ភ្នំពេញ: តុលាការក្រុងភ្នំពេញ នៅថ្ងៃទី១៣ ខែវិច្ឆិកានេះ បានចេញដីកាបង្គាប់ឲ្យចាប់ខ្លួនលោក សម រង្ស៊ី ប្រធានគណបក្សសង្គ្រោះជាតិ ដើម្បយកមកអនុវត្តទោសដាក់ពន្ធនាគារ ពាក់ព័ន្ធករណីបរិហាកេរ្តិ៍ជាសាធារណៈ និងញុះញង់ឲ្យមានការរើសអើង ដែលបានប្រព្រឹត្តិកាលពីថ្ងៃទី១៧ ខែមេសា ឆ្នាំ២០០៨ នៅសារមន្ទីរជើងឯក។
ការចេញដីកាបង្គាប់ឲ្យចាប់ខ្លួននេះ ខណៈដែលលោក សម រង្ស៊ី កំពុងតែស្ថិតនៅក្រៅប្រទេស។
ក្នុងដីកាបង្គាប់ឲ្យចាប់ខ្លួនដែលចុះហត្ថលេខាដោយលោក ស៊ឺ វណ្ណនី តំណាងអយ្យការអមសាលាដំបូងរាជធានីភ្នំពេញ បានបញ្ជាក់ថា លោក សម រង្ស៊ី ជាប់ចោទក្នុងសំណុំរឿងក្តីជាមួយនឹងលោកហោណាំហុង រដ្ឋមន្ត្រីការបរទេស កាលពីឆ្នាំ២០០៨។ គ្រានោះគឺលោកសម រង្ស៊ី លើកឡើងថា លោក ហោ ណាំហុង ជាប្រធានគុកបឹងត្របែក នៅសម័យខ្មែរក្រហម។ សំណុំរឿងក្តីនោះ ត្រូវបានតុលាការសម្រេចផ្តន្ទាទោសលោក សម រង្ស៊ី ដាក់ពន្ធនាគារ ២ ឆ្នាំ និងពិន័យជាប្រាក់ ៨ លានរៀល៕ ដោយ៖រដ្ឋា
