ខេត្តកោះកុង៖ ក្រុមចោរ២នាក់ បានជិះរថយន្តមកពីភ្នំពេញ ហើយម្នាក់ដើរតួជាជនជាតិឥណ្ឌូនេស៊ី ម្នាកទៀតធ្វើជាអ្នកបកប្រែ បានមកធ្វើសកម្មភាពប្លន់យកម៉ូតូពីអ្នករត់ម៉ូតូឌុបពេលយប់នៅឯខេត្តកោះកុង នៅម៉ោង១០៖៣០នាទីយប់ថ្ងៃទី២១ ខែធ្នូ ឆ្នាំ២០១៥ តែត្រូវកម្លាំងអាវុធហត្ថខេត្តខ្លួនបាន១ម៉ោង ក្រោយធ្វើសកម្មភាព។
លោក រស់ សុខឿន ប្រធានមន្ទីរស្រាវជ្រាវ និងយុត្តិធម៌អាវុធហត្ថខេត្តកោះកុង បានឲ្យដឹងថា ជនសង្ស័យទាំងពីរ ត្រូវបានឃាត់ខ្លួននៅម៉ោង១១៖៣០នាទី យប់ថ្ងៃទី២១ ខែធ្នូ នៅតាមបណ្តោយ ផ្លូវជាតិលេខ៤៨ ផ្លូវបំបែកចូលស្រុកថ្មបាំង ។
ជនសង្ស័យទី១.ឈ្មោះ ប៉ែន សុផល និងទី២.ឈ្មោះគង់ ពៅ (ហៅ សេង សុទ្ធី) ទាំង២នេះមកភ្នំពេញ ចំណែកជនរងគ្រោះឈ្មោះ យឹម រតនៈ អាយុ៣២ឆ្នាំ មានទីលំនៅភូមិ២ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ហើយម៉ូតូរបស់ជនរងគ្រោះ ដែលក្រុមចោរប្លន់នោះ ម៉ាកC១២៥ ស៊េរី២០១៥ រួមទាំងកាបូបលុយ និងទូរស័ព្ទទៀតផង។
លោក រស់ សុខឿន បានបន្តថា បើតាមចម្លើយសារភាពរបស់ក្រុចោរទាំង២នាក់ បានប្រាប់សមត្ថកិច្ចថា នៅម៉ោងប្រហែល៧យប់ ពួកគេបានដើរចេញពីផ្សារជួបនឹងជនរង គ្រោះជាអ្នករត់ម៉ូតូឌុប ហើយឲ្យឌុបទៅរកគ្រឿងសមុទ្រ នៅសួនច្បារមាត់សមុទ្រ ហើយផឹកស្រានៅទីនោះ ហើយចូលក្លឹបកម្សាន្តរស្មីមករា។ ពេលនោះ ពួកគេបានដាក់ថ្នាំងងុយដេក ចូលក្នុងកែវស្រាចំនួន៥គ្រាប់ ពេលមើលឃើញសកម្មភាព របស់អ្នករត់ ម៉ូតូឌុកងងុយដេកហើយ ពួកគេឲ្យដឹកចេញពីក្លឹប ពេលមកដល់កន្លែងស្ងាត់ខ្លួនឲ្យឈប់ ហើយធាក់១ជើងដួល ពួកគេក៏យកម៉ូតូជនរងគ្រោះជិះចេញទៅភ្នំពេញទាំងយប់មក។
លោកបញ្ជាក់ថា ក្រោយពីទទួលព័ត៌មានភ្លាមៗ ពីជនរងគ្រោះ លោកបានចាត់កម្លាំងគ្រប់គោលដៅចាប់បានភ្លាមផងដែរ និងរឹបអូសបានវត្ថុតាងមួយចំនួន។
ជនសង្ស័យទាំងពីរនាក់ រួមទាំងវត្ថុតាំង កម្លាំងលោកកំពុងកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការទៅតាមផ្លូវច្បាប់៕ ដោយ៖អ៊ួង វឹង
