ភ្នំពេញៈ ស្រ្តីម្នាក់បានរងរបួសយ៉ាងធ្ងន់ធ្ងរត្រង់កន្លាក់ដៃឆ្វេង និងកំភួនជើងឆ្វេង ដោយការបាញ់ប្រហារពីខ្មាន់កាំភ្លើងម្នាក់កាលវេលាម៉ោង ១៨ៈ០០នាទីល្ងាច ថ្ងៃទី២០ ខែធ្នូ ឆ្នាំ២០១៥ នៅក្នុងបុរីពិភពថ្មី ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមប្រភពព័ត៌មានបានអោយដឹងថា ស្រ្តីម្នាក់ឈ្មោះ ចាន់ ដា អាយុ ៣៣ឆ្នាំ មុខរបរលក់ដូរ ស្នាក់នៅផ្ទះលេខ៦ ផ្លូវលេខ២៣ ក្នុងបុរីពិភពថ្មី ស្ថិតនៅភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ ពេលនេះកំពុងត្រូវជួយសង្រ្គោះនៅមន្ទីពេទ្យព្រះកុសុម: ហៅពេទ្យលោកសង្ឃ។
មុនពេលកើតហេតុ ស្រ្តីរងគ្រោះកំពុងអង្គុយនិយាយទូរស័ព្ទនៅខាងមុខផ្ទះ ស្រាប់តែមានជនមិនស្គាល់អត្តសញ្ញាណជិះម៉ូតូម្នាក់ឯងម៉ាកឌ្រីមC125 ពណ៍ខ្មៅ មិនស្គាល់ផ្លាកលេខ បានដកកាំភ្លើងខ្លីមិនស្គាល់ម៉ាក បាញ់ទៅលើជនរងគ្រោះចំនួន២គ្រាប់ រួចគេចខ្លួនបាត់តែម្តង។
បើតាមលោក អធិការ ម៉ក ហុង បានប្រាប់ថា ករណីនេះសមត្ថកិច្ ចបានផ្តោតការសង្ស័យថាជារេឿងគំនុំ ឬស្នេហាត្រីកោណ មិនមែន ជាករណីប្លន់ទេ។
សមត្ថកិច្ចកំពុងសាកសួរសាក្សី និងជនរងគ្រោះនៅឯមន្ទីពេទ្យ ដើម្បីឲ្ យដឹងពីទំនាក់ទំនងជាមួយមិត្តភ័ក្ត្រ ងាយស្រួលក្នុងការវែកមុខជនដៃ ដល់នាំយកមកផ្តន្ទាទោសទៅតាមច្បាប់៕ ដោយ៖គ បញ្ញា
