ភ្នំពេញ៖បុរសម្នាក់ក្នុងចំណោមគ្នីគ្នា៤នាក់ ត្រូវកំលាំងល្បាតរបស់នគរបាលប៉ុស្តិ៍ទឹកល្អក់ទី២ ខណ្ឌទួលគោក ចាប់ខ្លួននៅថ្ងៃទី០៦-០១-២០១៦ វេលាម៉ោង១៧: ០០នាទី បន្ទាប់ពីជននេះបានឆក់កាបូបពីស្ត្រីជិះរ៉ឺម៉កកង់បីម្នាក់មិនបានសម្រេច ប្រព្រឹត្តនៅចំណុចមុខផ្ទះលេខ ១២១ ផ្លូវលេខ១៦០ កែងផ្លូវលេខ២៦១ ក្រុមទី ៣៧ ភូមិ១៣ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។
ជនសង្ស័យឈ្មោះ សុខ ពុធមិថុនា ហៅ មិថុនា ភេទប្រុស អាយុ ២៣ឆ្នាំ ជនជាតិខ្មែរ មុខរបរ ពុំពិត ប្រាកដ ស្នាក់នៅផ្ទះជួលពុំចាំលេខ ម្តុំសំណង់១២ សង្កាត់ទឹកល្អក់ទី៣ ខណ្ឌទួលគោក ។
ជនរងគ្រោះ ពុំស្គាល់អត្តសញ្ញាណ ភេទស្រី អាយុប្រហែល ៣៧ឆ្នាំ ក្រោយពេលកើតហេតុ បានជិះរ៉ឺម៉កកង់បីទៅបាត់ ពុំបានប្តឹងទេ ។
វត្ថុតាងចាប់យក : ម៉ូតូមួយគ្រឿងម៉ាកSuzuki Nex ពណ៌បៃតង ស៊េរី2013 ពាក់ស្លាកលេខភ្នំ ពេញ 1CM-7863 មានលេខតួ និងលេខម៉ាស៊ីន 301404 ( ជាម៉ូតូដែលជនសង្ស័យជិះធ្វើសកម្ម ភាពឆក់ ) ។
មុនពេលកើតហេតុ ជនរងគ្រោះបានជិះរ៉ឺម៉កម៉ូតូកង់បី មានកាន់កាបូបនៅដៃធ្វើដំណើរតាមបណ្តោយផ្លូវលេខ១៦០ ពីកើតទៅលិច ពេលធ្វើដំណើរមកដល់ចំណុចកើតហេតុ ស្រាប់តែមានជនសង្ស័យ០៤នាក់ ជិះម៉ូតូ០២ គ្រឿងធ្វើដំណើរបញ្ច្រាសទិសគ្នា បានធ្វើសកម្មភាព ឆក់កាបូបពីជនរងគ្រោះ តែពុំបានសម្រេចទេ ហើយព្យាយាមជិះម៉ូតូគេចខ្លួន ពេលនោះជនរង គ្រោះស្រែកចោរៗ ទើបកំលាំងល្បាតរបស់នគរបាលប៉ុស្តិ៍ទឹកល្អក់ទី២ បានអន្តរាគមន៍ឃាត់ខ្លួន បានម្នាក់ ចំណែក៣នាក់ ទៀតបានជិះម៉ូតូគេចខ្លួនបាត់ ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿង បញ្ជូនទៅតុលាការចាត់ការតាមផ្លូវច្បាប់ ៕ដោយ៖ស សាម
