុកម្ម និងដាក់ញតិទៅកាន់រដ្ឋសភា ដើម្បីឲ្យដកតំណែង លោក កឹម សុខា ដោយពួកគាត់ចោទប្រកាន់ថាលោក កឹម សុខា ជា”មនុស្សបោកប្រាស់ ក្រឡេចក្រឡុក និងជាអ្នកដែលនាំទុក្ខដល់ប្រជាពលរដ្ឋ” ។
លុះនៅម៉ោងជិត១២ថ្ងៃត្រង់ ពេលលោក ញ៉ ចំរើន និងតំណាងរាស្ត្រមួយរូបទៀត គឺលោក គង់ សភា ជាតំណាងរាស្ត្រមណ្ឌលស្វាយរៀងចេញពីប្រជុំសភាតាមទ្វារក្រោយ ស្រាប់តែមានហិង្សាកើតឡើង។នេះបើតាមការអះអាងរបស់តំណាងរាស្ត្រមណ្ឌលកំពង់ចាម គណបក្សសង្គ្រោះជាតិ លោក ញ៉យ ចំរើន។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានចាត់ទុកហិង្សាដែលបណ្តាលឲ្យតំណាងរាស្ត្រគណបក្សសង្គ្រោះជាតិ ពីររូបរងរបួសជា”រឿងនឹកស្មានមិនដល់” ហើយថាបាតុកម្មប្រឆាំងលោក កឹម សុខា មិនបានសុំការអនុញ្ញាតពីសាលារាជធានីនោះទេ។
លោកបន្ថែមថានៅពេលបាតុកម្មកើតឡើង សាលារាជធានីបានហៅតំណាងដឹកនាំបាតុកម្មមកសាកសួរនៅម៉ោងប្រមាណ៩និង៣០នាទី ហើយពួកគេសន្យាថានឹងរំសាយនៅម៉ោង១០និង៣០នាទី។ លោកមានប្រសាសន៍ថា៖ “បាតុកម្មបានរំសាយនៅម៉ោង១០និង៣០នាទី ខ្ញុំអត់យល់ដែរថាមានមូលហេតុអីបានជាហិង្សាកើតឡើង។ លោកបន្តថា៖ “យើងកំពុងតែស៊ើបអង្កេតរកជនដៃដល់ ថាតើវាជាក្រុមបាតុករ ឬក៏អ្នកមានគំនុំផ្ទាល់ខ្លួន”។
លោក ឡុង ឌីម៉ង់ បានបន្ថែមថា៖ “ក្រុមអ្នកតំណាងដឹកនាំបាតុកម្មគឺជាប្រជាពលរដ្ឋសុទ្ធសាធ មិនមែនតំណាងអង្គការណាមួយនោះទេ”។ លោកបន្តថាអាជ្ញាធរនឹងតាមដានករណីនេះ ដើម្បីទប់ស្កាត់កុំឲ្យមានបញ្ហាអ្វីកើតឡើងបន្តទៀត។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកមិនបានដឹងថាក្រុមបាតុករនោះដឹកនាំដោយអ្នកណានោះទេ តែលោកថា ជាការតវ៉ារបស់ប្រជាពលរដ្ឋ និងមន្ត្រីរាជការមួយចំនួនផង ដែលលោកថា ពួកគេមានការភ្ញាក់រឭក និងមិនពេញចិត្តចំពោះទង្វើរបស់លោក កឹម សុខា។
បន្ទាប់ពីការជួបជុំតវ៉ានៅមុខរដ្ឋសភារួចមក ក្រុមបាតុករក៏បានបន្តប្រមូលផ្តុំលើកបដាស្រែកមេក្រូស្រែកចំអករិះគន់នៅមុខផ្ទះរបស់លោក កឹម សុខា នៅផ្ទះលេខ៩៧ ផ្លូវ ៣១៣សង្កាត់បឹងកក់២ ខណ្ឌទួលគោក រាជធានីភ្នំពេញ ផងដែរ៕ដោយ៖ខេមរា
ហ្វូងបាតុករនៅមខលំនៅឋានលោក កឹម សុខា អនុប្រធានគណបក្សសង្គ្រោះជាតិ
