ខេត្តកំពត៖ ខ្សែរថភ្លើងមួយគ្រឿងបានបុកចំពាក់កណ្តាលរថយន្តម៉ាកធុនត្រា អូសជាង១០០ម៉ែត្រ បណ្តាលឲ្យរបួសធ្ងន់៤នាក់ និងស្រាលម្នាក់ នៅវេលាម៉ោង៤រសៀល ថ្ងៃទី៣១ ខែធ្នូ ឆ្នាំ២០១៥ ចំណុចផ្លូវរថភ្លើងឡើងភ្នំបូកគោ ស្ថិតក្នុងភូមិរលួស ឃុំបឹងទូក ស្រុកទឹកឈូ ខេត្តកំពត។
មន្ត្រីនគរបាលមូលដ្ឋាន មេគង្គប៉ុស្តិ៍ ថា ជនរងគ្រោះទាំងអស់នោះមាន ១-ឈ្មោះ ស្រី សុខុន ភេទប្រុស អាយុ៥៣ឆ្នាំ (របួសធ្ងន់),២-ឈ្មោះ អ៊ុក ខាត់ណា ភេទស្រី អាយុ៤៨ឆ្នាំ(របួសធ្ងន់),៣-ឈ្មោះ សួស លីហួរ ភេទប្រុស អាយុ២ឆ្នាំ(របួសធន់),៤-អ្នកបើកបររថយន្ត ឈ្មោះ អាំ សុខថេន ភេទប្រុស អាយុ២៨ឆ្នាំ(របួសស្រាល) អ្នកទាំង៤ មានទីលំនៅភូមិសំឡី ឃុំសំឡី ស្រុកកំពង់រោទិ៍ ខេត្តស្វាយរៀង និង ៥-ឈ្មោះ(ស្រី) ភេទស្រី អាយុ៤៧ឆ្នាំ(របួសធ្ងន់) រស់នៅភូមិកំបូល ខណ្ឌដង្កោ រាជធានីភ្នំពេញ។
មន្ត្រីដដែលបន្តថា រថយន្តធុនត្រា អ្នកជិះទាំងអស់មានចំនួន៧នាក់ ស្រី៣នាក់ ទាំងអ្នកបើកបរ ជាលក្ខណៈគ្រួសារ ក្នុងគោលបំណងឡើងទៅលើភ្នំបូកគោ ដើម្បីឆ្លងឆ្នាំសកលនៅលើទីនោះ លុះរថយន្តមកដល់ផ្លូវរថភ្លើងអ្នកបើកមិនបានប្រុងប្រយ័ត្ន ឬគ្មានសញ្ញាចរាចរណ៍ពេលមានខ្សែរថភ្លើងមកដល់ត្រង់ចំណុចដែលមាន រថយន្តឆ្លងកាត់ ទើបចៃដន្យអាក្រក់កើតមានឡើងត្រូវរថភ្លើងមកដល់បុកចំពាក់កណ្តាលអូស រថយន្តធុនត្រាចម្ងាយ១១៥ម៉ែត្រ ដែលជាឧប្បត្តិហេតុគ្រោះថ្នាក់ចរាចរណ៍ដែលកម្រកើតមានណាស់។
ក្រោយហេតុការណ៍ភ្លាមអ្នករងរបួសទាំងអស់ត្រូវបានគេដឹកយកទៅ សង្គ្រោះព្យាបាលនៅឯមន្ទីរពេទ្យអង្គការ “ស៊ុនយ៉ាឃៀល” ក្នុងឃុំបឹងទូក។
ព័ត៌មានពិស្តាបន្ថែមយ៉ាងណាទៀតនោះសមត្ថកិច្ចនៅមិនទាន់ស្រង់លម្អិតនៅឡើយទេ៕ដោយ៖អ៊ួង វឹង
