ដោយ៖រដ្ឋា
ភ្នំពេញ ៖ បុរស២នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងម៉ូតូធំម៉ាក Baja និងម៉ូតូហុងដាឌ្រីម សេ១២៥ កាលពីវេលាម៉ោង៩ និង១០នាទីយប់ ថ្ងៃទី១៧ ខែមករា ឆ្នាំ២០១៦ នៅតាមបណ្ដោយផ្លូវលំ ក្នុងភូមិដីថ្មី សង្កាត់ភ្នំពេញថ្មី ខណ្ឌសែនសុខ ។
ជនរងគ្រោះឈ្មោះ គង់ ណារិទ្ធ ភេទប្រុស អាយុ៤២ឆ្នាំ (ស្លាប់) ជិះម៉ូតូម្នាក់ឯង ម៉ាក Baja ពណ៌ទឹកប្រាក់លាយស ពាក់ស្លាកលេខ ភ្នំពេញ 1AG-7647 និងឈ្មោះ វ៉េ ផល ភេទប្រុស អាយុ៤៣ឆ្នាំ ស្នាក់នៅភូមិក្រាំងអង្ក្រងទី២ សង្កាត់ក្រាំងធ្នង់ ខណ្ឌសែនសុខ (ស្លាប់) ជិះម៉ូតូម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ 1FD-0469 និងគ្នាម្នាក់ទៀតរងរបួសធ្ងន់ត្រូវបានរថយន្តសង្គ្រោះបញ្ជូនទៅសង្គ្រោះនៅមន្ទីរពេទ្យ ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ជិះម៉ូតធំម៉ាក Baja តាមបណ្ដោយផ្លូវលំយ៉ាងលឿនក្នុងទិសដៅពីកើតទៅលិច ចំណែកម៉ូតូហុងដាឌ្រីម សេ១២៥ ជិះគ្នា២នាក់យ៉ាងលឿនដូចគ្នាក្នុងទិសដៅពីលិចទៅកើតច្រាសទិសគ្នា ។ខណៈជិតដល់កន្លែងកើតហេតុ ម៉ូតូធំបានព្យាយាមវ៉ារថយន្ត១គ្រឿងចូលទៅចំណែកផ្លូវម្ខាងទៀតក៏បានបុកម៉ូតូហុងដាឌ្រីម បណ្ដាលឲ្យស្លាប់២នាក់ភ្លាមៗ និងរបួសធ្ងន់ម្នាក់ត្រូវបានរថយន្តសង្គ្រោះដឹកទៅសង្គ្រោះនៅមន្ទីរពេទ្យ ។
ក្រោយពេលកើតហេតុ សមត្ថកិច្ចចរាចរបានចុះមកធ្វើការវាស់វែង ហើយយកម៉ូតូទាំង២គ្រឿងទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីដោះស្រាយតាមនីតិវិធីនៅពេលក្រោយ ។ចំណែកសពជនរងគ្រោះទាំង២នាក់ សមត្ថកិច្ចកំពុងព្យាយាមស្វែងរកក្រុមគ្រួសារដើម្បីមកទទួលយកទៅធ្វើបុណ្យតាមប្រពៃណី ៕
