កូរ៉េខាងត្បូង៖រដ្ឋមន្ត្រីការពារជាតិកូរ៉េខាងត្បូង បានមានប្រសាសន៍កាលពីថ្ងៃច័ន្ទម្សិលមិញថា យោធាកូរ៉េខាងជើងបានបង្ហោះប៉េងប៉ោងសណ្ដោងខិតប័ណ្ណ និងបានប៉ើងទៅដល់ទីក្រុងសេអ៊ូលជិតព្រំដែនផងដែរ។
ប្រភពបានដឹងថា បាចខិតប័ណ្ណឃោសនាប្រមាណ១លានសន្លឹកតាមប៉េងប៉ោងចូលប្រទេសកូរ៉េខាងត្បូង គ្រាដែលមានភាពតានតឹងរវាងគូជម្លោះទាំងពីរកំពុងកើតមាន ក្រោយមានការតេស្តគ្រាប់បែកនុយក្លេអ៊ែររបស់កូរ៉េខាងជើងថ្មីៗនេះ។ ប្រភពបន្តថា ការបាចសាចខិតប័ណ្ណកូរ៉េខាងជើងគឺជារឿងកម្រកើតមានបំផុត ខណៈកូរ៉េទាំងពីរបានបញ្ឈប់សង្គ្រាមចិត្តសាស្ត្រជាផ្លូវការ ដើម្បីកាត់បន្ថយភាពតានតឹងកាលពីឆ្នាំ២០០៤។ ប៉ុន្តែសកម្មជនកូរ៉េខាងត្បូងទេ នៅតែបញ្ជូនខិតប័ណ្ណតាមប៉េងប៉ោងម្ដងម្កាលទៅកាន់កូរ៉េខាងជើង ដែលនាំឲ្យមានការឆ្លើយតបបែបកំហឹងរបស់កូរ៉េខាងជើងបែបនេះ។
គួរបញ្ជាក់ថា ការប្រឈមមុខបែបសង្គ្រាមត្រជាក់នេះពុះកញ្ជ្រោលឡើង ចាប់តាំងពីមានការអះអាងពីកូរ៉េខាងជើងកាលពីថ្ងៃទី៦មករាថា ខ្លួនជាអ្នកតេស្តគ្រាប់បែកអ៊ីដ្រូហ្សែនក្រោមដី។ មុនមានការបាចបង្ហោះខិតប័ណ្ណនេះ កូរ៉េខាងត្បូងក៏បានផ្សព្វផ្សាយយុទ្ធនាប្រឆាំងក្រុង ព្យុងយ៉ាង និងដាក់ប្រដាប់បំពងតាមព្រំដែនបែរទៅរកកូរ៉េខាងជើងដែរ៕
