អ្នកប្រដាល់ជើងខ្លាំងកម្ពុជា២រូប ចាញ់កីឡាករថៃទាំងអាម៉ាស់

ដោយ មេគង្គ ប៉ុស្តិ៍ ចេញផ្សាយ ថ្ងៃទី 23 November, 2015 ក+ ក-

ភ្នំពេញ៖ការប្រកួតអន្តរជាតិកាលពីថ្ងៃអាទិត្យទី២២ វិច្ឆិកា កីឡាករជើងខ្លាំងកម្ពុជា២រូប ដែលអ្នកណាក៏ស្គាល់ថាជាកីឡាករលំដាប់ជួរមុខក្នុងប្រភេទ ទម្ងន់រៀងខ្លួនបានបរាជ័យយ៉ាងអាម៉ាស់ព្រមគ្នានៅលើសង្វៀន ទូរទស្សន៍អាស៊ីអាគ្នេយ៍ក្រោមការប្រកួតជាមួយកីឡាករថៃ។ នោះជាលទ្ធផលដែលធ្វើឲ្យអ្នកទស្សនាខកចិត្តបំផុត ដោយសារតែកីឡាករថៃស៊ីផុយទាំងអស់នៅក្នុងការប្រកួត ។

ចាត់ទុកថាជាលើកទី១ដែលកីឡាករជើងខ្លាំងរបស់កម្ពុជា ត្រូវកីឡាករថៃកាច់បំបាក់ព្រមគ្នានៅលើសង្វៀនរួមគ្នា ដោយសូម្បីតែក្រេឌីតនិងស្នាដៃរបស់អ្នកទាំង គឺមិនទំនងនឹងជួបលទ្ធផលបែបហ្នឹង។ កីឡាករឈិន ក្វាន់ង៉ុយ ជាម្ចាស់ខ្សែក្រវាត់ក្នុងប្រភេទទម្ងន់៦៥គីឡូក្រាម បានក្លាយជាអ្នកចាញ់យ៉ាងអាម៉ាស់ក្រោមដៃកីឡាករថៃ ឈ្មោះPhay Noy។

ការប្រកួតរបស់អ្នកទាំងពីរមានសភាពប្រផះប្រភីងបំផុតសម្រាប់ កីឡាករកម្ពុជា ជាពិសេសក្នុងពេលកីឡាករថៃបញ្ចេញកណ្ដាប់ដៃនិងបច្ចេកទេសទាត់ ធាក់របស់ខ្លួនយ៉ាងរស់រវើក។ កីឡាករកម្ពុជាបានបង្ហាញសភាពខឹងច្រឡោតនិងចាប់កំហុសទៅលើ គូប្រកួត នៅពេលកីឡាករថៃជ្រុលធាក់ចំប្រដាប់ការពារធ្វើឲ្យថៃ ផ្លាស់ប្ដូរយុទ្ធសាស្ត្រវាយសន្ធាប់ដូចបាវសាក់ នោះផង។

កីឡាករថៃល្អព្រមគ្នាទាំងដៃ ជើងនិងកែង ក្នុងពេលកីឡាករឈិន ក្វាន់ង៉ុយ ត្រូវគេកត់សម្គាល់ថាថមថយកម្លាំងស៊ុហ្វខុសពីការប្រកួត មុនៗដាច់ឆ្ងាយ។ ពេញរយៈពេល៥ទឹកកីឡាករកម្ពុជាចាញ់ដាច់តែម្ដង ក្រោមការវាយសម្រុករបស់កីឡាករថៃ។ ក្នុងទឹកខ្លះ កីឡាករកម្ពុជាទ្រមខ្លួនយ៉ាងខ្លាំង ក្រោមកណ្ដាប់ដៃនិងរន្ទះជើងរបស់ថៃបំផុត។ ប៉ុន្តែគេក៏បានវ័ធកែងចូលត្រូវខ្ចប់ៗធ្វើឲ្យថៃចង់បែក អំពិលអំពែកម្ដងៗផងដែរ។ ចុងបញ្ចប់ការប្រកួត ឈិន ក្វាន់ង៉ុយ ត្រូវគេប្រកាសថាចាញ់កីឡាករ Phay Noy ដែល លទ្ធផលនេះ គឺទោះមិនមានការប្រកាសដោយគណៈកម្មការ ក៏មានអ្នកគេដឹងរួចទៅហើយ ដោយសារតែ៥ទឹកដែលបានធ្វើឡើង គឺកីឡាករថៃឈ្នះដាច់។

