ភ្នំពេញ ៖ ក្រសួងសុខាភិបាលកម្ពុជា នៅថ្ងៃទី២១ ខែធ្នូ ឆ្នាំ២០១៥ នេះ បានចេញសេចក្តីជូនដំណឹងដោយព្រមានចាត់វិធានការច្បាប់ ចំពោះការនាំចូល និងការចរាចរណ៍ផលិតផលបញ្ចុះទម្ងន់ម៉ាក MAZETA Slim ដែលផលិតដោយរោងចក្រ Greatwallbuy International Trading Co.,Ltd California ។
ក្នុងសេចក្តីព្រមានបានលើកឡើងថា តាមការសង្កេតរបស់ក្រសួងសុខា ភិបាល បានពិនិត្យ លិខិតយោងលេខ ៩៦៦/១៥ លឆក/បអបព ចុះថ្ងៃទី៣ ខែធ្នូ ឆ្នាំ២០១៥ របស់អង្គភាពប្រឆាំងអំពើពុករលួយបច្ចុប្បន្ននេះ ឃើញថា ឱសថឈ្មោះ MAZETA Slim ដែលមានរចនាបទបង្ហាញ និងវេចខ្ចប់ ជាឱសថបញ្ចុះទម្ងន់ផលិតដោយរោងចក្រ Greatwallbuy International Trading Co.,Ltd California ជាឱសថនាំចូលគ្មានការអនុញ្ញាតពីក្រសួងសុខាភិបាល ហើយបានលក់ចែកចាយ តាមឱសថស្ថាន-ឱសថស្ថានរង ដោយគ្មានចុះបញ្ជីការ និងត្រួតពិនិត្យគុណភាពប្រសិទ្ធភាព សុវត្ថិភាព ពីក្រសួងសុខាភិបាលនៃព្រះរាជាណាចក្រកម្ពុជានោះទេ។
សេចក្តីជូនដំណឹងដដែលនេះ បានបង្ហាញពីចំណាត់ការតាមផ្លូវច្បាប់ស្តីពីការគ្រប់គ្រងឱសថ ដូចមានចែងខាងក្រោមនេះ ៖
១. គ្រឹះស្ថានលក់ឱសថទាំងអស់ ត្រូវបញ្ឈប់ការតាំងលក់ឱសថខាងលើ ចាប់ពីថ្ងៃចេញសេចក្តីជូនដំណឹងនេះតទៅ បើរកឃើញមានការតាំងលក់ឱសថនេះតទៅទៀត និងអនុវត្តទៅតាមច្បាប់ជាធរមាន។
២. គ្រប់មន្ទីរសុខាភិបាល រាជធានី ខេត្ត ត្រូវមានវិធានការ ធ្វើការណែនាំ ដល់គ្រប់សាខាគ្រឹះស្ថាននាំចូលឱសថ ឱសថស្ថាន-ឱសថស្ថានរង ជាបន្ទាន់ដូចមានក្នុងចំណុច ១ខាងលើ។
៣. ក្រសួងនឹងមានវិធានការតឹងរ៉ឹងតាមផ្លូវច្បាប់ ចំពោះឱសថស្ថាន-ឱសថស្ថានរង ទាំងឡាយណា ដែលនៅតែបន្តលក់ឱសថខាងលើនេះ៕ ដោយ៖រដ្ឋា
