កំពង់ចាម៖ ព្រះសង្ឃ២អង្គ ត្រូវបានកម្លាំងនគរបាល ស្រុកជើងព្រៃឃាត់ខ្លួន រួមនឹងមនុស្ស៤នាក់ទៀត ខណៈព្រះសង្ឃ២អង្គនេះ បានស្លៀកពាក់ស៊ីវិលចូលច្រៀងខារ៉ាអូខេយីហោ ជា ធិតា ស្ថិតនៅភូមិស្គន់ ឃុំសូទិព្វ ស្រុកជើងព្រៃ ខេត្ដកំពង់ចាម។
ការឃាត់ខ្លួននេះ បានធ្វើឡើង បន្ចាប់ពីមានប្រជាពល រដ្ឋបានទូរស័ព្ទទៅនគរបាលបញ្ចាំបញ្ជានៅ ស្នងការដ្ឋាននគរបាលខេត្ដកំពង់ចាម កាលពីវេលាម៉ោង១រំលងអធ្រាត្រឈានចូល ថ្ងៃទី២៧ ខែមីនា ឆ្នាំ២០១៥។ក្រោយពីសមត្ថកិច្ចស្រាវជ្រាវ និងត្រួតពិនិត្យរហួតឃាត់ខ្លួនបាននៅនឹងកន្លែងតែម្តង។
សង្ឃដែលសមត្ថកិច្ចឃាត់ឈ្មោះ ឡាច ហ៊ាន ព្រះជន្ម៤២វស្សា នៅភូមិទួលចំបក់ ឃុំបារាយណ៍ ស្រុកព្រៃឈរ ខេត្តត្បូងឃ្មុំ បច្ចុប្បន្នគង់នៅវត្តរស្មីសង្កែ ក្នុងភូមិសង្កែ ឃុំ-ស្រុកព្រៃឈរ ។ និងមួយអង្គទៀតនាម ហែម បញ្ញា ព្រះជន្ម២៤វស្សា នៅភូមិកងតាណឹង ឃុំកងតាណឹង ស្រុកកងមាស ខេត្តកំពង់ចាម បច្ចុប្បន្នគង់នៅវត្តព្រែកកុយ ក្នុងឃុំព្រែកកុយ ស្រុកកងមាស។រីឯអន្ទិតដែលធ្លាប់បួស ជាសង្ឃនោះ ឈ្មោះសេន ចាន់ណា អាយុ ៣៥ឆ្នាំ រស់នៅភូមិព្រែកមួយរយ ឃុំសំបួរ មាស ស្រុកមុខកំពូល ខេត្ត កណ្តាល ក៏ត្រូវសមត្ថកិច្ចឃាត់មកសួរនាំផងដែរ។
បច្ចុប្បន្ន សង្ឃទាំង២អង្គរួមនឹងបក្ខពួក ត្រូវសមត្ថកិច្ចនគរបាលស្រុកជើងព្រៃ ធ្វើកំណត់ហេតុ និងទាក់ទង ទៅការិយាល័យធម្មការស្រុក និងមន្ទីរធម្មការ និង សាសនាខេត្ត រួមនឹងមេគណខេត្ត ដើម្បីមានចំណាត់ការចំពោះរឿងនេះ៕
