ជនជាតិចិនមួយក្រុមនៅក្នុងក្រុមហ៊ុន ខេមបូឌានបាណាណា ហៅតាត់ថា ស៊ីប៊ីអេស បាញ់គោក្របីពលរដ្ឋ
ដោយ មេគង្គ ប៉ុស្តិ៍ ចេញផ្សាយ​ ថ្ងៃទី 3 March, 2025 ក+ ក-

 

ហេតុការបាញ់សត្វគោក្របីរបស់ពលរដ្ឋនៅក្នុងស្រុកអូរគ្រៀងសែនជ័យ ខេត្តក្រចេះ ពីសំណាក់ក្រុមជនជាតិចិន ធ្វើការនៅក្រុមហ៊ុនខេមបូឌាន បាណាណា ហៅកាត់ថា ស៊ីប៊ីអេស បានកើតឡើងកាលពីរសៀលថ្ងៃទី១ខែមិនាឆ្នាំ២០២៥នេះ។ ក្នុងហេតុការបាញ់ប្រហារសត្វគោក្របីរបស់ពលរដ្ឋបានបណ្តាលឱ្យសត្វគោមួយក្បាលងាប់នៅហ្នឹងកន្លែង របួសសត្វគោ២ក្បាល និងបាត់ក្របីបីក្បាល។ហើយរហូតមកដល់ថ្ងៃនេះ ក្រុមជនដៃដល់ដែលពលរដ្ឋស្គាល់ថា ជាជនជាតិចិន ធ្វើការនៅក្នុងក្រុមហ៊ុនចំការចេក មិនត្រូវបានឃាត់ខ្លួនពីសំណាក់កម្លាំងសមត្ថកិច្ចនៅឡើយទេ។ដោយសមត្ថកិច្ចខេត្តក្រចេះ អះអាងថា កំពុងស៊ើបអង្កេត។


ក្នុងសកម្មភាពបាញ់ប្រហារសត្វគោក្របីរបស់ពលរដ្ឋនេះ ជនជាតិចិនមួយក្រុមនេះបានជិះរថយន្តស៊េរីទំនើបមួយគ្រឿង គៀងគោក្របី របស់ពួកគាត់ ឱ្យចូលចំការ របស់ក្រុមហ៊ុន និងបានប្រើប្រាស់កាំភ្លើងបាញ់មកលើសត្វគោរបស់ពួកគាត់តែម្តង។បណ្ដាលឱ្យងាប់និងរបួសជាច្រើនក្បាលក្រោយបាញ់ប្រហាររួច,ពួកគេបានប្រើឱ្យសន្តិសុខ លើកសត្វគោដាក់ត្រាក់ទ័រដឹកចូលក្រុមហ៊ុនដើម្បីវះយកសាច់។

ករណីបាញ់ប្រហារសត្វគោក្របី ពីសំណាក់ក្រុមជនជាតិចិនមួយក្រុម ធ្វើការនៅក្នុងក្រុមហ៊ុនខេមបូឌាន បាណាណា ហៅតាត់ថា ស៊ីប៊ីអេស ត្រូវបានពលរដ្ឋដែលជាម្ចាស់គោកក្របីអះអាងថា ករណីនេះមិនមែនទើបនឹងកើតឡើងនោះទេ កន្លងមកមានសត្វគោក្របីរបស់ពួកគាត់ងាប់នៅក្នុងព្រៃជាបន្តបន្ទាប់ ដោយមានស្នាមត្រូវគ្រាប់កាំភ្លើង។


ជនរងគ្រោះដែលជាម្ចាស់សត្វគោក្របី រស់នៅស្រុកអូរគ្រៀងសែនជ័យ ខេត្តក្រចេះ បាននិយាយថា តើក្រុមជនជាតិចិនទាំងនោះ បានកាំភ្លើងមកពីណាដើម្បី ធ្វើសកម្មភាព បាញ់សត្វពាហនៈរបស់ពួកគាត់។ហើយពលរដ្ឋទាំងនោះស្នើឱ្យកម្លាំងជំនាញនៃស្នងការនគរបាលខេត្តក្រចេះ ត្រូវបើកការស៊ើបអង្កេត និងចាប់ជនដៃដល់យមមកផ្ដន្ទាទោសតាមច្បាប់។
ពាក់ព័ន្ធនឹងករណីនេះ អ្នកនាំពាក្យនៃស្នងការដ្ឋាននគរបាលខេត្តក្រចេះ បានឲ្យដឹងថា កម្លាំងសមត្ថកិច្ចជំនាញកំពុងធ្វើការស្រាវជ្រាវ ស៊ើបអង្កេតលើករណីនេះដែរ៕

សូមចុច Link ដើម្បីទស្សនាព័ត៌មានពិស្ដារ៖ https://youtu.be/imm42vHmxLc