ភ្នំពេញ៖ លោក សម រង្ស៊ី នឹងវិលត្រលប់មកដល់ភ្នំពេញវិញនៅម៉ោង ១០ យប់ ថ្ងៃទី១៦ ខែវិច្ឆិកា ឆ្នាំ២០១៥ នេះ ហើយលោកនឹងប្រគល់ខ្លួនឲ្យប៉ូលិសដែលត្រៀមអនុវត្តតាមដីការបស់តុលាការ។ប៉ុន្តែលោកបាន និងកំពុងទាក់ទងជាមួយសម្តេចក្រឡាហោម ស ខេង ។ នេះបើតាមកាបញ្ជាក់របស់លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ។
វិទ្យុអាស៊ីសេរី នាយប់ថ្ងៃអាទិត្យ ទី១៥ ខែវិច្ឆិកា នេះ បានដកស្រង់សំដីលោក អេង ឆៃអ៊ាង ឲ្យដឹងថា តាមការគ្រោងទុកលោក សម រង្ស៊ី គ្រោងនឹងវិលត្រលប់មកពីប្រទេសកូរ៉េខាង ត្បូងតាមជើងយន្តហោះដែលចុះចតនៅខេត្តសៀមរាប។ ក៏ប៉ុន្តែដោយសារតែជើងហោះហើរពីកូរ៉េទៅកាន់ខេត្តសៀមរាបនោះ ត្រូវលប់ចោលវិញ ទើបលោក សម រង្ស៊ី ប្តូរជើងហោះហើរត្រង់មករាជធានីភ្នំពេញតែម្តង។
គួរជម្រាបថា ម្សិលមិញនេះ បន្ទាប់ពីតុលាការក្រុងភ្នំពេញបានចេញដីកាចាប់ខ្លួនលោក សម រង្ស៊ី ប្រធានគណបក្សសង្គ្រោះជាតិរួចមក លោក សម រង្ស៊ី ដែលកំពុងធ្វើទេសចរណ៍កៀងគរប្រជាប្រីយភាពនៅបរទេស បានថ្លែងប្រាប់ពលករខ្មែរដែលធ្វើការនៅកូរ៉េខាង ត្បូងថា លោកមិនខ្លាចការចាប់ខ្លួនទេ ចង់យកលោកទៅធ្វើអីក៏ធ្វើទៅ ! ។
ទោះបីជាមានការអះអាងជាផ្លូវការថា មិនខ្លាចចំពោះការចាប់ខ្លួនតាមអំណាចដីកាតុលា ការយ៉ាងណាក៏ដោយ ក៏លោក អេង ឆៃអ៊ាង បានឲ្យដឹងថា លោក សម រង្ស៊ី បានផ្ញើសារទៅកាន់ក្រុមអ្នកគាំទ្រលោកនៅព្រឹកថ្ងៃអាទិត្យទី ១៥ ខែវិច្ឆិកា ឆ្នាំ២០១៥ នេះថា កុំឲ្យមាន ការប្រមូលផ្តុំតវ៉ាប្រឆាំងនឹងការចាប់ខ្លួនរូបលោក ព្រោះខ្លាចកើតមានអំពើហិង្សាណាមួយ។
ស្របគ្នានេះលោក សម រង្ស៊ី ក៏បានព្យាយាមទាក់ទងទៅកាន់សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមមតិភាគច្រើននៅរដ្ឋសភា ព្រម ទាំងជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដើម្បីបញ្ជាក់ថា លោកព្រមប្រគល់ខ្លួនដល់សមត្ថកិច្ចប៉ូលិសខណៈលោកមកដល់ភ្នំពេញ។ប៉ុន្តែអ្នកវិភាគបានគិតថា ការជួបគ្នាជាមួយលោក ស ខេង នៅមុនពេលលោក សម រង្ស៊ី មកដល់ភ្នំពេញពិតជាមាន ការពិភាក្សាគ្នាច្រើនជាងនេះ ពិសេសគឺទាក់ទិននឹងដីកាចាប់ខ្លួនតែម្តង។
គួរបញ្ជាក់ថា រហូតមកដល់ព្រលប់ថ្ងៃទី ១៥ ខែវិច្ឆិកា នេះ គ្មានអ្នកវិភាគឯករាជ្យណាម្នាក់បានបង្ហាញពីការទស្សន៍ទាយរបស់ខ្លូនដើម្បីបញ្ជាក់ដល់មជ្ឈដ្ឋានទូទៅដែលកំពុងទន្ទឹង រង់ចាំនូវព័ត៌មានជាក់លាក់ដែលថា តើលោក សម រង្ស៊ី នឹងវិលមកប្រទេសកម្ពុជាវិញដែរឬយ៉ាងណា ? តើនឹងមានអ្វីកើតឡើងនៅក្រោយពេលដែលលោក សម រង្ស៊ី មកដល់រាជធា នីភ្នំពេញ បើសិនជាលោក សម រង្ស៊ី នៅតែរឹងរូសមិនប្រើវប្បធម៌សន្ទនា៕ដោយ៖ផានូរ៉ាត់
