ស៊ីរី៖ក្រុមការពារជនស៊ីវិល “មួកស” របស់ប្រទេសស៊ីរីបានប្រាប់ក្រុមអ្នកស៊ើបអង្កេតឧក្រិដ្ឋកម្មសង្គ្រាមរបស់អង្គការសហប្រជាជាតិនៅក្នុងលិខិតមួយដែលបានមើលឃើញដោយ Reuters កាលពីថ្ងៃព្រហស្បតិ៍ថា ការវាយប្រហារតាមអាកាសរបស់រុស្ស៊ីក្នុងទីក្រុងអាឡេប៉ូនៃប្រទេសស៊ីរីបានសម្លាប់ជនស៊ីវិលចំនួន១,២០៧នាក់ដែល៣៨០នាក់ក្នុងចំណោមនោះគឺជាកុមារ។
ក្រុមមួកសុវត្ថិភាព បណ្តាញសិទ្ធិមនុស្សស៊ីរី សមាគមគ្រូពេទ្យឯករាជ្យនិងមជ្ឈមណ្ឌលឯកសារការរំលោភបំពានបានគូសបញ្ជាក់អំពីការចោទប្រកាន់របស់ពួកគេប្រឆាំងនឹងប្រទេសរុស្ស៊ីក្នុងឯកសារ៣៩ទំព័រមួយដែលបានដាក់ជូនទៅគណៈកម្មការស៊ើបអង្កេតស៊ីរីរបស់ UN។
ឯកសារនេះបានដាក់ការចោទប្រកាន់អំពីការវាយប្រហារប្រមាណ៣០៤លើកដែលបានអនុវត្តជាចម្បងចន្លោះខែកក្កដាដល់ខែធ្នូនៅក្នុងតំបន់អាឡេប៉ូដែលក្រុមនេះនិយាយថា មាន “លទ្ធភាពខ្ពស់” នៃការទទួលខុសត្រូវពីរុស្ស៊ី។
ទោះបីជាយ៉ាងណាក៏ដោយ បេសកកម្ម UN របស់រុស្ស៊ីមិនអាចធ្វើអត្ថាធិប្បាយភ្លាមៗបានទេស្តីពីការចោទប្រកាន់នេះ។ ប្រទេសរុស្ស៊ីដែលបានគាំទ្រការវាយលុកយោធារបស់កងទ័ពរដ្ឋាភិបាលស៊ីរីនៅទីក្រុងអាឡេប៉ូបាននិយាយថា ខ្លួនបានបញ្ឈប់ការវាយប្រហារតាមអាកាសនៅទីនោះនៅពាក់កណ្តាលខែតុលា។
លិខិតរបស់ក្រុមមួកសដាក់ជូនក្រុមស៊ើបអង្កេតរបស់ UN បានអះអាងថា“មានភស្តុតាងបញ្ជាក់យ៉ាងច្បាស់ថា ប្រទេសរុស្ស៊ីបានប្រព្រឹត្តឬបានផ្សំគំនិតក្នុងឧក្រិដ្ឋកម្មសង្គ្រាមនៅប្រទេសស៊ីរី”។
ឯកសារនេះបានបញ្ជាក់ថា ការចោទប្រកាន់ទាំងនេះគឺផ្អែកលើចម្លើយសាក្សីនិងភ័ស្តុតាងដែលរួមបញ្ចូលទាំងវីដេអូការកំណត់អត្តសញ្ញាណយន្តហោះទទួលខុសត្រូវចំពោះការវាយប្រហារ ខ្សែអាត់សំឡេងចេញពីកាប៊ីនយន្តហោះដែលគេស្តាប់បាននិងគ្រាប់ដែលបានប្រើ៕
