ភ្នំពេញ៖លោក យឹម សុជាតិ ដែលទើបចូលកាន់តំណែងជាប្រធានការិយាល័យនគរបាលប្រឆាំងបទល្មើសសេដ្ឋកិច្ចរាជធានីភ្នំពេញនាពេលថ្មីៗនេះ ត្រូវបានមន្ត្រីនគរបាលនៅជុំវិញការិយាល័យមួយនេះលាតត្រដាងថា លោកគ្មានសមត្ថភាព និងបានចាត់តាំងកម្លាំងដើរប្រមាញ់បទល្មើសសេដ្ឋកិច្ចយកលុយក្រៅច្បាប់មកឲ្យខ្លួនតាមទំនើងចិត្ត។
មន្ត្រីនគរបាលមួយរូបភ្ជាប់ដោយលក្ខខណ្ឌមិនបញ្ចេញឈ្មោះ បានទម្លាយឲ្យដឹងថា ក្នុងការិយាល័យប៉ូលីសសេដ្ឋកិច្ចក្រុងក្រោមការដឹកនាំរបស់លោក យឹម សុជាតិ សព្វថ្ងៃនេះមានភាពរញ៉េរញ៉ៃសម្បើមណាស់ និងមានអំពើពុករលួយទៀតផង។
ប្រភពដដែលបន្តថា ដោយសារតែលោក យឹម សុជាតិ ជាមន្ត្រីដែលខ្វះសមត្ថភាពដឹកនាំ និងគ្មានបទពិសោធន៍ផងនោះ ទើបលោកធ្វើតាមតែសម្តីរបស់លោក ជុំ ណារ័ត្ន អនុប្រធានការិយាល័យកណ្តាលប្រឆាំងបទល្មើសសេដ្ឋកិច្ច និងលោក មិញ ចន្ថា ដែលមានតួនាទីជាអនុប្រធានការិយាល័យប្រឆាំងបទល្មើសសេដ្ឋកិច្ចប៉ុណ្ណោះ បើទោះបីជាការផ្តល់គំនិតយោបល់នោះផ្ទុយទៅនឹងបទបញ្ជាផ្ទៃក្នុង ឬច្បាប់រដ្ឋក៏ដោយ ក៏លោក យឹម សុជាតិ យកទៅអនុវត្តន៍ទាំងទទឹងទិសដែរ ធ្វើយ៉ាងណាឲ្យតែបានចំណូលច្រកហោប៉ៅ និងយកទៅប្រគេនថ្នាក់លើ។
ប្រភពដដែលបានអះអាងថា ជាក់ស្តែងលោក ជុំ ណារ័ត្ន និងលោក មិញ ចន្ថា បានផ្តល់ដំបូន្មានឱ្យលោក យឹម សុជាតិ បង្កើតក្រុមការងារឲ្យដើរឈ្មុសឈ្មុលរកបទល្មើសសេដ្ឋកិច្ចគ្រប់ច្រកល្ហកដែលសមាជិកក្នុងក្រុមនេះមួយចំនួនគឺជាមនុស្សជំនិតរបស់លោក ជុំ ណារ័ត្ន និង មិញ ចន្ថា ។
ប្រភពខាងលើបន្តទៀតថា មិនតែប៉ុណ្ណោះលោក ជុំ ណារ័ត្ន និងលោកមិញ ចន្ថា បញ្ជាឱ្យក្រុមការងារនោះបង់លុយឱ្យមួយគុណនិងពីរទៅឱ្យលោក យឹម សុជាតិ ផ្ទុយទៅវិញលោកជុំ ណារ័ត្ន និងលោក មិញ ចន្ថា ផ្ទាល់មិនបានបង់លុយដែលខ្លួនប្រមូលបានពីបទល្មើសទៅឱ្យលោក យឹម សុជាតិ ដូចសមាជិកក្នុងក្រុមនោះទេ។ តើមានមូលហេតុអ្វីនៅពីក្រោយការមិនបង់លុយនេះ?។
ប្រភពខាងលើនៅបានទម្លាយឲ្យដឹងទៀតថា កន្លងមកលោក ជុំ ណារ័ត្ន និងលោក មិញ ចន្ថា ជាមនុស្សសំខាន់ក្នុងការរកចំណូលផ្ទេរទៅជូនលោក ជួន សុវណ្ណ ស្នងការនគរបាលជាតិរាជធានីភ្នំពេញ រាប់ម៉ឺនដុល្លារក្នុងមួយខែៗ។
ប្រភពដដែលបានបន្តរិះគន់ថា មួយរយះកន្លងមកនេះ លោក យឹម សុជាតិ ប្រធានការិយាល័យនគរបាលប្រឆាំងបទល្មើសសេដ្ឋកិច្ច ត្រូវគេមើលឃើញថាគ្មានបទពិសោធន៍ ការងារនេះទាល់តែសោះ ធ្វើអ្វីៗតាមតែការចង្អុលបង្ហាញពីលោក ជុំ ណារ័ត្ន និងលោក មិញ ចន្ថា ប៉ុណ្ណោះ ដូច្នេះហើយទើបធ្វើឱ្យការងារនៅក្នុងអង្គភាពនេះមានមិនប្រក្រតី បង្កើតបក្ខពួក និងច្របូកច្របល់ការងារមិនចេះចប់។
