ព្រះសីហនុះបុរសម្នាក់ត្រូវទាហានសឹករងខេត្ត ចាប់ឃាត់ខ្លួន និងវាយដំមុនពេលបញ្ជូនទៅឲ្យខាងមេព្រៃដោយចោទថា បុរសនោះបានចូលទៅកាប់បំផ្លាញព្រៃឈើក្នុងតំបន់ហាមឃាត់។នេះបើតាមការអះអាងរបស់ពលរដ្ឋដែលត្រូវគេឃាត់ខ្លួន។
អ្នកឆ្លើយឆ្លងព័ត៌មានខេត្តព្រះសីហនុបានឲ្យដឹងថា កម្លាំងកងទព័តំបន់សឹករងខេត្ត២រូប បានចាប់ឃាត់ខ្លួនបុរសម្នាក់ពីតំបន់ព្រៃការពារក្បាលឆាយនាំមកប្រគល់អោយខាងរដ្ឋបាលព្រៃឈើខេត្ត្តនាព្រឹកថ្ងៃទី១៨កក្កដានេះក្រោមបទចោទប្រកាន់ថាបុរសម្នាក់នោះកាប់បំផ្លាញព្រៃនៅក្បាលឆាយ ប៉ុន្តែភាគីខាងប្រជាពលរដ្ឋបានបដិសេធថាខ្លួនគ្រាន់តែជាអ្នកស៊ីឈ្នួលដោយប្រើចបជីកជំរះស្មៅអោយគេតែប៉ុណ្ណោះមិនបានធ្វើសកម្មភាពប្រើឧបករណ៍កាប់បំផ្លាញព្រៃឈើណាមួយឡើយ និងបន្ទោសទៅកាន់ខាងកងទព័វិញថា បានប្រើហិង្សាវាយទាត់ធាក់គាត់យ៉ាងដំណំក្នុងពេលឃាត់ខ្លួននេះ។
យ៉ាងណាក៍ដោយរដ្ឋបាលខេត្តព្រះសីហនុបានប្រកាសញឹកញាប់ថា តំបន់ក្បាលឆាយមិនអនុញ្ញាតអោយមានការតាំងទីលំនៅឬកាប់បំផ្លាញព្រៃឈើឡើយដើម្បីរក្សាទុកជាប្រភពទឹកស្អាត ។
ជុំវិញរឿងរ៉ាវការចាប់ខ្លួនពលរដ្ឋខាងលើមិនទាន់មានការបភ្លឺពីមន្ត្រីផ្លូវការណាមួយនៅឡើយ ខណៈដែលក្រុមអ្នកសារពត័មានច្រើនអង្គភាពក៍កំពុងតាមដានការវិវត្តនៃរឿងរ៉ាវនេះយ៉ាងយកចិត្តទុកដាក់៕ដោយ៖អ៊ួង វរិន្ទ
បុរសរងគ្រោះ
ប្រជាពលរដ្ឋមកចោមរោមតវ៉ាការចាប់ខ្លួនវាយដំបុរសរងគ្រោះ
