ភ្នំពេញ៖ រាជរដ្ឋាភិបាលគ្រោងនឹងស្ថាបនាស្ពានថ្មីចំនួន៦ បន្ថែមទៀត ចាប់ពីឆ្នាំ២០១៥ រហូតដល់ឆ្នាំ ២០១៨ ខាងមុខ។នេះបើតាមការឲ្យដឹងពីសំណាក់រដ្ឋលេខាធិការក្រសួង សាធារណការ និងដឹកជញ្ជូន លោក លឹម ស៊ីដេនីន កាលពីពេលថ្មីកន្លងមក។
កម្រោងសង់ស្ពានថ្មីនេះ ត្រូវក្រសួងសាធារណៈការ និងដឹកជញ្ជូន និងក្រសួងសេដ្ឋកិច្ច និងហិរញ្ញវិត្ថុ បានឯកភាពគ្នារួចហើយគឺគ្រោងធ្វើការសាងសង់ស្ពានចំនួន ៦ បន្ថែមទៀត ចាប់ពីឆ្នាំ២០១៥ ដល់ឆ្នាំ២០១៨ រួមមាន ផ្លូវលេខ ៦០បេ ដែលតភ្ជាប់ពីខេត្តក្រចេះ ទៅកាន់ទីប្រជុំជនកំពង់ថ្មីក្នុងខេត្តកំពង់ធំដោយឆ្លងកាត់ទន្លេមេគង្គ លើដែលជាស្ពានថ្មីមួយ មានប្រវែង ១.៦៥០ម៉ែត្រ។
ស្ពានមួយទៀតតភ្ជាប់ផ្លូវពីខេត្តត្បូងឃ្មុំ ទៅក្រូចឆ្មា ឆ្លងកាត់ទន្លេមេគង្គ តភា្ជប់ទៅស្រុកចំការលើ ខេត្តកំពង់ចាម ដែលមានប្រវែងជាង ១.០០០ម៉ែត្រ។
ការគ្រោងសាងសង់ស្ពានឆ្លងកាត់ទន្លេបាសាក់ត្រង់ស្រុកស្អាង ខេត្តកណ្តាល ដោយតភ្ជាប់ត្រើយខាងកើត និងខាងត្រើយខាងលិច ដើម្បីបង្កលក្ខណងាយស្រួលឲ្យប្រជាពលរដ្ឋធ្វើដំណើរឆ្លងកាត់ទៅមក ដោយមិនបាច់ធ្វើដំណើរវាងមកតាខ្មៅ។
ចំណែកស្ពានមួយទៀតនោះ ជាស្ពានមួយយ៉ាងវែង ដែលឆ្លងកាត់ដៃទន្លេសាប ភ្ជាប់ផ្លូវ ៥០សេ ពីខេត្តកំពង់ឆ្នាំង ត្រង់ស្រុកកំពង់លែង ទៅកាន់ខេត្តកំពង់ធំ ស្ពាននេះ មានប្រវែង ៣.៨០០ម៉ែត្រ ដែលជាស្ពានមួយវែងជាងគេបំផុត នៅក្នុងប្រទេសកម្ពុជា។
ស្ពានទី ៥គឺជាស្ពាន ដែលភ្ជាប់ពីតំបន់ជ្រោយចង្វារ ទៅស្វាយជ្រុំឆ្លងកាត់ទន្លេសាប។ ស្ពានទី៦ គឺស្ពានដែលតភ្ជាប់ផ្លូវក្រវ៉ាត់ក្រុងទី២ ក្នុងសង្កាត់ព្រែកឯង ទៅកាន់ស្រុកល្វាឯម ក្នុងខេត្តកណ្តាល ឆ្លងកាត់ដៃទន្លេមេគង្គ ដែលមានប្រវែងជាង ២.០០០ម្រ៉ែត។
លោក លឹម ស៊ីដេនីន បានបន្តឪ្យដឹងថា គម្រោងផ្លូវ និងស្ពានទាំងពីរចុងក្រោយនេះ រាជរដ្ឋាភិបាលកម្ពុជា បានប្រគល់ឲ្យក្រុមហ៊ុនចិន ជួយសិក្សាអំពីផលប្រយោជន៍សេដ្ឋកិច្ច នៃការសាងសង់ស្ពានមួយនេះ ប្រសិនជាវាមានអត្តប្រយោជន៍ ចំពោះសេដ្ឋកិច្ចក្នុងការតភ្ជាប់នេះ រាជរដ្ឋាភិបាល និងធ្វើការសាងសង់។
យោងតាមលិខិតអនុញ្ញាតរបស់ទីស្តីការគណៈរដ្ឋមន្ត្រី ចុះថ្ងៃទី០៣ ខែមិថុនា ឆ្នាំ២០១៤និងបានផ្សព្វផ្សាយជាសាធារណៈ នៅថ្ងៃទី១១ សីហា ២០១៤ រាជរដ្ឋាភិបាលកម្ពុជាតាមរយៈទីស្តីការគណៈរដ្ឋមន្ត្រី បានអនុញ្ញាតឲ្យក្រុមហ៊ុនសាជីវកម្មសំណង់ស្ពានថ្នល់ចិន (CRBC) សាងសង់ស្ពានឆ្លងកាត់ទន្លេមេគង្គចំនួន ២កន្លែងបន្ថែមទៀត ដែលមួយធ្វើនៅក្នុងតំបន់ជ្រោយចង្វា (ទន្លេមេគង្គលើ) តភ្ជាប់ពីសង្កាត់ជ្រោយចង្វារ ខណ្ឌជ្រោយចង្វារាជធានីភ្នំពេញ ទៅខេត្តកណ្ដាល ត្រង់ចំណុចភូមិឃុំស្វាយជ្រុំ ស្រុកខ្សាច់កណ្ដាល និងមួយខ្សែទៀត តភ្ជាប់ពីភូមិក្តីតាកុយសង្កាត់ព្រែកឯង ខណ្ឌច្បារអំពៅ រាជធានីភ្នំពេញទៅខេត្តកណ្តាល ត្រង់ភូមិវត្តខ្សាច់ ឃុំអរិយក្សត្រ ស្រុកល្វាឯម ខេត្តកណ្តាល៕ ម៉ានូ