តាមរបាយការណ៍ដែលសារព័ត៌មាន សង្គម និងកីឡា ទទួលបានពីឈ្មោះមន្ត្រីនគរបាលដែលត្រូវបានគេដាក់ពង្រាយតាមគោលដៅសំខាន់ៗរួមមាន៖
-លោក ម៉ៅ សុគន្ធ កាន់ការងារ កសិកម្ម
-លោក អ៊ឹង សីហា កាន់កាប់ការងារផ្លូវជាតិលេខ១
-លោក ហេង សុវណ្ណកីនី ព្រលានយន្តហោះអន្តជាតិពោធ៍ចិនតុង
-លោក សុវណ្ណ ចាន់ថានិត ក្តោបក្តាប់ការងារទូរស័ព្ទគេចពន្ធគ្រប់ប្រភេទ
-លោក សៅ រ៉ា ក្តោបក្តាប់ការងារសិប្បកម្ម
-លោក អ៊ុប សោភា
-លោក អួត ស៊ីវត្ថា ក្តោបក្តាប់ការងារផ្ទះសំណាក់ ខារ៉ាអូខេ អាហារដ្ឋាន និងអាជីវកម្មគ្រប់ប្រភេទក្នុងរាជធានីភ្នំពេញ
-លោក មាស វុទ្ធី ការងារឃ្លាំងស្តុកទំនិញ
-លោក សោម ម៉ានី ការងារឃ្លាំងស្តុកទំនិញ
-លោក វង្ស ផល្លា ការងារសុខាភិបាល
-លោក នឹម ពិសី ការងារផ្លូវជាតិលេខ៥ និង ៦
-លោក នន់ ស៊ីថា ការងារទំនិញគ្រប់ប្រភេទតាមផ្សារ ផ្លែឈើ
-លោក ហៀង ឌីម៉ូ ការងារវិនិយោគ
-លោក នូ ពន្ថាច ការងារចំណត
-លោក អៀម ផល្លី ការងារឡានក្រុង
-លោក មិញ ចន្ថា ក្តោបការងារឡានអត់ពន្ធ និងឡានកាត់ត រឺហៅថា កាប់សាច់
ដោយឡែក គ្រប់ផ្លូវជាតិទាំងអស់ ពិសេសផ្លូវជាតិលេខ១ លេខ៤ និងលេខ៥ គឺបទល្មើសសេដ្ឋកិច្ចទាំងឈ្មួញតូច ទាំងឈ្មួញធំ ត្រូវបានគ្រប់គ្រងផ្តាច់មុខដោយលោក ជុំ ណារ័ត្ន ដែលជាមនុស្សជំនិតរបស់លោកស្នងការក្រុង។
ប្រភពបន្តទៀតថា ក្រុមការងារដែលដឹកនាំដោយលោក យឹម សុជាតិ ពេលចេញបេសកម្មត្រួតពិនិត្យឆែកឆេររកបទល្មើសម្តងៗ គេអាចរកបានក្នុងម្នាក់ៗចន្លោះពី៥០០ដុល្លារដល់៥០០០ដុល្លារ ទៅតាមកម្រិតនៃបទល្មើស។
គួររំលឹកផងដែរថា កាលពីថ្ងៃសៅរ៍ សប្តាហ៍មុន ក្រុមលោក យឹម សុជាតិ បានបង្ខាំងទុករថយន្តកុងតឺន័រដឹកទំនិញរោងចក្រមួយគ្រឿងរយះពេល៤ថ្ងៃទើបដោះលែង។ការបង្ខាំងយូរថ្ងៃនៅក្នុងរបងម៉ុងឌីយ៉ាល់នៅពេលនោះ បណ្តាលមកពីម្ចាស់ទំនិញមិនព្រមចំណាយតាមការតម្រូវរបស់ក្រុមលោក យឹម សុជាតិ ដែលត្រូវគេទម្លាយឲ្យដឹងថាជិតមួយម៉ឺនដុល្លារអាមេរិកអែ ណោះ។នៅពេលត្រូវសម្ភាសន៍ពាក់ព័ន្ធនឹងការចាប់រថយន្តកុងតឺន័រនេះ លោក យឹម សុជាតិ បានបង្វែឲ្យរង់ចាំលោក បញ្ញា ទៅវិញ ប៉ុន្តែក្រោយនោះបន្តិចស្រាប់គេឃើញរថយន្តកុងតឺន័រនោះបើកចេញទៅដោយសុវត្ថិភាព។
មេគង្គប៉ុស្តិ៍ បានព្យាយាមទាក់ទងទៅលោក យឹម សុជាតិ ដើម្បីសុំការបំភ្លឺដែរ ប៉ុន្តែទូរស័ព្ទរបស់ លោកមិនអាចទាក់ទងបានទេ ចំណែកលោក ស្នងការក្រុង ជួន សុវណ្ណ ក៏មិនអាចភ្ជាប់ទូរស័ព្ទដើម្បីសុំការពន្យល់ បានដែរ កាលពីរសៀលម្សិលម៉ិញនេះ៕ ដោយ៖ជុំ សុខា
