ភ្នំពេញ៖ សេចក្តីប្រកាសពីទីស្តីការគណៈរដ្ឋ មន្ត្រីបង្ហាញថា សន្និសីទអន្តរជាតិនៃគណ បក្សនយោបាយ នៅអាស៊ី ICAPP ប្រមូលផ្តុំដោយគណបក្សចំនួន ៣៤០ គណបក្ស មកពី ៥២ ប្រទេស នៅអាស៊ី។លោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រី ត្រូវបានជ្រើសតាំងជាអនុប្រធានគណៈកម្មាធិការអចិន្ត្រៃយ៍គណបក្សនយោបាយ នៅអាស៊ី ICAPP។ លោកសុខអាន បានដឹកនាំគណបក្សប្រតិភូគណបក្សប្រជាជនកម្ពុជា ចូលរួមនៅក្នុងកិច្ចប្រជុំ ICAPP លើកទី៨ នៅទីក្រុង កូឡុំបូ ប្រទេសស្រីលង្កា ចាប់ពីថ្ងៃទី១៨ ដល់ថ្ងៃទី២១ ខែកញ្ញា ឆ្នាំ២០១៤។
សេចក្តីប្រកាសដដែល បង្ហាញថា ឥស្សរភាព និងបទពិសោធន៍ការងារ ដែលទទួលបានជោគជ័យកន្លងមក នាំឲ្យសមាជិកអចិន្ត្រៃយ៍ទាំងអស់ បានអបអរសាទរលោកឧបនាយករដ្ឋមន្ត្រី សុខ អាន ចំពោះតំណែងជាអនុប្រធានគណៈកម្មធិការអចិន្ត្រៃយ៍ ICAPP។
លោក Vijay Jolly ប្រធានរៀបចំសន្និសីទពិភពលោកនៃគណបក្សកាន់អំណាចឥណ្ឌា BJP បានថ្លែងនូវការចាប់អារម្មណ៍របស់ខ្លួនថា លោកឧបនាយករដ្ឋមន្ត្រី សុខ អាន មិនមែនគ្រាន់តែ ជាអ្នកដឹកនាំមួយរូបរបស់កម្ពុជាប៉ុណ្ណោះទេ តែគាត់ក៏ជាអ្នកដឹកនាំម្នាក់របស់អាស៊ីទាំងមូល គាត់គួរ ឲ្យស្ញប់ស្ញែង គាត់មានភាពវ៉ៃឆ្លាត គាត់គឺជាអ្នកការទូត គាត់គឺជាអ្នកនយោបាយ ហើយគាត់ក៏ជាអ្នក ចាត់ចែងដ៏ពូកែ ខ្ញុំបានស្គាល់គាត់តាមរយៈការចួលរួមជាច្រើនឆ្នាំក្នុងសកម្មភាព ICAPP យើងគោរព គាត់ហើយយើងគាំទ្រគាត់ ក្នុងការធ្វើជាអនុប្រធានគណៈកម្មធិការអចិន្ត្រៃយ៍នៃ ICAPP។
លោក បានបន្តថា “ខ្ញុំគាំទ្រគាត់ បេក្ខភាពគាត់គឺជាជំហានមួយក្នុងការបង្រួបបង្រួមអាស៊ី ការចូលរួមរបស់ប្រទេសកម្ពុជា នឹងកិច្ចការអន្តរជាតិរបស់អាស៊ី ហើយការដឹកនាំរបស់គាត់បានចូលរួមយ៉ាងសំខាន់ នៅក្នុងការងាររបស់ ICAPP នៅអាស៊ី”។
លោកឧបនាយករដ្ឋមន្ត្រី សុខ អាន បានមានប្រសាសន៍ថា “ការងារនេះ គឺធំ ហើយលំបាក ប៉ុន្តែដោយសារយើងឃើញការគាំទ្រយ៉ាងសកម្មពីសមាជិក ICAPP ក្នុងគណៈកម្មធិការអចិន្ត្រៃយ៍ វាជាការលើក ទឹកចិត្តមួយលើការងារ ដែលឯកឧត្តមផ្ទាល់ធ្លាប់បានធ្វើកន្លងមក ហើយក្នុង ICAPP នេះ យើងបានធ្វើការងារច្រើនណាស់ ។ មតិជាទូទៅតែងតែនិយាយថាការកសាងសហគមន៍អាស៊ីវាពិបាក ជាងកាលពីបង្កើតសហគមន៍ អឺរ៉ុបទៅទៀត ដូច្នេះវាសុទ្ធតែជាការប្រឈមមុខ ដែល ICAPP ត្រូវខិតខំរកដំណោះស្រាយឲ្យសមស្របនៅក្នុងដំណើរការកសាងសហគមន៍អាស៊ី” ។
ក្នុងន័យនេះគណបក្សនយោបាយនៅអាស៊ី ត្រូវបន្តខិតខំកាន់តែខ្លាំង នឹងសកម្មថែមទៀត ដើម្បីរួមគ្នា បង្កើតសហគមន៍អាស៊ី មួយប្រកបដោយ សុខសន្តិភាព ស្ថេរភាព និងទទួលបានការអភិវឌ្ឍន៍ ដែលបាននិងកំពុងកើតមាននៅក្នុងសតវត្សអាស៊ីទី២១នេះ។ ដូច្នេះ ការគាំទ្រលោកឧបនាយករដ្ឋមន្ត្រី សុខ អាន ជាអនុប្រធានគណៈកម្មាធិការអចិន្ត្រៃយ៍គណបក្សនយោបាយនៅអាស៊ី ( ICAPP ) គឺជាផ្លែផ្កានៃយុទ្ធនាការ ក៏ដូចជាបង្កើនឧត្តមភាពគណបក្សប្រជាជនកម្ពុជានៅលើឆាកអន្តរជាតិ ដែលផ្អែកលើសសរស្តម្ភរបស់កម្ពុជា គឺមាគ៌ាឈ្នះៗរបស់លោក ហ៊ុន សែន។
ក្នុងយុទ្ធនាការនេះ ក្រុមការងារដឹកនាំដោយលោកឧបនាយក រដ្ឋមន្ត្រី សុខ អាន បានធ្វើទំនាក់ទំនងយ៉ាងជិតស្និទ្ធរវាង បក្សនិងបក្ស រវាងបុគ្គលនិងបុគ្គល ដើម្បីទទួលបានការគាំទ្រជាអន្តរជាតិ ក្នុងការផ្តល់តួនាទីសំខាន់ៗ ជាពិសេស ការទទួលខុសត្រូវកាន់តែខ្ពស់ដល់មន្ត្រីគណបក្សប្រជាជនកម្ពុជាលើការងារនយោ បាយការបរទេសក្នុងក្របខ័ណ្ឌ ICAPP សន្និសីទអន្តរជាតិនៃគណបក្សនយោបាយនៅអាស៊ី៕
