បាត់ដំបង៖យ៉ាងហោចណាស់ មានមនុស្សម្នាក់រងរបួសធ្ងន់ដោយសារការផ្ទុះមីនតោនមួយគ្រាប់ ខណៈដែលជនរងគ្រោះកំពុងតែបើកបរត្រាក់ទ័រភ្ជួរដីចម្ការ កាលពីល្ងាច ថ្ងៃទី២៦ ខែវិច្ឆិកា ឆ្នាំ២០១៥ វេលា ម៉ោង១៤ៈ១០នាទី ស្ថិតក្នុងចំណុចភូមិសាស្ត្រ ក្រុមទី៥ ភូមិអូរចំណាប់ ឃុំតាស្តា ស្រុកសំពៅលូន ខេត្តបាត់ដំបង។
ប្រភពពីអ្នកស្រុកក្បែរកន្លែងកើតហេតុទីនោះបានឲ្យដឹងថា៖ជនរងគ្រោះដែលបើកបរត្រាក់ទ័រភ្ជួរដីចម្ការមានឈ្មោះ ឆេង ចក ជាអ្នកស៊ីឈ្នួលភ្ជួរដីស្រែចម្ការ ឲ្យឈ្មោះ វ៉ាត ដែលជាម្ចាស់ចំការនេះ។
មន្ត្រីអាជ្ញាធរស្រុក សំពៅលូន បានរាយការណ៍ជូនលោក អភិបាលរងខេត្តបាត់ដំបង ងួន រតនៈ ក្នុងខណៈដែលលោកអញ្ជើញជាអធិបតីនៅក្នុងពិធីប្រកាសតែងតាំងចូលកាន់មុខតំណែងអភិបាលរងស្រុកនេះ ចំនួន២រូប កាលពីព្រឹកថ្ងៃទី២៧ ខែវិច្ឆិកា នេះថា៖ គ្រាប់មីនដែលបន្សល់ក្នុងដីចម្ការហើយបានផ្ទុះក្នុងពេលដែលបងប្អូនប្រជាកសិករនាំគ្នាចុះភ្ជួរដីធ្វើចម្ការនៅលើ(ដីផ្លូវចាស់) ក្នុងតំបន់សមរភូមិនាសម័យសង្គ្រាមផ្ទៃក្នុងកម្ពុជា មកធ្វើជាចម្ការរបស់ខ្លួន ព្រោះជាដីចម្ការក្រៅរង្វង់ប្រតិបត្តិការរបស់ CMAC ដែលបានធ្វើការដោះមីននិងប្រគល់ឲ្យអាជ្ញាធរទីនោះ។
សមត្ថកិច្ចមូលដ្ឋានទីនោះ បានអះអាងឲ្យដឹងបន្ថែមថា៖ ក្នុងហេតុការណ៍ផ្ទុះមីនតោននេះ បុរសម្នាក់ ឈ្មោះ ឆេង ចេក ភេទប្រុស អាយុ៣២ឆ្នាំ រស់នៅក្នុង ភូមិកូនភ្នំខាងជើង ឃុំតាស្តា ស្រុកសំពៅលូន ខេត្តបាត់ដំបង បានរងរបួសធ្ងន់ បណ្តាលឲ្យរងរបួសដាច់ម្រាមដៃ២ និងរបួសក្រោមភ្នែកខាងស្តាំ។
ប្រភពដដែលខាងលើបានបន្តទៀតថា៖ ជនរងគ្រោះដោយសារការផ្ទុះគ្រាប់មីនតោននេះ ត្រូវបានក្រុមគ្រួសារនាំយក ទៅព្យាបាល នៅមន្ទីរពេទ្យបង្អែកស្រុកសំពៅលូន ខេត្តបាត់ដំបង៕ ដោយ ប៉ែន សុផល
