ដោយ៖សហការី
ខេត្តព្រះសីហនុ៖ ប្រជាពលរដ្ឋមួយចំនួននៅក្រុងព្រះសីហនុ បានរិះគន់ចំពោះសំណង់ អាគារខុសច្បាប់ជាច្រើនដែលកំពុងរីកដូចផ្សិតនៅចំណុចភូមិ៣ សង្កាត់លេខ១ ក្រុង-ខេត្តព្រះសីហនុនេះ។លោក យន់ មឺន អភិបាលខេត្តព្រះសីហនុបានបដិសេធ ដោយបញ្ជាក់ថា ជាសំណង់ខុសច្បាប់ ខណះដែលម្ចាស់ផ្ទះអះអាងថា ពួកគាត់មានច្បាប់អនុញ្ញាតទើបហ៊ានសាងសង់។
ប្រជាពលរដ្ឋបានអោយដឹងថា សំណង់ខុសច្បាប់ទាំងនេះភាគច្រើនជារបស់មន្ត្រីរាជការនៅក្នុងក្រុង ព្រះសីហនុ ដែលគេសង្ស័យថា មានការឃុបឃិតគ្នាជាមួយអាជ្ញាធរភូមិ ឃុំ ស្រុករួចអស់ហើយ បានជាម្ចាស់សំណង់ហ៊ានសាងសង់គ្មានញញើតអ្នកណាបន្តិចសោះ។
បុរសចំណាស់ម្នាក់អះអាងថាជាអ្នករស់នៅក្នុងភូមិ៣ បានប្រាប់អោយដឹងថា ម្ចាស់សំណង់ខុសច្បាប់ទាំងនេះ សុទ្ធតែជាអ្នកមានអំណាច និងមានលុយច្រើន បានជាគេហ៊ានមកសាងសង់សំណង់លំនៅឋានយ៉ាងរឹងមាំបែបនេះ ។ប៉ុន្តែបើអ្នកក្រក្រីវិញ កុំថាឡើយសង់ផ្ទះ សូម្បីធ្វើតូបលក់ដូរបន្តិចបន្តួចក៏មិនបានដែរ គឺខាងអាជ្ញាធរមកហាមឃាត់ភ្លាម ចំណែកអ្នកមានលុយ និងមានអំណាចវិញ មិនឃើញមុខមកហាមឃាត់នោះទេ។បុរសដដែលបន្តថា ទង្វើបែបនេះ គេអាចដឹងបានថា ជាអំពើពុករលួយរបស់អាជ្ញាធរខេត្តព្រះសីហនុ។
ម្ចាស់សំណង់ល្មើសច្បាប់ទាំងនេះ បានប្រាប់អោយដឹងថា បើពួកគាត់គ្មានច្បាប់គ្មានអ្នកណាហ៊ានសាងសង់ទេ ព្រោះអាជ្ញាធរក្រុង និងខេត្តជាអ្នកចេញច្បាប់អោយសាងសង់។
ដើម្បីបញ្ជាក់ពីព័ត៌មានខាងលើនេះ ភ្នាក់ងារព័ត៌មាន មេគង្គប៉ុស្តិ៍ បានភ្ជាប់ទូរស័ព្ទទៅលោក អ៊ី សុកឡើង អភិបាលក្រុងព្រះសីហនុដើម្បីសុំការបំភ្លឺដែរ តែទូរស័ព្ទរបស់លោកមិនអាចទាក់ទងបាន ចំណែកលោក យន់ មឺន អភិបាលខេត្តព្រះសីហនុបានប្រាប់អ្នកយកព័ត៌មានថា សំណង់ទាំងនេះគ្មាននរណារចេញច្បាប់អោយសាងសង់ឲ្យនោះទេ។
បើយោងតាមការបញ្ជាក់របស់លោកអភិបាលខេត្ត គឺមានន័យថា សំណង់អាគារលំនៅឋានដែលកំពុងរីកដូចផ្សិតនោះ ជាសំណង់ ខុសច្បាប់ ដូច្នេះសូមប្រីយ៍មិត្តអ្នកអានរង់ចាំមើលថា តើអាជ្ញាធរ នឹងចាត់វិធានការបែបណាចំពោះបទល្មើសមួយនេះ ? ហើយនៅពេលណាទើបចាត់ការ?៕
