ភ្នំពេញ៖ករណីឃាតកម្មបាញ់សម្លាប់ ឧកញ៉ា អ៊ឹង ម៉េងជឺ ដែលឈានដល់ការឃុំ ខ្លួនឪពុកម្តាយ និង អង្គរក្ស៤នាក់ របស់ឧកញ៉ា ថោង សារ៉ាត់ រហូតមកទល់បច្ចុប្បន្ននេះ ចៅក្រមស៊ើបសួរសាលាដំបូងរាជធានីភ្នំពេញ ពុំទាន់បិទការស៊ើបសួរនៅឡើយទេ ដោយ សារតែសមត្ថកិច្ច នៅមិនទាន់ ចាប់ខ្លួនឧកញ៉ា ថោង សារ៉ាត់ ដែលជា មេខ្លោងក្នុង សំណុំ រឿងនេះ បាននៅឡើយ។ ប៉ុន្តែ នៅដំណាក់កាលនេះ បានលេចចេញនូវ បញ្ហាមួយចំនួន នៃនីតិវិធីរបស់តុលាការគួរឲ្យកត់សម្គាល់។
លោកឧកញ៉ា អ៊ឹង ម៉េងជឺ ត្រូវបានឃាតករបាញ់សម្លាប់កាលពីវេលាម៉ោង ៧ និង ១៨នាទី យប់ថ្ងៃទី២២ ខែវិច្ឆិកា ឆ្នាំ២០១៤ ខណៈពេលលោកឧកញ៉ា អ៊ឹង ម៉េងជឺ ចុះពីរថយន្តឡិចស៊ីស ៥៧០ ដើម្បីទៅទិញផ្លែឈើ នៅមុខហាង លក់ផ្លែឈើ ឡោ តិចសេង ស្ថិតនៅផ្លូវលេខ ២៧៤ សង្កាត់ទួលស្វាយព្រៃទី២ ខណ្ឌចំការមន ។
រយៈពេល១១ថ្ងៃក្រោយមក ពោលគឺ នៅថ្ងៃទី០១ ខែធ្នូ ឆ្នាំ២០១៤ សមត្ថកិច្ចបានឃាត់ ឈ្មោះ សៀង វាសនា ឈ្មោះ មាស សម្បត្តិ និង ឈ្មោះ កូយ ចាន់ថុល នៅចំណុចក្បែរ ស្ពានទី២ ភូមិចំរើនផល សង្កាត់បឹងទំពុន ខណ្ឌមានជ័យ ខណៈធ្វើ ដំណើរតាមរថយន្តទំនើប មួយគ្រឿងរួមមានឧកញ៉ា ថោង សារ៉ាត់ រួចបញ្ជូន ទៅស្នងការ ដ្ឋាននគរបាលរាជធានីភ្នំពេញ ។
ក្រោយមក សមត្ថកិច្ចបានដោះលែងឧកញ៉ា ថោង សារ៉ាត់ ឲ្យមានសេរីភាពឡើងវិញ ។ ដោយឡែក ឈ្មោះ លី សៅ ត្រូវបាន សមត្ថកិច្ច ឃាត់ខ្លួន កាលពីវេលាថ្ងៃត្រង់ថ្ងៃទី០៣ ខែធ្នូ ឆ្នាំ២០១៤។ ក្នុងនោះ សមត្ថកិច្ចបានបញ្ជាក់ថា ឈ្មោះ សៀង វាសនា ជាជនដៃដល់ ឈ្មោះ មាស សម្បត្តិ និង ឈ្មោះ កូយ ចាន់ថុល ជាអ្នកជិះម៉ូតូបិទគូទ និង ឈ្មោះ លី សៅ ជាអ្នក ឌុបជិះដៃដល់ ។
