ខេត្តក្រចេះ៖ អ្នកកាសែតម្នាក់ក្នុងចំណោមគ្នាពីរនាក់ត្រូវបានឈ្មួញឈើបាញ់នឹងកាំភ្លើងខ្លីចំចិញ្ចើមធ្លាយក្បាល បណ្តាលឲ្យស្លាប់ភ្លាមៗនៅក្នុងរថយន្ត កាលពីម៉ោង១ទៅម៉ោង២រំលងអាធ្រាត្រឈានចូលថ្ងៃទី១២ ខែតុលា ឆ្នាំ២០១៤ នៅចំណុចព្រៃក្នុងភូមិទួលពន្លៃ ឃុំខ្សឹម ស្រុកស្នួល ខេត្តក្រចេះ។
មន្ត្រីសមត្ថកិច្ចបានប្រាប់ថា អ្នកកាសែតដែលឈ្មួញឈើបាញ់ សម្លាប់នោះមានឈ្មោះ តាំង ទ្រី ភេទប្រុស អាយុ៤៩ឆ្នាំ កាន់កាតកាសែតសមាគមខ្មែរអ្នកប្រជាធិបតេយ្យនិងជាអ្នកយកព័ត៌មាន កាសែត« ថ្ងៃនេះ»។ នៅកន្លែងកើតហេតុ សមត្ថកិច្ចរកឃើញ គ្រាប់កាំភ្លើងមួយគ្រាប់ដែលជនដៃដល់បាញ់ម៉ាកឡុក ករណី នេះ សមត្ថកិច្ចមិនទាន់សន្និដ្ឋានថាកើតឡើងដោយមូលហេតុអ្វី ពិតប្រាកដនៅឡើយទេ។
ប្រភពបន្តថា នៅមុនពេលកើហេតុជនរងគ្រោះនិងមិត្តភិក្តរួមការងារបានជិះឡានទៅ មើលក្រុមឈ្មួញធ្វើសកម្មភាពដឹកជញ្ជូនឈើនៅចំណុចជួរក្រាំង ឃុំខ្សឹម ស្រុកស្នួល ខេត្តក្រចេះ។ នៅពេលទៅដល់ ថៅកែឈើបានហៅ“ចរចា”ហើយក៏មានការប្រទាញប្រទង់គ្នារហូតឈានដល់ ការផ្ទុះអាវុធ។ បន្ទាប់ពីបាញ់ស្លាប់រួច ជនល្មើសបានជិះឡានលុចស៊ីស៤៧០ ពណ៌ខ្មៅ គេចខ្លួន តែបើករថយន្តបានប្រមាណ ៥០០ម៉ែត្រ ពីកន្លែងកើត ហេតុក៏ក្រឡាប់ហើយជនល្មើសក៏រត់គេចខ្លួនបាត់ទៅ។
បុរសម្នាក់ឈ្មោះ សាត សិដ្ឋ ដែលជិះឡានជាមួយជនរងគ្រោះត្រូវបានសមត្ថកិច្ចធ្វើការសាកសួរព័ត៌មានលម្អិត។
ប្រភពបន្តថា ឈ្មួញឈើដែលបានបាញ់សម្លាប់អ្នកកាសែតនោះ ឈ្មោះ ហៀង ជាមន្ត្រីប៉ូលិសខេត្តមណ្ឌលគិរី កំពុងរត់គេចខ្លួន។ ដោយឡែកសមត្ថកិច្ច ក៏បានធ្វើការឃាត់ខ្លួន អ្នកបើកបររថយន្ដ មួយបាំងកន្លះដឹកឈើឲ្យឈ្មោះ ហៀង យកមកធ្វើការសាកសួរ៕រដ្ឋា
អ្នកកាសែតម្នាក់ដែលត្រូវឈ្មួញឈើបាញ់ស្លាប់នៅខេត្តក្រចេះ
