ដោយ៖រដ្ឋា
ខេត្តត្បូងឃ្មុំ៖ប្រតិបត្តិការត្រួតពិនិត្យរបស់កងរាជអាវុធខេត្តត្បូងឃ្មុំ នៅរសៀលថ្ងៃទី ១៦ ខែមករា ម្សលម៉ិញនេះ បានចុះឡោមព័ទទីតាំងស្តុកឈើចំនួនពីរកន្លែងរបស់លោកឧកញ៉ា ពីររូប គឺឧកញ៉ា លឹម ប៊ុណ្ណា ហៅខ្នា និងឧកញ៉ា សឹង្ហ សំអុល ស្ថិតក្នុងភូមិសាស្ត្រ ស្រុកមេមត់ ខេត្តត្បូងឃ្មុំ ជាមួយគ្នា។
អ្នកឆ្លើយឆ្លងព័ត៌មានបានរាយការណ៍ថា តាំងពីវេលាម៉ោងប្រមាណជិត ២រសៀលថ្ងៃទី ១៦ ខែមករា ឆ្នាំ២០១៦ កងកម្លាំងរាជអាវុធហត្ថខេត្តត្បូងឃ្មុំ ដឹកនាំដោយលោក វ៉ា សារិទ្ធ មេបញ្ជាការកងរាជអាវុធហត្ថខេត្តត្បូងឃ្មុំ បានចុះឆែកឆេរទីតាំងដ៏ធំចំនួនពីរកន្លែងរបស់លោកឧកញ៉ា២នាក់ខាងលើ។
ប្រភពបន្តថា ទីតាំងរបស់ឧកញ៉ា សឹង្ហ សំអុល ស្ថិតនៅក្នុងភូមិខ្នងក្រពើលិច ឃុំតាមូង ចំណែកទីតាំងស្តុកឈើមួយកន្លែងទៀតជារបស់លោកឧកញ៉ា លឹម ប៊ុណ្ណា ហៅខ្នា ស្ថិតនៅក្នុងភូមិបូសតាកុក ឃុំដា ។ឃ្លាំងទាំងពីរនេះនៅក្នុងស្រុកមេមត់ ខេត្តត្បូងឃ្មុំ។
ប្រភពបន្តថា ប្រតិបត្តិការនេះបានធ្វើឡើងព្រមគ្នា ។ទីតាំងដែលសង្ស័យមានស្តុកឈើ របស់លោកឧកញ៉ា សឹង្ហ សំអុល ត្រូវបានម្ចាស់ទីតាំងអនុញ្ញាតឲ្យចូលត្រួតពិនិត្យនារសៀលថ្ងៃដដែល ប៉ុន្តែតាមរបាយការណ៍សមត្ថកិច្ចរកមិនឃើញមានភស្តុតាងឈើល្មើសនោះទេ ហើយការត្រួតពិនិត្យបានបញ្ចប់នៅវេលាព្រលប់ក្នុងថ្ងៃដដែល។ចំណែក ឃ្លាំងរបស់លោកឧកញ៉ា លឹម ប៊ុណ្ណា ហៅខ្នា មិនត្រូវបានម្ចាស់អនុញ្ញាតឲ្យចូលឆែកឆេរទេកាលពីរសៀលម្សិលម៉ិញ ដែលចាំបាច់កងកម្លាំងអាវុធហត្ថបានបន្តការយាមកាមរហូតដល់ព្រឹកថ្ងៃទី១៧ មករា នេះ ទើបមានការសម្រេចឲ្យចូលត្រួតពិនិត្យ។
ប្រភពបន្តថា ក្នុងឃ្លាំងស្តុកឈើរបស់លោកឧកញ៉ា លឹម ប៊ុណ្ណា នៅភូមិបូសតាកុក ឃុំដា សមត្ថកិច្ចរកឃើញឈើយ៉ាងច្រើនកំណាត់ ប៉ុន្តែបើតាមរបាយការណ៍ ចំនួនឈើដ៏ច្រើនសន្ធឹកសន្ធាប់នោះ សុទ្ធតែស្ថិតក្នុងអាជ្ញាប័ណ្ណស្របច្បាប់ទាំងអស់។
សូមបញ្ជាក់ផងដែរថា ខណៈកម្លាំងប៉េអឹមចាប់ផ្តើមឲ្យចូលឆែកឆេរនាព្រឹកម៉ិញនេះ មិនត្រូវបានអនុញ្ញាតឲ្យអ្នកកាសែតចូលរួមឡើយ រហូតដល់ការត្រួតពិនិត្យចប់សព្វគ្រប់ ទើបគេបើកឲ្យអ្នកកាសែតចូលយកព័ត៌មាន និងថតរូប។
អភិបាលខេត្តត្បូងឃ្មុំ លោក ប្រាជ្ញ ច័ន្ទ កាលពីថ្ងៃទី១៥ ខែមករា បានប្រាប់អ្នកកាសែតថា បទបញ្ជារបស់លោកនាយករដ្ឋមន្ត្រីឱ្យបិទច្រករត់ពន្ធឈើទៅលក់នៅប្រទេសវៀតណាម គឺជារឿងដ៏ត្រឹមត្រូវដែលទាមទារឱ្យអាជ្ញាធរត្រូវតែចាត់វិធានការឱ្យខាងតែបាន ។លោកថា ៖ «ឥឡូវហ្នឹងជា បទបញ្ជារបស់គាត់ គាត់នឹងរៀបចំគណៈកម្មការមួយដើម្បីចាត់វិធានការយ៉ាងម៉ឺងម៉ាត់ ហើយខ្ញុំក៏ត្រៀមលក្ខណៈដើម្បីអនុវត្តឱ្យមានប្រសិទ្ធភាពដែរ»។
គួរបញ្ជាក់ថា កិច្ចប្រតិបត្តិការរបស់អាជ្ញាធរខេត្តត្បូងឃ្មុំនាពេលនេះ ត្រូវគេមើលឃើញថា ធ្វើឡើងនៅក្រោយពេលលោកនាយករដ្ឋមន្ត្រីបានព្រមានចំៗថា នឹងដកបុណ្យសក្ដិអភិបាលខេត្តរូបនេះ និងអភិបាលស្រុកមេមត់ ប្រសិនមិនអាចចាត់វិធានការលើករណីដឹកឈើទៅលក់នៅប្រទេសវៀតណាម បានទេ៕
សមត្ថកិច្ចកំពុងត្រួតពិនិត្យឃ្លាំងឧកញ៉ា លឹម ប៊ុណ្ណានៅភូមិទួលបូសតាកុក ឃុំដា ស្រុកមេមត់
លោក វ៉ា សារិទ្ធ មេបញ្ជាការអាវុធហត្ថខេត្តត្បូងឃ្មុំពេលចុះត្រួតពិនិត្យឃ្លាំងរបស់ឧកញ៉ា សឹង្ហ សំអុលនៅភូមិខ្នងក្រពើលិច ឃុំតាមូង ស្រុកមេមត់