បន្ទាប់ពីឃាត់ខ្លួនអង្គរក្ស៤នាក់របស់ឧកញ៉ា ថោង សារ៉ាត់ សមត្ថកិច្ចបានបន្តការ ឆែរឆេរភូមិគ្រឹះ របស់ឧកញ៉ា ថោង សារ៉ាត់ ស្ថិតក្នុងសង្កាត់ ចាក់អង្រែ ក្រោម ខណ្ឌមានជ័យ រហូតឈានដល់ការឃាត់ខ្លួនមនុស្ស៤នាក់បន្ថែមទៀត គឺ ឪពុក ម្តាយ ប្រពន្ឋ និង ប្អូនប្រុស របស់ឧកញ៉ា ថោង សារ៉ាត់ រួចបញ្ជូន ទៅតុលាការដើម្បីចាត់ការតាមច្បាប់។ ប៉ុន្តែក្រោយមក ប្រពន្ឋនិងប្អូនប្រុសឧកញ៉ា ថោង សារ៉ាត់ ត្រូវបានតុលាការដោះលែងវិញ ។ ដោយឡែក អង្គរក្ស របស់ឧកញ៉ា ថោង សារ៉ាត់ ត្រូវបានឃុំខ្លួនពីបទ ឃាតកម្មគិតទុកជាមុន និង បទសម គំនិត ក្នុងការបាញ់សម្លាញ់ឧកញ៉ា អ៊ឹង ម៉េងជឺ និង ម្តាយ ឪពុក របស់ឧកញ៉ា ថោង សារ៉ាត់ ត្រូវបានឃុំខ្លួន ពីបទកាន់កាប់អាវុធខុសច្បាប់ ។
បន្ទាប់ពីជាប់គុកអស់មួយរយៈ មេធាវីបានដាក់ពាក្យសុំឲ្យឪពុកម្តាយរបស់ឧកញ៉ា ថោង សារ៉ាត់ បាននៅក្រៅឃុំ បណ្តោះ អាសន្ន តែត្រូវតុលាការ បដិសេធ ។ ដោយឡែក ប្រពន្ឋរបស់អង្គរក្ស៤នាក់ រហូតមកទល់ពេលនេះ មិនទាន់បានជួបប្តីក្នុងពន្ឋនាគារ នៅឡើយ ទេ តែមេធាវី បានចូលជួប រួចហើយ ។
ពាក់ព័ន្ឋបញ្ហានេះ លោកមេធាវី ស៊ី សត្យា បានឲ្យដឹងថា លោកបានដាក់ពាក្យសុំ ថតចម្លងសំណុំរឿង តែចៅក្រម ស៊ើបសួរមិនទាន់អនុញ្ញាតនោះទេ ។ ប្រធានគណៈមេធាវី លោក ប៊ុន ហុន បានថ្លែងថា ប្រសិនបើករណីដូចនេះមែន ពោលគឺចៅក្រមមិនអនុញ្ញាតឲ្យ ថតចម្លងសំណុំរឿង នោះ គឺតុលាការ ធ្វើខុសច្បាប់ ដោយយោងតាមមាត្រា១២៩ នៃក្រម នីតិវិធីព្រហ្មទណ្ឌ ។ មាត្រា១២៩ ត្រង់កថាខណ្ឌទី៥ បានចែងថា “ មេធាវី ឬ លេខាធិការ របស់មេធាវី ត្រូវបានអនុញ្ញាតដោយចៅក្រមស៊ើបសួរ ឲ្យធ្វើការថតចម្លង ដោយខ្លួនជាអ្នក ចេញសោហ៊ុយ និង ក្រោមការត្រួតពិនិត្យរបស់ក្រឡាបញ្ជី ” ។
ជុំវិញការចោទប្រកាន់នេះ លោកចៅក្រមលី សុខលេង បានបដិសេធថា លោក មិនមែនមិនឲ្យមេធាវី ថតចម្លង សំណុំរឿងនោះទេ តែមិនទាន់ឲ្យ ដោយសារតែឯកសារ មិនទាន់ គ្រប់ជ្រុងជ្រោយ ៕ // fpm
ឱពុកម្តាយរបស់ថោង សារ៉ាត់