ងាកទៅកាន់ការប្រកួតអន្តរជាតិមួយគូទៀត កីឡាករល្បីឈ្មោះ ឡេះ តើក ដែលអ្នកណាក៏ស្គាល់ថាជាកីឡាករប្រភេទទម្ងន់៦៩ គីឡូក្រាម ពិបាកស្វែងរកដៃគូឲ្យប្រកួតជាមួយ ក៏ចាញ់កីឡាករថៃដូចគ្នាផងដែរ។ កីឡាករថៃ Thann Vanlek ជា គ្រូបង្វឹកផង ជាកីឡាករជើងខ្លាំងប្រចាំប្រទេសថៃផង បានវាយបំបុកទៅលើកីឡាករកម្ពុជារូបនេះ ទ្រមខ្លួនយ៉ាងខ្លាំងតាំងពីទឹកទី១។ មិនខុសពីគូខាងលើ អ្នកទាំងពីរក៏ផ្ទុះចម្រូងចម្រាសចង់ឈ្លោះគ្នានៅលើរេញ ផងដែរ ដោយធ្វើឲ្យ ឡេះ តើក ក្លាយជាច្រឡោតខឹងហើយវាយចេញបែបកំរោលនៅពេលកីឡាករ ថៃវាយសម្រុកធ្វើឲ្យគេឈឺសាច់ឬពេលជ្រុលដៃ ឬជើងវាយត្រូវប្រដាប់ការពារ ឬចំកន្លែងហាមឃាត់។ កីឡាករថៃក៏សម្ដែងសកម្មភាពតបតដោយកំហឹងត្រឡប់មកវិញ ផងដែរ ដោយអ្នកទាំងពីរសឹងនឹងលែងស្ដាប់លោកអាជ្ញាកណ្ដាល ដោយសារតែកំហឹងរៀងខ្លួន។

យ៉ាងណាមិញ កីឡាករថៃ Thann Vanlek ត្រូវគេមើលឃើញថា បានព្យាយាមបន្ថយកំហឹងរបស់ឡេះ តើក តាមរយៈសកម្មភាពសុំទោស ដើម្បីសម្រួលឲ្យស្ថានភាពតានតឹងនៅលើសង្វៀនធូរ ស្រាល។ គូនេះ កីឡាករថៃ វាយបានតិច ប៉ុន្តែមួយដៃមួយជើងរបស់គេត្រូវចំគោលដៅ។ ផ្ទុយទៅវិញ កីឡាករឡេះ តើក វាយចេញបែបកំរោលនិងវាយចេញបានច្រើន ប៉ុន្តែតិចណាស់ត្រូវចំចំណុចបានពិន្ទុ។ អ៊ីចឹងហើយ ទើបកីឡាករកម្ពុជាបានក្លាយជាអ្នកចាញ់ពិន្ទុកីឡាករថៃមិន ខុសគ្នានៅក្រោមកណ្ដាប់ដៃកីឡាករថៃ។

លោក ញាណ សុធី អ្នករៀបចំការប្រកួតយល់ថានេះជាលើកទី១ ដែលកីឡាករបរទេសស៊ីដាច់កីឡាករកម្ពុជាតែម្ដង បើធៀបនឹងការប្រកួតកន្លងមក គឺរមែងឈ្នះមួយចាញ់មួយឬយ៉ាងហោចក៏មានស្មើគ្នាដោយមិន មែនកីឡាករថៃឈ្នះទាំងអស់នៅលើសង្វៀនតែមួយបែបនេះ។ លោកថាជារឿងភ្ញាក់ផ្អើលដែលម្ចាស់ខ្សែក្រវាត់ និងជាជើងខ្លាំងពិបាករកគូប្រកួតរបស់កម្ពុជាបរាជ័យ ព្រមគ្នា នៅក្នុងការប្រកួតអន្តរជាតិ។ លោកមានគម្រោងឲ្យអ្នកទាំង៤ឡើងសងសឹកគ្នា ប៉ុន្តែមិនទាន់ដឹងថាតើដល់ថ្ងៃណាពេលណាឲ្យពិតប្រាកដនោះទេ៕ប្រភព៖VOD