មីយ៉ាន់ម៉ា៖ទោះបីជាលទ្ធផលនៃការបោះឆ្នោតសភាកាលពីថ្ងៃអាទិត្យ ទី៨ វិច្ឆិកានៅមិនទាន់បានប្រកាសជាផ្លូវការនៅឡើយ តែលទ្ធផលបណ្តោះអាសន្នដែលកំពុងធ្លាក់មកជាបណ្តើរៗបានផ្តល់ជោគជ័យ យ៉ាងធំធេងចំពោះគណបក្សប្រឆាំងរបស់លោកស្រី អ៊ុង សានស៊ូជី គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យ។ លោកស្រីអ៊ុង សានស៊ូជីផ្ទាល់ខ្លួនបានបញ្ជាក់ថា គណបក្សរបស់លោកស្រីទទួលបានដល់ទៅ ៨២% នៃអសនៈនៅក្នុងរដ្ឋសភា និងថា ជ័យជំនះរបស់គណបក្សប្រឆាំង គឺបានលេចរូបរាងកាន់តែច្បាស់ក្រឡែត។
នៅថ្ងៃពុធ ទី១១ វិច្ឆិកា ម្សិលមិញនេះ លោកស្រីអ៊ុង សានស៊ូជីបានអំពាវនាវឲ្យមានជំនួបជាមួយលោកប្រធានាធិបតី ថេន សេន លោកប្រធានរដ្ឋសភា ស្វេ ម៉ាន់ និងមេបញ្ជាការកងទ័ពលោក មីន អ៊ុងឡេង។
តាមរយៈលិខិតចំហមួយដែលលោកស្រីប្រមុខបក្សប្រឆាំងអ៊ុង សានស៊ូជីបានស្នើឲ្យមានជំនួបជាមួយលោកប្រធានាធិបតីថេន សេន លោកប្រធានរដ្ឋសភាស្វេ ម៉ាន និងមេបញ្ជាការកងទ័ពឧត្តមសេនីយមីន អ៊ុងឡេង។ លោកស្រីអ៊ុង សានស៊ូជីបានសុំជួបសន្ទនាជាមួយឥស្សរជនទាំង ៣រូបនៅសប្តាហ៍ក្រោយដើម្បីនិយាយពីការផ្សះផ្សា។ ជាការឆ្លើយតបវិញភ្លាមៗក្នុងថ្ងៃនេះ លោកថេន សេនបានយល់ព្រមជួបមួយទល់មួយជាមួយលោកស្រីអ៊ុង សានស៊ូជី តែគេត្រូវរង់ចាំការប្រកាសលទ្ធផលបោះឆ្នោតជាផ្លូវការ។ ទោះបីយ៉ាងនេះក្តី នៅមិនទាន់មានចម្លើយយ៉ាងណាពីលោកប្រធានរដ្ឋសភា ស្វេ ម៉ាន់ និងឧត្តមសេនីយ មីន អ៊ុងឡេង៕
