ខេត្តក្រចេះ៖អធិការនគរបាលស្រុកព្រែកប្រសព្វខេត្តក្រចេះ លោកវរសេនីយ៍ទោ ចាន់ សុផល្លា បានឲ្យដឹងថា រថយន្តកូរ៉េលួចដឹកក្របីខុសច្បាប់ចំនួន៨ក្បាលត្រូវបានកម្លាំងនគរបាលល្បាតដឹកនាំដោយរូបលោកប្រដេញចាប់បាននៅវេលាយប់ថ្ងៃទី១៧ តុលា នៅលើស្ពានបឹងរ៉ៃ ក្នុងឃុំឫស្សីកែវ ស្រុកព្រែកប្រសព្វ។
លោកវរសេនីយ៍ទោបន្តថា ជាមួយគ្នានេះនគរបាលស្រុកព្រែកប្រសព្វ ក៏បានអំពាវនាវឲ្យពលរដ្ឋជាម្ចាស់សត្វក្របីមកពិនិត្យមើលភិនភាគក្របីដែលបាត់ ដើម្បីធ្វើការទំនាក់ទំនងមកទទួលយកទៅវិញ។ លោកបញ្ជាក់ថា រថយន្តខាងលើបានព្យាយាមបើករថយន្តដឹកក្របីគេចពីកម្លាំងនគរបាលស្រុក តែមិនរួច ហើយជនជាអ្នកបើកបរបានគេចខ្លួនខ្លួនបាត់បន្សល់ទុកតែរថយន្ត និងក្របីចំនួន៨ក្បាល។
បច្ចុប្បន្នទាំងរថយន្ត និងក្របីទាំងចំនួន៨ក្បាលក៏ត្រូវបាននាំមករក្សាទុកនៅអធិការដ្ឋានស្រុកព្រែកប្រសព្វ ដើម្បីស្វែងរកម្ចាស់ឲ្យមកទទួលយកវិញ៕
