ភ្នំពេញ៖ ឃាតកម្មដ៏អាថ៌កំបាំងលើស្ត្រីជនជាតិម្នាក់បានបង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង១៨ៈ០០ ល្ងាចថ្ងៃទី ២៨ ខែវិច្ឆិកា ឆ្នាំ២០១៥ នៅចំណុចផ្ទះស្ត្រីរងគ្រោះក្រុមទី១ ភូមិដំណាក់ធំ២ ក្នុងសង្កាត់ស្ទឹងមានជ័យ ខណ្ឌមានជ័យ ។
មន្ត្រីនគរបាលបានប្រាប់ឲ្យដឹងថា ស្ត្រីរងគ្រោះជាជនជាតិចិន អាយុជាង ៤០ឆ្នាំ រស់នៅផ្ទះជួលលេខ៤៦ មានមុខរបរលក់អីវ៉ាន់បោះដុំ(គ្រឿងអេឡិចត្រូនិច) ក្នុងសង្កាត់ស្ទឹងមានជ័យ ខណ្ឌមានជ័យ ត្រង់កន្លៃងកើតហេតុ ត្រូវបានជនមិនស្គាល់មុខចាក់ដោយកន្ត្រៃចំបំពង់ ក ស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យ។
សមត្ថកិច្ចបានដកស្រង់សំដីសាក្សីនៅកន្លៃងកើតហេតុថា ស្ត្រីរងគ្រោះត្រូវបានជនមិនស្គាល់អត្តសញ្ញាណចំនួន៣នាក់ ចូលទៅចាក់ត្រូវចំនួន១កន្ត្រៃចំបំពង់ ក ចំហៀងខាងស្តាំបណ្តាលឲ្យជនរងគ្រោះដួល តែខំប្រវ៉េប្រវ៉ារត់ទៅរកអ្នកជិតខាងឲ្យជួយ។ភ្លាមៗនោះត្រូវមិត្តភ័ក្តិចិនដូចគ្នាដឹកយកទៅមន្ទីរពេទ្យរុស្សី ប៉ុន្តែតាមព័ត៌មានចុងក្រោយបានឲ្យដឹងថា ដោយសាររបួសធ្ងន់ធ្ងរពេកដែលក្រុមគ្រូពេទ្យមិនអាចជួយសង្គ្រោះបាន ទើបធ្វើឲ្យស្ត្រីរងគ្រោះដាច់ខ្យល់ស្លាប់គួរឲ្យរន្ធត់។ក្រោយពីធ្វើឃាតលើ ស្ត្រីរងគ្រោះរួចភ្លាម ក្រុមជនដៃដល់បានរត់គេចខ្លួនបាត់អស់។
ប៉ូលីសមិនទាន់ដាក់ការសន្និដ្ឋានជាក់លាក់នៅឡើយទេរង់ចាំស៉ើបអង្កេតសិន ដោយគ្រាន់តែវាយតម្លៃថា ជាករណីគំនុំ ព្រោះជនដៃដល់មិនបានប្រមូលយកទ្រព្យសម្បត្តិរបស់ជនរងគ្រោះទេ ។កន្លែងកើតហេតុជាផ្ទះរបស់ស្ត្រីរងគ្រោះ ត្រូវបានប៉ូលីស និងអាជ្ញាធរមូលដ្ឋានធ្វើការបិទ ទ្វារបណ្តោះអាសន្ន រង់ចាំជំនាញ និងខាងស្ថានទូតចិនចុះសហការធ្វើកាអង្កេតស្រាជ្រាវរកមូលហេតុពិតនៃអំពើឃាតកម្មដ៏អាថ៌កំបាំងនេះ ដើម្បីស្វែងរកចាប់ខ្លួនជនដៃដល់យកមកផ្តន្ទាទោសតាមច្បាប់៕
ដោយ៖រដ្ឋា
