ខេត្តកោះកុង ៖ ប្រជាពលរដ្ឋជាច្រើននាក់ ដែលកំពុងរស់នៅក្នុងភូមិថ្មស ឃុំថ្មស ស្រុកបុទុមសាគរ ខេត្តកោះកុង បានរិះគន់លោកមេភូមិទើបឡើងថ្មី ដែលត្រូវជាខ្សែស្រឡាយរបស់មេឃុំថ្មស គឺលោក អិច កួន ដោយលើកឡើងថា កំពុងប្រព្រឹត្តអំពើពុករលួយ ដោយភ្ជាប់នូវលក្ខខ្ឌណស្មុកស្មាញជាលេស ដើម្បីទារលុយថ្លៃចុះហត្ថលេខាលើលិខិតបញ្ជាក់ការផ្ទេរកម្មសិទ្ធិកាន់កាប់ដីធ្លី ផ្ទុយពីការណែនាំរបស់ប្រមុខរាជរដ្ឋាភិបាល។

ការលើកឡើងពីប្រជាពលរដ្ឋជាច្រើននាក់យ៉ាងដូច្នេះ ខណៈដែលពួកគាត់ជាជនក្រីក្រហើយត្រូវការផ្ទេរសិទ្ធិកាន់កាប់ដីធ្លីទៅឲ្យអ្នកផ្សេង តែគេតម្រូវឲ្យយកទៅធ្វើនៅផ្ទះរបស់លោកមេភូមិផ្ទាល់ទៅវិញ ហើយត្រូវបានមេភូមិថ្មីនោះ ទាមទារប្រាក់កម្រៃពី៣០០ ទៅ៥០០ ដុល្លារ ចំណែកឯស្មៀនឃុំ វិញគឺទារពី៣០០ ទៅ៥០០ ដូចគ្នាដែរ ឬក៏អាចទៅដល់ ១០០០ ដុល្លារ ក៏មានដែរ ក្នុងការចុះហត្ថលេខាបញ្ជាក់ទទួលស្គាល់។ ត្រង់លក្ខណៈ នេះហើយ ធ្វើឲ្យប្រជាពលរដ្ឋមានការព្រួយបារម្ភ និងធ្វើការ រិះគន់ចំៗថា លោក ជា សុថាវិរិទ្ធ ដែលគេស្គាល់ថា ជាក្មួយរបស់លោក អិច កួន ឃុំថ្មស ប្រព្រឹត្តអំពើពុករលួយ។

តាមប្រភពព័ត៌មានបានឲ្យដឹងថា ប្រជាពលរដ្ឋជាច្រើននាក់ដែលរស់នៅក្នុងភូមិនេសាទសមុទ្រ មួយនេះរួមទាំងមតិមហាជនផងដែរនោះ ពួកគាត់បានយកឯកសារផ្ទេរសិទ្ធិដីធ្លី ទៅបញ្ជាក់ឲ្យអ្នកថ្មីដើម្បីយកទៅគ្រប់គ្រងបន្ត ហើយត្រូវលោកមេភូមិ និយាយថា ឯកសារនេះ ទាល់តែអោយលុយគាត់ចំនួន ៥០០ដុល្លារ បានគាត់(មេភូមិ)ព្រមស៊ីញ៉េអោយ និងបានពោលពាក្យថា លោក ស៊ីញ៉េ មួយខ្វាច់យក ៥០០ដុល្លារអាមេរិចនេះ គឺយកតម្លៃ ក្នុងនាមរាប់អាន និងស្គាល់គ្នាផង បើមិនស្គាល់វិញ លោកអាចទាមទារគេបានរហូតដល់ ១០០០ដុល្លាឯណោះ។

ប្រភពដដែលបន្តថា ដោយសារតែសកម្មភាពទាំងនេះ ហើយទើបប្រជាពលរដ្ឋដែលរស់នៅក្នុងភូមិថ្មស ឃុំថ្មស សម្ដែងការមិនពេញចិត្ត និង បាក់ទឹកចិត្តខណៈដែលមេភូមិរូបនេះ បម្រើតែការងារដើម្បីលាភសក្ការៈផ្ទាល់ខ្លួនធំជាង ការងាររបស់ពលរដ្ឋដែលរស់នៅក្នុងឃុំថ្មស ទាំងមូល។

មិនតែប៉ុណ្ណោះប្រជាពលរដ្ឋទាំងអស់ដែលកំពុងរស់នៅ ក្នុងភូមិថ្មស ឃុំថ្មស សំណូមពរដល់អាជ្ញាធរគ្រប់លំដាប់ថ្នាក់ពាក់ព័ន្ធ ជាពិសេស គឺ អង្គភាពប្រឆាំងអំពើពុករលួយ ឲ្យចុះមកតាមដានស៊ើបអង្កេតអាកប្បកិរិយាឫកពារ របស់មេភូមិទើបឡើងថ្មីឈ្មោះជា សុថាវិរិទ្ធ នេះផង។

ប្រភពដដែលបន្តទៀតថា ខ្សែស្រឡាយរបស់បងប្អូនលោកមេឃុំថ្មស អិច កួន គឺមានតាំងពីថ្នាក់ មេក្រុម មេភូមិ ស្មៀនស្មៀនឃុំ រហូតដល់ថ្នាក់ឃុំ ជាលក្ខណប្រព័ន្ធ។

នៅរសៀលថ្ងៃទី១៦ ខែឧសភា ឆ្នាំ២០១៩ នេះ ភ្នាក់ងារព័ត៌មាន មេគង្គប៉ុស្តិ៍ មិនទាន់អាចសុំការពន្យល់ពីលោកមេភូមិទើបឡើងថ្មី ដែលត្រូវប្រជាពលរដ្ឋរិះគន់នោះនៅឡើយទេ៕ ដោយ ៖  រិទ្ធី