កំពង់ឆ្នាំង៖ទូកឆៃរ៉ារបស់ជនជាតិយួន៤គ្រឿង ដែលបំពាក់ដោយម៉ាស៊ីនខ្យល់ និងជនជាតិវៀតណាមចំនួន១៣នាក់ ត្រូវមន្ត្រីយោធាភូមិភាគពិសេសម្នាក់រត់ការ(កាង)ឲ្យចូលនេសាទ ហ៊ុំចាប់ ត្រី សម្រាស់ ខុសច្បាប់ នៅចំណុចអន្លង់ជ្រៃ ភូមិកោះតាម៉ូវ ឃុំកំពង់ព្រះគគីរ ស្រុកបរិបូណ៌ ខេត្ត កំពង់ឆ្នាំង។ទោះជាយ៉ាងនេះក្តី ត្រូវបានប្រជាពលរដ្ឋភូមិកោះតាម៉ូវ និងអ្នកកាសែតមួយក្រុមរាយការណ៍ឲ្យសមត្ថកិច្ចបង្ក្រាប កាលពីព្រឹក ថ្ងៃទី២៩ ខែមីនា ឆ្នាំ២០១៥។
ជនជាតិយួនជាម្ចាស់កាណូតឆៃរាទាំង៤គ្រឿងខាងលើ បាននិយាយឲ្យដឹងថា ពួកគេ ១ឈ្មោះ យាំង ចេវ អាយុ៣៩ឆ្នាំ , ២ឈ្មោះ ចាំង យាំងមិន អាយុ៣៩ឆ្នាំ , ៣ឈ្មោះ ចាំង យាំងលុង អាយុ៣០ឆ្នាំ , ៤ឈ្មោះ ចាំង រឿង អាយុ២៤ឆ្នាំ ពួកគេរស់នៅក្នុងភូមិកណ្តាលសង្កាត់ផ្សារឆ្នាំង ក្រុងកំពង់ឆ្នាំង ដោយឡែកជនជាតិវៀតណាមប្រុសស្រី ៩នាក់ទៀតគឺជាកម្មកររបស់ពួកគេ។ ពួកជនល្មើសទាំង៤នាក់ខាងលើនេះ បានបញ្ជាក់ឲ្យដឹងថា ពួកគេហ៊ានរកដូច្នេះដោយសារមានមន្ត្រីយោធាភូមិភាគពិសេសម្នាក់ ជាអ្នករត់ការបង់លុយអោយមន្ត្រីជំនាញរួចអស់ហើយទើបគេអនុញ្ញាតអោយ រកដូច្នេះ។
ក្រោយពីក្រុមអ្នកយកព័ត៌មាន និងប្រជាពលរដ្ឋបានរាយការណ៍ពីបទល្មើសនេះជូនលោក ឯក ស៊ុនរស្មី ព្រះរាជអាជ្ញារងសាលាដំបូងខេត្ត និងលោក សោម ភិរុណ នាយខណ្ឌរដ្ឋបាលជលផលខេត្តរួចមក យើងឃើញលោក ផាន់ សុភឿន ជាមន្ត្រីយោធា និងលោក ទៀង សារុន ជាមន្ត្រីនគរបាលឈរជើងការពារ ឡូត៍អភិរក្សឃុំកំពង់ព្រះគគីរ បានមកចាប់យកជនល្មើសនិងវត្ថុតាងទៅកាន់ទីស្នាក់ការរបស់ខ្លួន ដើម្បីប្រគល់ឲ្យសមត្ថកិច្ចជំនាញកសាងសំណុំរឿងតាមផ្លូវច្បាប់៕
