ខេត្តកំពង់ឆ្នាំង៖សមត្ថកិច្ចការិយាល័យប្រឆាំងគ្រឿងញៀននៃស្នងការនគបាលខេត្តកំពង់ឆ្នាំងបាន ឡោមព័ទ្ធចុះចាប់ខ្លួនជនសង្ស័យប្រុស-ស្រី៥នាក់ ខណៈក្រុមនេះកំពុងធ្វើសកម្មភាពប្រើប្រាស់ និងចែកចាយ។ ប្រតិបត្តិការនេះធ្វើឡើងកាលពីវេលាម៉ោង០៤ និង៣០នាទីរសៀលថ្ងៃទី១៩ ខែកក្កដា ឆ្នាំ២០១៦ ស្ថិតនៅផ្ទះភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។
សមត្ថកិច្ចបានឲង្យដឹងថា ការបង្ក្រាបនេះ ធ្វើឡើងបន្ទាប់ពីទទួលបានព័ត៌មានច្បាស់ពីទីតាំងរបស់ជនសង្ស័យ ហើយក៏សហការគ្នាធ្វើការឡោមព័ទ្ធ និងបង្ក្រាបក្រុមជនសង្ស័យខាងលើបានភ្លាមៗ ។ ប្រភពបន្តថា ជាមួយគ្នានោះកម្លាំងដកហូតបានទូរស័ព្ទដៃ៣គ្រឿង, ជញ្ជីងថ្លឹងថ្នាំ១គ្រឿង រួមនិងឧបករណ៍ជក់គ្រឿងមួយចំនួនទៀត ដោយឡែក ថ្នាំញៀនមួយចំនួនត្រូវពួកគេបំផ្លាញចោល មុនពេលសមត្ថកិច្ចទៅដល់ ។
ប្រភពដដែលបញ្ជាក់ថា ជនសង្ស័យដែលឃាត់ខាងលើ ១-ឈ្មោះប៊ុត ភក្តី អាយុ៣៤ឆ្នាំ (ម្ចាស់ផ្ទះ) ២-ឈ្មោះឌុក វណ្ណៈ អាយុ៣១ឆ្នាំ មានទីលំនៅក្នុងភូមិកណ្តាល សង្កាត់កំពង់ឆ្នាំង ៣-ឈ្មោះអ៊ិន ភារុន ភេទប្រុស អាយុ៣០ឆ្នាំ រស់នៅភូមិសំរោង សង្កាត់ផ្សាររឆ្នាំង ៤-ឈ្មោះឈឹម រតនៈ ហៅសារ៉ាយ អាយុ៤២ឆ្នាំ មានទីលំនៅក្នុងភូមិត្រពាំងបី សង្កាត់ផ្សារឆ្នាំង និង៥-ឈ្មោះប្រាក់ ធារី ភេទស្រី អាយុ៣០ឆ្នាំ មានទីលំនៅក្នុងភូមិកំពង់អូស សង្កាត់ផ្សារឆ្នាំង ក្រុងកំពង់ឆ្នាំង៕
