ក្រុងប៉ារីស៖ ការផ្ទុះឡើងនូវអំពើភេរវកម្មដ៏សាហាវ និងធ្ងន់ធ្ងរដែលមិនធ្លាប់មានក្នុងប្រវត្តិសាស្ត្រប្រទេសបារាំងបានកើតមានឡើងនៅទីកន្លែង៦ ផ្សេងៗគ្នា និងក្នុងពេលតែមួយ គឺនៅវេលាម៉ោងប្រហែលជា៩ និង៣០នាទី យប់ថ្ងៃសុក្រ ទី១៣ វិច្ឆិកា។
ក្នុងសោកនាដកម្មគួរឲ្យរន្ធត់នេះ មានភោជនីយដ្ឋានខ្មែរមួយកន្លែង ឈ្មោះ Le Petit Cambodge ដែលស្ថិតក្នុងសង្កាត់ទី១១ ក្រុងប៉ារីស គឺជាទីប្រជុំជន ដែលសំបូរមនុស្សម្នាច្រើនអ៊ូរអរ ហើយដែលភ្ញៀវភាគច្រើន ជាជនជាតិបារាំងបានរងការបាញ់ប្រហារ។ នៅក្នុងភោជនីយដ្ឋាននេះ និងភោជនីយដ្ឋានមួយទៀតនៅទល់មុខគ្នានោះ មានអ្នកស្លាប់ប្រហែលជា ១២ ទៅ ១៤ នាក់ ហើយបើតាមការស្មានជាជំហានដំបូង គឺមិនមានប្រជាជនខ្មែររងគ្រោះក្នុងហេតុការណ៍នេះទេ។
ព្រឹក ថ្ងៃសៅរ៍ ទី១៤ វិច្ឆិកា មនុស្សម្នាចាប់ផ្តើមមកកកកុញ នៅខាងមុខភោជនីយដ្ឋាន Le Petit Cambodge បន្ទាប់ពីបានទទួលដំណឹងថា ទីនេះ ជាទីកន្លែងកើតហេតុបាញ់រះ សម្លាប់មនុស្ស កាលពីយប់ថ្ងៃសុក្រ។ ស្នាមឈាម មាននៅពាសពេញ ខាងមុខភោជនីយដ្ឋាន លើចិញ្ចើមថ្នល់។ នៅទល់មុខភោជនីយដ្ឋានខ្មែរនេះ មានភោជនីយដ្ឋានបារាំងមួយទៀត ឈ្មោះ Le Carillon ក៏បានរងគ្រោះក្នុងហេតុការណ៍ភេរវកម្មនេះដែរ។ ដូចគ្នា និងភោជនីយដ្ឋានខ្មែរ គឺមានស្នាមឈាមពាសពេញ លើចិញ្ចើមផ្លូវមុខហាង។ នៅលើកញ្ចក់ និងជញ្ជាំងអាគារ គេឃើញមានស្នាមគ្រាប់កាំភ្លើងជាច្រើនគ្រាប់ផងដែរ៕ដោយ៖នូរ៉ា
ភោជនីយដ្ឋានខ្មែរ Le Petit Cambodge នៅព្រឹកថ្ងៃបន្ទាប់ នៃភេរវកម្មបាញ់រះសម្លាប់មនុស្ស
