បន្ទាយមានជ័យ៖លោក ស៊ឹម សំអាត ប្រធានស្នាក់ការអន្តោប្រវេសន៍ ប្រចាំច្រកទ្វារអន្តជាតិប៉ោយប៉ែត ត្រូវគេទម្លាយពីអំពើពុករលួយដោយចាត់ទុកអនុក្រិត្យលេខ ៦៨ របស់រាជរដ្ឋាភិបាលជាខ្យល់ បើកដៃឲ្យមន្ត្រីក្រោមឱវាធ្វើប័ណ្ណឆ្លងដែនដែលមិនមានឯកសារគ្រប់គ្រាន់ និងបង្ខំយកប្រាក់ខ្ពស់កប់ពពកដែលគេមើលឃើញថាជាការកេងប្រវ័ញ្ចញើសឈាមរបស់ប្រជាពលករខ្មែរ។
បើយោងតាមអនុក្រិត្យលេខ ៦៨របស់ រាជរដ្ឋាភិបាល អនក្រ.បក. ស្ដីពីប្រជាពលរដ្ឋខ្មែរប្រើប្រាស់បណ្ណ័ឆ្លងដែនបាន លុះត្រាណាប្រជាពលរដ្ឋទាំងនោះនៅជាប់ព្រំដែន កម្ពុជា.ថៃ ដូចជាស្រុកអូជ្រៅ ក្រុងប៉ោយប៉ែត ក្នុងខេត្តបន្ទាយមានជ័យ នៅក្នុងមាត្រា៣ ប្រជាពលរដ្ឋខ្មែរប្រើប្រាស់បណ្ណ័ឆ្លងដែនអាចធ្វើដំណើរពីខេត្តជាប់ព្រំដែននៃព្រះរាជាណាចក្រកម្ពុជា ឆ្លងចូលទៅខេត្តជាប់ព្រំដែនទល់មុខគ្នានៃព្រះរាជាណាចក្រថៃ ។
គួរជម្រាបថា ក្នុងមាត្រា៤ បានបង្ហាញថា ប័ណ្ណឆ្លងដែនទាំងពីប្រភេទដែលអនុញ្ញាតអោយប្រជាពលរដ្ឋខ្មែររស់នៅតាម ខេត្ត.ក្រុងជាប់ព្រំដែនថៃចូលទៅស្នាក់នៅក្នុងខេត្តនៃ ព្រះរាជាណាចក្រថៃ ដូច មានចែង ក្នុងមាត្រា៣ នៃអនុក្រិត្យនេះ រយៈពេលមិនលើសពី៧ ថ្ងៃ។
ពាក់ព័ន្ធការចេញបណ្ណ័ខាងលើនេះត្រួវប្រជាពលរដ្ឋខ្មែររអ៊ូរទាំនិងបានចោទប្រកាន់ទម្លាក់កំហុសទៅ លើមន្ត្រីនគរបាលអន្តោរប្រវេសន៍ប្រចាំច្រកទ្វារអន្តរជាតិខាងលើនេះដែលគ្រប់គ្រងដោយ លោក ស៊ឹម សំអាត ប្រធានច្រកទើបនឹងឡើងកាន់ដំណែងថ្មីនោះថា មិនបានគោរពនៅគោលការណ៍នៃអនុក្រិត្យ៦៨ អនក្រ.បក របស់រាដរដ្ឋាភិបាលចុះថ្ងៃទី១៦ ខែតុលា ឆ្នាំ២០០៣ ដោយនាយករដ្ឋមន្ត្រី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នោះឡើយ។
មិនតែប៉ុណ្ណោះ ប័ណ្ណឆ្លងដែនត្រូវបានមេខ្យល់មួយចំនួនផ្សំគំនិតគ្នាជាមួយប៉ូលិស អន្តោប្រវេស្តន៍ប្រចាំច្រកប៉ោយប៉ែតធ្វើអោយ ពលករខ្មែរមកពីបណ្ដាខេត្តឆ្ងាយៗដែលមិនដឹងរឿងនេះត្រូវគេយកតំលៃខ្ពស់រហូតដល់ទៅ៣០០ដុល្លារឯណោះ។ ម្យ៉ាងទៀតប័ណ្ណឆ្លងដែនទាំងនោះត្រូវមេខ្យល់ ដែលជាដៃជើងរបស់ប៉ូលិសអន្តោប្រវេស្តន៍ខាងលើដើរធ្វើតាមផ្ទះសំណាក់ ឬផ្ដិតមេដៃតាមទីសាធារណៈ ដូចជារង្វង់មូលច្រកទ្វារ ក្នុងវត្តបាលិលេយ្យ ហាក់បីដូចជាគ្មានច្បាប់ទម្លាប់សោះឡើយ ។ ទង្វើនេះត្រូវគេគិតថាមានការឃុបឃិតពីលោក ស៊ឹម សំអាត ប្រធានច្រកទ្វារទើបអាចធ្វើទៅបាន។
ចំពោះការកឹបកេងក្នុងការធ្វើប័ណ្ណឆ្លងដែនដែលគ្រប់គ្រងដោយលោក ស៊ឹម សំអាតធ្វើអោយពលករមួយចំនួនធំត្រូវចាញ់បោកមេខ្យល់អ្នកខ្លះបានធ្វើលិខិតឆ្លងដែនពី៥០ដុល្លារហូតទៅដល់៣០០ដុល្លា ដែលមេខ្យល់ទាំងនោះជាបក្ខពួក ឬជាខ្សែបងប្អូនប្រពន្ធកូនសមត្ថកិច្ចទៀតផង ។
លោក ស៊ឹម សំអាត ប្រធានស្នាក់ការនគរបាលអន្តោប្រវេសន៍ប្រចាំច្រកទ្វារអន្តជាតិប៉ោយប៉ែត មិនអាចទាក់ទងសុំការពន្យល់ពាក់ព័ន្ធនឹងការចោទប្រកាន់ពីសំណាក់ប្រជាពលករបានទេកាលពីព្រឹកថ្ងៃទី៦ ខែមករានេះ៕
