ខេត្តកំពង់ចាម: លោកឧកញ៉ា លឹម ប៊ុណ្ណា ហៅខ្នា ត្រូវគេដឹងថាជាមេឈ្មួញរកស៊ីឈើដ៏ធំមួយ រួមនិងមេការជើងខ្លាំងនាក់គឺឈ្មោះ សាន ចយ និងឈ្មោះឈឹម ធារី មានជំនាញខាងដើរសូកប៉ាន់ស្ថាប័នពាក់ពន្ធ័ ដើម្បីឲ្យការរកស៊ីរបស់លោកលឹម ប៊ុណ្ណា ប្រព្រឹត្តទៅបានដោយរលូន ព្រោះបើសិនជាមិនឲ្យលុយមុនទេច្បាស់ជាទៅមិនរួចឡើយ ។
សេក្តីរាយការណ៍ពីខេត្តកំពង់ចាមបានឲ្យដឹងថា ច្រើនឆ្នាំមកហើយដែលក្រៅពីឈ្មោះសាន ចយ គឺមេឈ្មួញឧកញ៉ាលឹម ប៊ុណ្ណា ហៅខ្នា បានឲ្យប្អូនប្រុសបង្កើតម្នាក់ឈ្មោះ ឈឹម ធារី ម្នាក់ទៀតជាអ្នករត់ការបើកផ្លូវឲ្យរថយន្តដឹកជញ្ជូនឈើប្រណីតឆ្លងកាត់ខេត្តកំពង់ចាម និងខេត្តត្បូងឃ្មុំទៅលក់នៅស្រុកយួនតាមច្រកព្រំដែន និងច្រករបៀងនៅក្នុងស្រុកមេមត់។ ប្រភពបន្តថា ពួកគេមានទំនាក់ទំនងយ៉ាងជិតស្និទ្ធជាមួយមន្ត្រីយោធាដ៏មានអំណាចកំពូលម្នាក់ដែលពុំមាននរណាហ៊ានប៉ះឡើយទើបមេឈ្មួញរូបនេះហ៊ានជាន់ឈ្លីបទបញ្ជាលេខ០០២របស់សម្តេចតេជោ ហ៊ុន សែន យ៉ាងគឃ្លើនបែបនេះ ។
អ្នករកស៊ីឈើរូបនេះបានល្បីឈ្មោះពេញខេត្តត្បូងឃ្មុំ និងខេត្តកំពង់ចាម ព្រោះសកម្មភាពដឹកជញ្ជូនឈើប្រណីតឆ្លងកាត់ខេត្តកំពង់ចាម និងខេត្តត្បូងឃ្មុំនៅតែបន្តកើតទ្បើងយ៉ាងអនាធិបតេយ្យទាំងយប់ទាំងថ្ងៃ។ ចំណែកឈ្មោះ ឈឹម ធារី បានធ្វើជាអ្នករត់ការបើកផ្លូវសម្រាប់រថយន្តដឹកជញ្ជូនឈើប្រណីតទៅលក់នៅស្រុកយួនយ៉ាងរលូនព្រោះសមត្ថកិច្ចជំនាញមួយចំនួនក្នុងខេត្តកំពង់ចាម និងខេត្តត្បូងឃ្មុំកំពុងប្រព្រឹត្តអំពើពុករលួយយ៉ាងងុបងុល។
ប្រភពព័ត៌មានបានឲ្យដឹងទៀតថា មេការម្នាក់ទៀតឈ្មោះ សាន ចយ ក៏ជាមនុស្សពូកែរត់ ផ្លួវយ៉ាងស្ទាត់ជំនាញឲ្យលោកលឹម ប៊ុណ្ណា ដែរ ។
ប្រភពមួយផ្សេងទៀតបានឲ្យដឹងថា បទល្មើសដឹកឈើសព្វថ្ងៃនេះសុទ្ធតែបង់លុយឲ្យមន្ត្រីពុករលួយក្នុងខេត្តកំពង់ចាម និងខេត្តត្បូងឃ្មុំ ព្រមទាំងសមត្ថកិច្ចពាក់ព័ន្ធពីគ្រប់ស្ថាប័នមួយចំនួនទៀតមិនហ៊ានមើលរំលងឡើយ ។
ដោយសារការមិនអើពើបង្ក្រាបចំពោះបទល្មើសព្រៃឈើបែបនេះហើយ ទើបគេសង្ស័យថាលោក លន់ លឹមថៃ អភិបាលខេត្តកំពង់ចាមក៏ដូចជាលោកប្រាជ្ញ ច័ន្ទ ដែលជាអភិបាលខេត្តត្បូងឃ្មុំព្រមទាំងសមត្ថកិច្ចពាក់ព័ន្ធនៃខេត្តទាំងពីរសុទ្ធតែទទួលបានផលប្រយោជន៍ពីឈ្មួញឈើ លឹម ប៊ុណ្ណា ហៅខ្នា ។
មិនអាចទាក់ទងសុំការពន្យល់ចំពោះការរិះគន់ដូចខាងលើពីមន្ត្រីពាក់ព័ន្ធបានទេកាលពីរសៀលថ្ងៃទី១៩កញ្ញានេះ។មេគង្គប៉ុស្តិ៍ រង់ចាំការឆ្លើយតបជាវិជ្ជមាន និងរៀបចំផ្សាយជូនដោយក្តីរីករាយ៕
