បាត់ដំបងៈប្រទះឃើញសាកសពបុរសម្នាក់ដែលបាត់ខ្លួន៤ថ្ងៃ សង្ស័យជាករណីប្លន់ព្រោះបុរសនោះជាអ្នករត់ម៉ូតូឌុបបានដឹកជនសង្ស័យម្នាក់ពីមុខផ្សារខ្នាចមាស ហើយបាត់រហូត៤ថ្ងៃទើបអ្នកភូមិប្រទះឃើញសាកសព។
កញ្ញា ផាន់ សុខឡាង មុខរបរលក់សាំងនៅមុខផ្សារខ្នាចមាស ឃុំខ្នាចមាស ស្រុកបេវល ខេត្តបាត់ដំបង ត្រូវជាកូនរបស់ជនរងគ្រោះបានប្រាប់ថា ឱពុកដើបានស្លាប់នោះមានឈ្មោះ ភិន ផាន់ អាយុ៧៤ឆ្នាំ មានមុខរបរត់ម៉ូតូឌុបបានដឹកជនសង្ស័យម្នាក់ចេញពីកន្លែងលក់សាំង នៅវេលាម៉ោង១០ះ៣០នាទី ថ្ងៃទី២៩ ខែធ្នូ ឆ្នាំ២០១៥ កន្លងមកនេះ។
ការដឹកជនសង្ស័យចេញទៅបាត់រហូតដល់ម៉ោង៤ល្ងាច ទើបមានការភ្ញាក់ផ្អើលឡើងហើយក៏នាំគ្នាដើរកជាច្រើនកន្លែងនៅតែមិនឃើញ។
នាងបន្តទៀតថា រហូតមកដល់ព្រលប់ថ្ងៃទី០១ ខែមករា ឆ្នាំ២០១៦ នេះ ទើបទទូលបានបានដំណឹងថា អ្នកភូមិប្រទះឃើញសាកសពបុរសម្នាក់នៅក្បែររបងចំការ ស្តិតនៅក្នុងឃុំគោកឃុំ ស្រុកថ្មគោល ខេត្តបាត់ដំបង ទើបក្រុមគ្រូសារជនរងគ្រោះទៅមើលឃើញសាកសពជាឱពុកខ្លួនពិតប្រាកដមែន។
បន្ទាប់ពីរកឃើញសាកសពនៅព្រលប់ថ្ងៃទី០១ ខែមករា ឆ្នាំ២០១៥ ដដែល ដោយសារយប់ពេកសមត្ថកិច្ចបានអោយរក្សាសពទុកនៅសភាពដដែលសិន រង់ចាំជំនាញធ្វើការថ្ងៃទី០១ខែមករា ឆ្នាំ២០១៦ មុននឹងយកទៅធ្វើបុណ្យ។
សមត្ថកិច្ចមូលដ្ឋានបានអោយដឹងថា ជនរងគ្រោះស្លាប់មានឈ្មោះភិនផាន់អាយុ៧៤ឆ្នាំ មុខរបរត់ម៉ូតូឌុប បច្ចុប្បន្ន រស់នៅភូមិខ្នាចមាស ឃុំខ្នាចមាស ស្រុកបវេលខេត្តបាត់ដំបង និងម៉ូតូដែលបាត់ ម៉ាកហុងដាស៊េរី ២០១៥ ពណ៍ខ្មៅ ពាក់ស្លាកលេខ ប.ប1P2863 ៕ ប៉ែន សុផល
