ភ្នំពេញ ៖ ដូចការគ្រោងទុក រដ្ឋសភា នីតិកាលទី៦ បានបើកសម័យប្រជុំដំបូងនៅថ្ងៃពុធទី៥ ខែកញ្ញា ឆ្នាំ២០១៨ នេះ ក្រោមព្រះរាជអធិបតីដ៏ខ្ពង់ខ្ពស់របស់ព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ហើយក្នុងពិធីដ៏ មហាឡារឹក និងជាប្រវត្តិសាស្ត្រនេះ ឥស្សរជនជាន់ខ្ពស់ អង្គទូត ប្រចាំព្រះរាជាណាចក្រ កម្ពុជា និងតំណាងអង្គការក្រៅរដ្ឋាភិបាលមួយចំនួន ក៏ត្រូវបានអញ្ជើញឲ្យចូលរួមជាកិត្តិយស ផងដែរ ។
ក្នុងឱកាសនេះព្រះករុណា ព្រះមហាក្សត្រ បានព្រះរាជទាននូវព្រះរាជសុន្ទរកថា បើក សម័យប្រជុំដំបូងនៃរដ្ឋសភា នីតិកាលទី៦ ដោយបានបញ្ជាក់ថា រដ្ឋសភាដែលជាអង្គការមាន អំណាចនីតិប្បញ្ញត្តិ នឹងបន្តបំពេញភារកិច្ចរបស់ខ្លួនដូចមានកំណត់ក្នុងរដ្ឋធម្មនុញ្ញ និងច្បាប់ជា ធរមាន ដើម្បីបន្តនិរន្តភាពនយោបាយ សេដ្ឋកិច្ច សង្គម វប្បធម៌ កសាងព្រះរាជាណាចក្រ កម្ពុជា ជារដ្ឋដ៏រឹងមាំ និងជឿនលឿន ដោយផ្អែកលើច្បាប់ ធានាការអនុវត្តន៍ច្បាប់ដោយស្មើ ភាពសម្រាប់ប្រជាពលរដ្ឋគ្រប់រូប និងធានាការលើកស្ទួយសិទ្ធិសេរីភាពគ្រប់បែបយ៉ាងរបស់ ប្រជាពលរដ្ឋ។ ព្រះអង្គបានបន្ថែមថា តំណាងរាស្ត្រក្នុងរដ្ឋសភា ជាតំណាងប្រជាជាតិខ្មែរទាំង មូល ធ្វើយ៉ាងណាខិតខំប្រឹងប្រែងបន្ថែមទៀតជួយប្រជាពលរដ្ឋឲ្យរស់នៅបានស្មើភាពគ្នាក្នុង ជំនឿសាសនា ការសិក្សារៀនសូត្រ និងការមានការងារធ្វើសមរម្យទៅតាមកម្លាំងសមត្ថភាព និងកំរិតវិជ្ជារបស់ខ្លួន ហើយថា ច្បាប់ទាំងឡាយដែលរដ្ឋសភាបានអនុម័ត គឺជាឧបករណ៍ គតិយុត្តិសម្រាប់រាជរដ្ឋាភិបាលអនុវត្ត និងលើកកម្ពស់នីតិរដ្ឋ សំដៅឲ្យប្រទេសយើងមានក្រប ខ័ណ្ឌច្បាប់គ្រប់គ្រាន់ និងល្អ ស្របតាមការវិវឌ្ឍន៍រីកចំរើនរបស់សង្គមជាតិ។
សូមជម្រាបជូនថា បន្ទាប់ពីពិធីបើកសម័យប្រជុំដំបូងនៅព្រឹកនេះ ក្រោមព្រះរាជ
អធិបតីភាព ព្រះករុណាព្រះមហាក្សត្រ សម័យប្រជុំរដ្ឋសភាលើកទី១ នីតិកាលទី៦ បានផ្តើម ការងារធ្វើឡើងក្រោមអធិបតីភាពរបស់សម្តេចអគ្គមហាពញាចក្រី ហេង សំរិន ព្រឹទ្ធសមាជិក រដ្ឋសភាដើម្បី៖ (១).សម្រេចអំពីសុពលភាពនៃអាណត្តិ របស់សមាជិកនីមួយៗ និង (២).ការអនុម័តបទបញ្ជាផ្ទៃក្នុងនៃរដ្ឋសភា នីតិកាលទី៦។ ដោយឡែកនៅថ្ងៃព្រហស្បតិ៍ទី៦ ខែកញ្ញា វេលាម៉ោង ៨ ព្រឹកស្អែកនេះ រដ្ឋសភាត្រូវធ្វើការបោះឆ្នោត ដើម្បីជ្រើសតាំងប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋសភា ហើយមាជិក រដ្ឋសភាទាំង ១២៥រូប មកពីគណបក្សប្រជាជនកម្ពុជាដែលកើតចេញពីការបោះឆ្នោតជ្រើស
តាំងតំណាងរាស្ត្រ នីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ ដែលមានគណបក្ស
នយោបាយចំនួន ២០ចូលរួម នឹងផ្តល់សេចក្តីទុកចិត្តចំពោះរាជរដ្ឋាភិបាលផងដែរ ហើយ ចំពោះតំណាងរាស្ត្រ នីតិកាលទី៦ ទាំង ១២៥រូប តំណាងឲ្យមណ្ឌលទាំង ២៥ ទូទាំងប្រទេស នឹងត្រូវចូលធ្វើសច្ចាប្រណិធាននៅព្រះទីនាំងទេវាវិនិច្ឆ័យក្នុងព្រះបរមរាជវាំង នាល្ងាចថ្ងៃទី៥ ខែកញ្ញា ឆ្នាំ២០១៨ នេះ៕
