ក្រុមអ្នកស្រាវជ្រាវបានប្រកាសកាលពីពេលថ្មីៗថា ថ្នាំសម្រើបវីយ៉ាក្រា (Viagra) អាចបណ្តាលឱ្យខ្វាក់ភ្នែកចំពោះបុរសដែលមានបញ្ហាភ្នែក ហើយក៏អាចប៉ះពាល់ទៅដល់អ្នកដែលភ្នែកមើលឃើញ ធម្មតាផងដែរ។
អ្នកស្រាវជ្រាវអូស្ត្រាលីមួយក្រុមបាននិយាយថា គ្រឿងផ្សំនៅក្នុងថ្នាំបង្កើនឋាមពលផ្លូវភេទប្រភេទវីយ៉ាក្រា អាចប៉ះពាល់ដល់ការមើលឃើញជានិរន្តន៍នៃកែវភ្នែកនៅក្នុងចំណោមបុរសដែលមានជំងឺភ្នែកពីកំណើត។
ទន្ទឹមនេះ សារធាតុផ្សំក្នុងថ្នាំជំរុញផ្លូវភេទក៏អាចប៉ះពាល់ទៅដល់អ្នកដែលមានភ្នែកមើលឃើញធម្មតាដែរ ប្រសិនបើពួកគេមានផ្ទុកនូវហ្សែនមួយដែលមានទំនាក់ទំនងជាមួយនឹងបញ្ហាកែវភ្នែក។
ក្រុមអ្នកស្រាវជ្រាវបានបង្ហាញទ្រឹស្តីមួយដែលចាត់ទុកថា ថ្នាំនោះអាចបង្អាក់អង់ស៊ីមដែលមានសារៈសំខាន់សម្រាប់ការបញ្ជូនសញ្ញាពន្លឺពីកែវភ្នែកទៅកាន់ខួរក្បាល។
សារធាតុនោះត្រូវបានស្គាល់តាម ឈ្មោះថា ស៊ីលដេណាហ្វីល (Sildenafil) វាជាគ្រឿងផ្សំសកម្មមួយនៅក្នុងថ្នាំប្រភេទវីយ៉ាក្រា ដែលអាចបង្កឱ្យមានបញ្ហានៅក្នុងការមើលឃើញនៅក្នុងរយៈពេលខ្លីមួយ នៅក្នុងចំណោមអ្នកមានសុខភាពធម្មតាមួយចំនួន។
ការសិក្សានៅលើកដំបូងបានភ្ជាប់ទំនាក់ទំនងថ្នាំ វីយ៉ាក្រា និងថ្នាំប្រឆាំងការអសមត្ថភាពផ្លូវភេទ ដទៃទៀតដែលអាចផ្តល់ឥទ្ធិពលអវិជ្ជមានដូចជា ការធ្វើឱ្យថ្លង់។ ក្រុមអ្នកស្រាវជ្រាវអាមេរិក ក៏បានរកឃើញផងដែរចំពោះបុរសដែលប្រើថ្នាំវីយ៉ាក្រាក៏អាចប្រឈមជាមួយនឹងកំណើនគ្រោះថ្នាក់ដោយសារការកើតមានជំងឺមហារីកស្បែកផងដែរ។
ទោះជាយ៉ាងនេះក្តី ក៏មិនទាន់មានការប្រកាសជាផ្លូវការណាមួយដែលហាមប្រាមអ្នកអសមត្ថភាពផ្លូវវភេទមិនឲ្យប្រើថ្នាំបង្កើនឋាមពលរួមភេទប្រភេទវីយ៉ាក្រា នោះនៅឡើយទេ ៕
