ខេត្តមណ្ឌលគិរី៖ សមត្ថកិច្ចច្រកទ្វារទ្វេភាគីណាំលៀ ជាអ្នកកាងឈ្មួញរកស៊ីឈើខុសច្បាប់ប៉ុណ្ណោះទេ គឺថែមទាំងយកទីតាំងលំនៅដ្ឋានរបស់ខ្លួនធ្វើជាកន្លែងទិញ និងស្តុកឈើទុកដឹកជញ្ជូនចេញតាមច្រកណាំលៀ ។ ចំណែកឈ្មួញរកស៊ីឈើដែលមានឈ្មោះដូចជា យូ សុធា ជានាយប៉ុស្តិ៍ច្រកទ្វារដាក់ដាំ ក៏បានបើកដៃឲ្យប្រពន្ធ និងប្អូនថ្លៃរបស់ខ្លួនដើរប្រមូលទិញឈើនៅស្រុកពេជ្រាដា យ៉ាងអនាធិប តេយ្យដែរ។
មេប៉ុស្តិ៍ច្រកទ្វារទ្វេភាគីណាំលៀឈ្មោះផន ណាវី ស្រុកពេជ្រាដា ខេត្តមណ្ឌលគិរី ត្រូវបានប្រជាពលរដ្ឋក្នុងស្រុកនេះរិះគន់ថា ជាអ្នកបើកដៃឲ្យឈ្មួញ និងកូនចៅក្រោមឱវាទដឹកជញ្ជូនឈើប្រណីតទៅលក់នៅស្រុកយួន យ៉ាងគគ្រឹកគគ្រេង ។
ប្រភពព័ត៌មានបានរាយការណ៍ថា ឈ្មោះ លី និងឈ្មោះ ជឿង ដែលមានទីលំនៅក្នុងភូមិវ៉ារិយោង ស្រុកពេជ្រាដា ព្រមទាំងឈ្មោះ វង្ស តារាសុផល ជានាយរងប៉ុស្តិ៍ច្រកទ្វារទ្វេភាគីណាំលៀ ក៏ជាឈ្មួញរកស៊ីដឹកឈើប្រណីត ទៅលក់នៅស្រុកយួនដែរ។ ប្រភពបន្តថា ឈ្មួញដូចរៀបរាប់ឈ្មោះខាងលើនេះ បានដឹកឈើប្រណីតចេញតាមច្រករបៀងនៅខាងជើងច្រកទ្វេភាគីណាំលៀមានចម្ងាយប្រមាណ៦០០ម៉ែត្រជាប់ថ្នាលបណ្តុះកូនឈើរបស់ក្រុមហ៊ុនកូវីតាមា។ការដែលឈ្មួញអាចធ្វើសកម្មភាព យ៉ាងពេញបន្ទុកគឺមានការបើកដៃពីលោក ផន ណាវី មេប៉ុស្តិ៍ច្រកទ្វេភាគីណាំលៀ ព្រោះលោក ផន ណាវី គិតគូរតែរឿងប្រមូលុយដាក់ហោប៉ៅប៉ុណ្ណោះ។
ឈ្មួញរកស៊ីឈើមួយចំនួនបានឲ្យដឹងថា ការដឹកឈើចេញតាមច្រកណាំលៀ ពួកគេត្រូវបង់លុយជូនលោក ផន ណាវី តាមការកំណត់គឺរថយន្តធុនតូចត្រូវបង់១០០ដុល្លារ រីឯរថយន្តហាយទ្បែនឌ័រនិងទ្បង់គ្រីស័រជាដើម ត្រូវបង់២០០ទៅ ៣០០ដុល្លារតាមប្រភេទឈើ ។ លោក ផន ណាវី និងលោក វង្ស តារាសុផល មិនត្រឹមតែអង្គុយចាំរាប់ក្បាលទ្បានដឹកឈើល្មើសយកលុយច្រកហោប៉ៅយ៉ាងសុខ ស្រួលប៉ុណ្ណោះទេ គឺថែមទាំងឆ្លៀតដឹកឈើលក់ខុសច្បាប់ដោយខ្លួនឯងយ៉ាងគឃ្លើនទៀតផង។
ប្រភពពីមន្ត្រីនគរបាលមួយរូបសុំមិនបញ្ចេញឈ្មោះបានប្រាប់ឲ្យដឹងថា ក្រសួងបាន និងកំពុងតាម ដានយ៉ាងយកចិត្តទុកដាក់ ពិសេសបទល្មើសទាំងអស់ដែលពាក់ព័ន្ធនឹងការគ្រប់គ្រងរបស់មន្ត្រី នគរបាល គឺមិនទុកឲ្យគេបង្កព្យុះភ្លៀងធ្វើឲ្យខូចដល់ស្ថាប័ននគរបាលជាតិទាំងមូលនោះឡើយ៕
