ភ្នំពេញ៖ ស្ពានត្សឹបាសា (Tsubasa ) ឬហៅថា ស្ពានអ្នកលឿង ដែលមានចម្ងាយជាង៦០គីឡូម៉ែត្រ ពីរាជធានីភ្នំពេញនឹងត្រូវដាក់សម្ភោធឲ្យប្រើប្រាស់ជាផ្លូវការ នៅថ្ងៃទី០៦ ខែមេសាស្អែកនេះ ក្រោមអធិបតីភាពលោកនាយករដ្ឋមន្ដ្រី ហ៊ុន សែន ព្រមទាំងតំណាងជាន់ខ្ពស់ របស់រដ្ឋាភិបាលជប៉ុន នឹងអញ្ជើញជាអធិបតី ក្នុងពិធីសម្ពោធនោះ។
យោងតាមសេចក្ដីប្រកាសព័ត៌មាន របស់ស្ថានទូតជប៉ុនប្រចាំកម្ពុជា ចេញផ្សាយកាលពីថ្ងៃទី០៣ ខែមេសា ឲ្យដឹង ថា ស្ពានត្សឹបាសា ត្រូវបានសាងសង់ឡើងក្រោមហិរញ្ញប្បទានឥតសំណង របស់រដ្ឋាភិបាលជប៉ុន តាមរយៈគម្រោងសាងសង់ស្ពានអ្នកលឿង ដែលត្រូវបានអនុវត្តន៍ស្របទៅតាមសំណើរបស់រាជរដ្ឋាភិបាលកម្ពុជា សម្រាប់ហិរញ្ញប្បទានឥតសំណងបន្ទាន់លើការ សាងសង់ស្ពានដែលមានប្រវែង២២១៥ម៉ែត្រ និងផ្លូវតភ្ជាប់ស្ពានមានប្រវែង៣១០០ម៉ែត្រ។
ទឹកប្រាក់សរុបសម្រាប់ការសាងសង់ មានចំនួន ១១៩,៤លានយ៉េន ដែលប្រហាក់ប្រ ហែលនឹង១២៧លានដុល្លារសហរដ្ឋអាមេរិក ហើយស្ពានត្សឹបាសា មិនមែនគ្រាន់តែ ភ្ជាប់ផ្នែកទាំងសងខាងនៃផ្លូវជាតិលេខ១ប៉ុណ្ណោះទេ ប៉ុន្តែក៏ភ្ជាប់ប្រទេសទាំងអស់ នៅក្នុងតំបន់ផងដែរ។
សេចក្ដីប្រកាសព័ត៌មានដដែល ឲ្យដឹងបន្ដ ថា ស្ពានត្សឹបាសានេះ នឹងធ្វើឲ្យផ្លូវជាតិលេខ១មាន សមត្ថភាពគ្រប់គ្រាន់ សម្រាប់ការដឹកជញ្ជូននៅក្នុងតំបន់ និងឆ្លើយតបទៅនឹង គោលនយោបាយនៃការតភ្ជាប់បណ្តាញផ្លូវហាយវ៉េអាស៊ាន ឬផ្លូវហាយវ៉េអនុតំបន់ទន្លេមេគង្គផងដែរ។
ស្ពានត្សឹបាសា និងផ្លូវជាតិលេខ១នេះ ដើរតួនាទីយ៉ាងសំខាន់ ជាផ្នែកមួយនៃការតភ្ជាប់តំបន់អាស៊ី និងអាស៊ានហាយវ៉េលេខ១ ដែលផ្តល់ឱកាសក្នុងការបង្កើនប្រាក់ចំណូលពីការប្រ កួតប្រជែងពាណិជ្ជកម្ម-ទេសចរណ៍ ឧស្សាហកម្ម-កសិកម្ម សុខាភិបាល-សន្តិសុខ និងឱកាសទទួលបានការងារជាដើម។
ម្យ៉ាងទៀតស្ពាននេះ នឹងជួយកាត់បន្ថយពេលវេលាធ្វើដំណើរ និងការចំណាយទៅលើការដឹកជញ្ជូនបានយ៉ាងច្រើន ដែលនឹងផ្តល់នូវអត្ថប្រយោជន៍ យ៉ាងច្រើនដល់ប្រជាពលរដ្ឋ និងសកម្មភាពអាជីវកម្ម ដែលមិនមែនតែចំពោះប្រជាពលរដ្ឋ ដែលរស់នៅតាមផ្លូវជាតិ និងស្ពាននោះទេ តែក៏ចំពោះប្រជាជនកម្ពុជា ទាំងអស់ និងបណ្តាប្រទេសជាសមាជិកអាស៊ានផងដែរ។
រដ្ឋាភិបាលជប៉ុន បាននិងផ្តល់ហិរញ្ញប្បទាន ឥតសំណងសម្រាប់ ការសាងសង់ផ្លូវជាតិលេខ១ ពីភ្នំពេញ ទៅអ្នកលឿង ដែលការសាងសង់ចែកជា ៣ ដំណាក់កាល ដែលត្រូវបានបញ្ចប់រួចរាល់ហើយ នៅសល់ តែដំណាក់កាលទី៤ ដែលមាន ប្រវែង ៤គីឡូម៉ែត្រ ដែលនឹងចាប់ផ្តើម ធ្វើការសាងសង់ ក្នុងពេលឆាប់ៗ ខាងមុខនេះ តាមការគ្រោងទុក អាចនឹងចាប់ផ្តើម ពីខែមេសា ឆ្នាំ២០១៥ នេះ៕
