ឥណ្ឌូណេស៊ី៖មេបញ្ជាការប៉ូលិសឥណ្ឌូណេស៊ីលោក Badrodin Haiti បាននិយាយកាលពីថ្ងៃច័ន្ទម្សិលមិញថា ការវាយប្រហារទ្រង់ទ្រាយធំជាងមុនអាចកើតមាន ប្រសិនបើពួកភេរវជនជ្រុលនិយម ISISត្រលប់មកពីមជ្ឈិមប្រទេសវិញ។
លោកមេបញ្ជាការរូបនេះបន្តថា ការវាយប្រហារនៅកណ្ដាលរដ្ឋធានីឥណ្ឌូណេស៊ីកាលពីសប្តាហ៍មុនជាគម្រោងការមួយ “ផែនការ B” ធ្វើឡើងដោយក្រុមទាហាន ISIS ក្រោយពីប្រតិបត្តិការប៉ូលិសបានបង្អាក់គម្រោងការវាយប្រហារ នាអំឡុងពេលថ្ងៃគ្រិស្តស្មាស និងថ្ងៃបុណ្យចូលឆ្នាំសកល។ លោកមេបញ្ជាការបញ្ជាក់ថា ការវាយប្រហារនោះគឺផែនការ B បន្ទាប់ពីផែនការមិនបានសម្រេចពួកគេក៏បានវាយប្រហារលើផ្លូវ Thamrin ដែលជាកន្លែងមានមនុស្សធ្វើដំណើរច្រើន។
ទោះយ៉ាងណាក្ដីលោកមេបញ្ជាការ Badrodin បានបន្តទៀតថា ប៉ូលិសនឹងបន្តខំប្រឹងប្រែងទ្វេជាពីរ ដើម្បីតាមដានរកមើលបណ្ដាញ ISIS ក្នុងប្រទេសឥណ្ឌូណេស៊ី បន្ទាប់ពីកើតមានការវាយប្រហារចុងក្រោយនោះ។
ដោយឡែកអាជ្ញាធរឥណ្ឌូណេស៊ីបានឲ្យដឹងថា ប្រជាជនឥណ្ឌូណេស៊ី ៥០០នាក់បានធ្វើដំណើរទៅ មជ្ឈិមបូព៌ាដើម្បីចូលរួមជាមួយក្រុម ISIS ។ ប៉ុន្តែអ្នកចូលរួមចំនួន១០០នាក់ ត្រូវគេជឿថា បានត្រលប់មកឥណ្ឌូណេស៊ីវិញហើយ។
គួរបញ្ជាក់ថា ការបំផ្ទុះគ្រាប់បែកដៃ និងបាញ់ប្រហារកាំភ្លើងនៅ Thamrin Road រដ្ឋធានី ហ្សាការតា ប្រទេសឥណ្ឌូណេស៊ី កាលពីព្រហស្បតិ៍កន្លងទៅ បានបណ្តាលឲ្យមនុស្ស៨នាក់ស្លាប់ ក្នុងនោះ៤នាក់ជាមន្ត្រីប៉ូលិស ខណៈដែល២០នាក់ផ្សេងទៀតរងរបួស៕
